תפסיר רס"ג, שמות ה

ובעד ד̇לך דכ̇ל מוסי והרון וקאלא לפרעון כד̇א קאל אללה אלאה אסראיל אטלק קומי יחג̇ון לי פי אלבר

קאל פרעון מן אללה חתי אקבל מנה ואטלק בני אסראיל לא אערף אללה ולא אטלק בני אסראיל איצ̇א

קאלא אלאה אלעבראניין ואפאנא אמרה נמצ̇י מסיר ת̇לת̇ה איאם פי אלבר ונקרב ללה רבנא כילא יפאג̇ינא בובא או בסיף

קאל להמא מלך מצר לם יא מוסי והרון תג̇ד̇באן אלקום ען אעמאלהם אמצ̇ו אלי נקלכם

ת̇ם קאל אמן כת̇רה אהל אלבלד חתי תעטלאהם מן נקלהם

ואמר פרעון פי ד̇לך אליום ג̇לאוזה אלקום וערפאהם קאילא

לא תעודו אן תעטו תבנא לילבנו אללבן מת̇ל אמס ומא קבלה בל הם ימצ̇ון ויקמשון להם תבנא

וצ̇ראיב אללבן אלתי כאנו יצנעונהא אמסא ומא קבלה צירוהא עליהם ולא תנקצון מנהא לאנהם מרפהון ולד̇לך יצרכ̇ון ויקולון נמצ̇י נקרב לרבנא

ית̇קל אלעמל עלי אלקום פישתגלו בה ולא ישתגל באמור באטלה

פכ̇רג̇ ג̇לאוזה אלקום וערפאהם וקאלו להם כד̇א קאל פרעון ליס אעטיכם תבנא

אנתם אמצ̇ו וכ̇ד̇ו לכם תבנא חית̇ מא תג̇דון ואעלמו אן לא ינקץ מן עמלכם שי

ותבדד אלקום פי ג̇מיע בלד מצר ליקמשו קשא ללתבן

ואלג̇לאוזה מלחון קאילין אכמלו עמלכם אמר יום ביום כמא כאן פי וקת אעטא אלתבן

פצ̇רב ערפא בני אסראיל אלד̇ין ולוהם עליהם ג̇לאוזה פרעון וקאלו להם מא באלכם לם תכמלו צ̇ראיבכם אן תלבנו מת̇ל אמס ומא קבלה איצ̇א אמס ואליום

וג̇א ערפא בני אסראיל ואסתגאת̇ו אלי פרעון קאילין לם תצנע כד̇א בעבידך

תבן לם ידפע אלינא ויקולון לנא אצ̇רבו לבנא הוד̇א עבידך מצ̇רובון ממא יכ̇טי עליהם קומך

קאל אנתם מרפהון ולד̇לך תקולון נמצ̇י נקרב לרבנא

ואלאן אמצ̇ו אעמלו ותבן לא יעטי לכם וצ̇ראיבכם תופון

פנט̇ר ערפא בני אסראיל אנהם בשר וקאלו לא תנקצו מן לבנכם אמר יום ביום

ופאג̇ו מוסי והרון ואקפון תלקאהם ענד כ̇רוג̇הם מן ענד פרעון

פקאלו להמא ינט̇ר אללה ויחכם עליכם כמא אפסדתמא חאלנא ענד פרעון וענד קואדה חתי לו אן סיפא פי ידהם לקתלונא

פרג̇ע מוסי אלי אללה וקאל יא רב לם אבלית הולאי אלקום ולם ד̇א בעת̇ת בי

ומן חיתי דכ̇לת אלי פרעון פכ̇אטבתה באסמך אסא אליהם ולם תכ̇לצהם מן ד̇לך