תפסיר רס"ג, שמות ז

קאל אללה למוסי אנט̇ר קד ג̇עלתך אסתאד̇א פי אמר פרעון והרון אכ̇וך יכון תרג̇מאנך

אנת תכלם הרון אכ̇אך בג̇מיע מא אמרך בה והו יכלם פרעון ליטלק בני אסראיל מן בלדה

ואנא אעצב קלב פרעון ואכת̇ר איאתי ובראהיני פי בלד מצר

ולא יקבל מנכמא פרעון חתי אחל אפאתי באלמצריין ואכ̇רג̇ ג̇יושי וקומי בני אסראיל מן בלד מצר באחכאם עט̇ימה

ויעלמון אלמצריון אני אללה אד̇א מדדת ידי עלי אלמצריין ואכ̇רג̇ת בני אסראיל מן בינהם

פצנע מוסי והרון כמא אמרהמא אללה כד̇אך צנעא

וכאן מוסי אבן ת̇מנין סנה והרון אבן ת̇לת̇ ות̇מנין סנה חין כלמא פרעון

ת̇ם קאל אללה למוסי והרון קאילא

אד̇א כלמכמא פרעון וקאל אעטוני ברהאנא פקל להרון כ̇ד̇ עצאך פאטרחהא בין ידי פרעון ותציר תנינא

פדכ̇ל מוסי והרון אלי פרעון וצנעא כמא קאל אללה וטרח הרון עצאה בין ידי פרעון וקואדה פצארת תנינא

ת̇ם דעא פרעון באלחכמא ואלסחרה פצנע כד̇אך איצ̇א עלמא מצר בכ̇פיהם

פטרח כל רג̇ל עצאה פצארת כתנאנין פאבתלעת עצא הרון עציהם

פאשתד קלב פרעון ולם יקבל מנהמא כמא קאל אללה

ת̇ם קאל למוסי קד ת̇קל קלב פרעון ואבא אן יטלק אלקום

אמץ̇ אליה באלגדאה הוד̇א הו כ̇ארג̇ אלי אלמא פקף תלקאה עלי שאטי אלניל ואלעצא אלתי אנקלבת חיה כ̇ד̇הא בידך

וקל לה אללה אלאה אלעבראניין בעת̇ני אליך קאילא אטלק קומי יעבדני פי אלבר והוד̇א אנת לם תקבל אלי אלאן

כד̇א קאל אללה בהד̇ה אלכ̇לה תעלם אנני אללה הא אנא צ̇ארב באלעצא אלתי בידי אלמא אלד̇י פי אלניל פינקלב דמא

ואלסמך אלד̇י פי אלניל ימות פינתן אלניל ויעג̇ז אלמצריון ען אן ישרבו מאא מן אלניל

ת̇ם קאל אללה למוסי קל להרון כ̇ד̇ עצאך ומד ידך עלי מיאה אלמצריין ואנהארהם וכ̇לג̇אנהם ואג̇אמהם וסאיר מלאם מיאההם פתציר דמא ויכון דם פי ג̇מיע בלד מצר ופי אואני אלכ̇שב ואלחג̇ארה

פצנע כד̇אך מוסי והרון כמא אמר אללה ורפע אלעצא וצ̇רב אלמא אלד̇י פי אלניל בחצ̇רה פרעון ובחצ̇רה קואדה פאנקלב ג̇מיע אלמא אלד̇י פי אלניל דמא

ואלסמך אלד̇י פי אלניל מאת ונתן אלניל פעג̇ז אלמצריון אן ישרבו מאא מן אלניל וצאר אלדם פי ג̇מיע בלד מצר

פצנע כד̇אך עלמא מצר בכ̇פיהם ואשתד קלב פרעון ולם יקבל מנהמא כמא קאל אללה

ת̇ם ולי פרעון ודכ̇ל מנזלה ולם ירד באלה אלי הד̇ה איצ̇א

ואחתפר ג̇מיע אלמצריין חואלי אלניל אבארא לישרבו מנהא מאא אד̇ לם יטיקו אן ישרבו מן מא אלניל

ולמא כמלת סבעה איאם בעד מא צ̇רב אללה אלניל

קאל אללה למוסי אדכ̇ל אלי פרעון וקל לה כד̇א קאל אללה אטלק קומי יעבדוני

פאנך אן אבית אן תטלקהם הא אנא צאדם תכ̇מך באלצ̇פאדע

פתסעי מן אלניל אלצ̇פאדע פתצעד ותדכ̇ל פי ביתך ופי כ̇דר מצ̇ג̇עך ועלי סרירך ופי ביות קואדך וסאיר קומך ופי תנאנירך ומעאג̇נך

ופי ג̇סמך וג̇סם קומך וקואדך תצעד אלצ̇פאדעך