תפסיר רס"ג, שמות ד

פאג̇אב מוסי וקאל לעלהם לא יומנון בי ולא יקבלון מני בל יקולון לם יתג̇לי לך אללה

פקאל אללה לה מנבהא מא ד̇א בידך קאל עצא

קאל אטרחהא עלי אלארץ̇ פטרחהא פצארת ת̇עבאנא פהרב מוסי מן בין ידיה

קאל אללה לה מד ידך ואמסך ד̇נבה פלמא מד ידה פאמסכה פצאר עצא פי ידה

לכי יומנו אן קד תג̇לי לך אללה אלאה אבאיהם אברהים ואסחק ויעקוב

וקאל לה איצ̇א אדכ̇ל ידך אלי כמך פאדכ̇להא ת̇ם אכ̇רג̇הא פאד̇א בהא ביצ̇א כאלת̇לג̇

וקאל לה איצ̇א ארדד ידך אלי כמך ורדהא ת̇ם אכ̇רג̇הא וקד עאדת כסאיר בדנה

קאל פאן לם יומנו בך ולם יקבלו אלאיה אלאולי פיומנון באלאיה אלת̇אניה

קאל פאן לם יומנו בהאתין אלאיתין ולם יקבלו מנך כ̇ד̇ מן מא אלניל ואצכבה עלי אליבס פאנה ינקלב ויציר דמא פי אליבס

קאל מוסי לרבה יא רב ליס אנא ד̇ו נטק מן אמס ומא קבלה ולא מן חין כ̇אטבת עבדך אני ת̇קיל אלפם ואללסאן ג̇מיעא

קאל לה אללה מן כ̇לק נטקא ללאנסאן או מן יכ̇לק אלאכ̇רם או אלאצם או אלבציר או אלאעמי אליס אנא אללה

פאמץ̇ אלאן פאנא אכון מע קולך ואדלך עלי מא תתכלם בה

קאל יא רבי אבעת̇ מן אנת באעת̇ה

ואשתד גצ̇ב אללה עלי מוסי וקאל אליס הרון אכ̇וך אלליואני אנא אעלם אנה מתכלם והוד̇א הו כ̇ארג̇ תלקאך פינט̇ר אליך ויסר פי נפסה

פכלמה וציר הד̇א אלכלאם פי פיה פאנא אכון מע קולך וקולה ואדלכמא עלי מא תצנעון

פיכלם הו לך אלקום ויכון לך תרג̇מאנא ואנת תכון לה אסתאד̇א

וכ̇ד̇ הד̇ה אלעצא בידך תצנע בהא אלמעג̇זאת

פמצ̇י מוסי ורג̇ע אלי יתר חמיה וקאל לה אמצ̇י וארג̇ע אלי אכ̇ותי אלד̇ין במצר ואנט̇ר הל הם באקיון קאל לה אמץ̇ בסלאם

ת̇ם קאל אללה למוסי במדין אמץ̇ ארג̇ע אלי מצר פאן קד מאת ג̇מיע אלקום אלטאלבין נפסך

פאכ̇ד̇ מוסי זוג̇תה וולדיה וארכבהם עלי חמאר ובעת̇ בהם ורג̇ע אלי בלד מצר ואכ̇ד̇ אלעצא אלד̇י אמרה אללה בהא פי ידה

ת̇ם קאל אללה לה פי מצ̇יך לתרג̇ע אלי מצר אנט̇ר ג̇מיע אלבראהין אלתי צירתהא פי ידך ואצנעהא בין ידי פרעון ואנא אשדד קלבה ולא יטלק אלקום

פקל לה כד̇א קאל אללה משרפא אבני בכרי אסראיל

פקלת לך אטלך אבני יעבדני פאן אבית אן תטלקה הא אנא קאתל אבנך בכרך

ולמא כאן פי אלטריק פי אלמבית פאג̇א ולדה מלאך אללה פטלב קטלה

פאכ̇ד̇ת צפורה צואנא פקטעת קלפה אבנהא וקדמתה בין ידיה וקאלת כאד אלערוס אן יכון מקטולא

פכף ענה חיניד̇ קאלת צאר אלערוס אלמקטול מכ̇תונא

ת̇ם קאל אללה להרון אמץ̇ תלקא מוסי פי אלבר פמצ̇א פואפאה פי ג̇בל אללה פקבלה

פאכ̇ברה מוסי בג̇מיע כלאם אללה אלד̇י בעת̇ה בה וג̇מיע אלאיאת אלתי אמרה אללה

פמצ̇א מוסי והרון וג̇מעא ג̇מיע שיוך̇ בני אסראיל

וכלמהם הרון בג̇מיע אלכלאם אלד̇י כלם אללה מוסי וצנע אלמעג̇זאת בחצ̇רה אלקום

פאמן אלקום אד̇ סמעו אן אללה קד ד̇כר בני אסראיל ונט̇ר צ̇עפהם וכ̇רו וסג̇דו