תפסיר רס"ג, שמות ג

וכאן מוסי ירעא גנם יתרו חמיה אמאם מדין פסאקהא אלי טרף אלבריה חתי ג̇א אלי ג̇בל אללה אלי חריב

פתג̇לי לה מלאך אללה בצ̇רים נאר מן אלסנא פראי אלסנא משתעל באלנאר והו ליס יחתרק

פקאל מוסי אמיל אלאן ואנט̇ר הד̇א אלמנט̇ר אלעג̇יב מא באל אלסנא לא יחתרק

פעלם אללה אנה קד מאל לינט̇ר פנאדאה מן אלסנא וקאל יא מוסי יא מוסי קאל לביך

קאל לא תתקדם אלי הנא אנזע נעליך ען רג̇ליך פאן אלמוצ̇ע אלד̇י אנת ואקף עליה מקדס

ת̇ם קאל אנא אלאה אביך אברהים ואסחק ויעקוב פסתר מוסי וג̇הה אד̇ כ̇אף אן ינט̇ר אלי נור אללה

ת̇ם קאל אללה נט̇רת לצ̇עף קומי אלד̇י במצר וסמעת צראכ̇הם מן קבל ג̇לאוזתהם ועלמת באוג̇אעהם

פתג̇לית לאכ̇לצהם מן יד אלמצריין ואצעדהם מן ד̇לך אלבלד אלי בלד ג̇יד ואסע בלד יפיץ̇ אללבן ואלעסל אלי מוצ̇ע אלכנעיין ואלחתיין ואלאמוריין ואלפרזיין ואלחויין ואליבוסיין

ואלאן הוד̇א צראך̇ בני אסראיל קד וצל אלי וראית אלצ̇גט אלד̇י אלמצריון יצ̇אגטונהם

פתעאל אלאן אבעת̇ בך אלי פרעון ואכ̇רג̇ קומי בני אסראיל מן בלד מצר

קאל מוסי ללה מן אנא חתי אמצ̇י אלי פרעון ואכ̇רג̇ בני אסראיל מן בלד מצר

קאל אנא אכון מעך והד̇ה איה לך אני בעת̇ת בך ואד̇א אכ̇רג̇ת אלקום מן מצר תעבדון אללה עלי הד̇א אלג̇בל

וקאל מוסי ללה הא אנא סאיר אלי בני אסראיל פאקול להם אלאה אבאיכם בעת̇ני אליכם פאן קאלו לי מא אסמה מא אקול להם

קאל לה אלאזלי אלד̇י לא יזול קאל כד̇א קל לבני אסראיל אלאזלי בעת̇ני אליכם

וקאל לה איצ̇א כד̇א קל לבני אסראיל אללה אלאה אבאיכם אלאה אברהים ואסחק ויעקוב בעת̇ני אליכם הד̇א אסמי אלי אלדהר והד̇א ד̇כרי אלי ג̇יל ואג̇יאל

אמץ̇ פאג̇מע שיוך̇ בני אסראיל וקל להם אללה אלאה אבאיכם תג̇לי אלי אלאה אברהים ואסחק ויעקוב קאילא קד ד̇כרתכם ומא צנע בכם במצר

פקלת אצעדכם מן עד̇אב אלמצריין אלי מוצ̇ע אלכנעאניין ואלחתיין ואלאמוריין ואלפריזיין ואלחויין ואליבוסיין אלי בלד יפיץ̇ אללבן ואלעסל

פאד̇א קבלו מנך אדכ̇ל אנת ושיוך̇ בני אסראיל אלי מלך מצר וקולו לה אללה אלאה אלעבראניין ואפאנא אמרה פאלאן נסיר אלאן מסיר ת̇לת̇ה איאם פי אלבר ונקרב ללה רבנא

ואנא אעלם אן מלך מצר לא ידעכם אן תמצ̇ו ולא ביד ואחדה שדידה

חתי אבעת̇ באפתי פאצ̇רב אלמצריין בג̇מיע אעג̇ובאתי אלתי אצנעהא פי מא בינהם ובעד ד̇לך יטלקכם

ואעטי אלקום חט̇אא ענד אלמצריין פאד̇א מצ̇יתם לא תמצ̇ו פרגא

בל תסתוהב אלמראה מן מסאכנתהא וג̇ארתהא אניה פצ̇ה וד̇הב ות̇יאבא תצירונהא עלי בניכם ובנאתכם ותנתצפון מן אלמצריין