תפסיר רס"ג, שמות לג

ת̇ם קאל אללה למוסי אמץ̇ אצעד מן ההונא אנת ואלקום אלד̇ין אצעדתהם מן בלד מצר אלי אלבלד אלד̇י אקסמת לאברהים ואסחק ויעקוב קאילא לנסלכם אעטיה

ואבעת̇ בין ידיך מלאכא אטרד בה אלכנעאניין ואלאמוריין ואלחתיין ואלפרזיין ואלחויין ואליבוסיין

אלי בלד יפיץ̇ אללבן ואלעסל פאני לא אצעד נורי פי מא בינכם לאנכם קום צעאב אלרקאב כילא אפניכם פי אלטריק

למא סמע אלקום הד̇א אלכ̇בר אלסו פחזנו ולם יג̇על כל רג̇ל זיה עליה

קאל אללה למוסי קל לבני אסראיל אנכם קום צעאב אלרקאב פלו אני אצעד נורי פי מא בינכם טרפה ואחדה לאפניתכם ואלאן אדימו נזע זיהם ענכם חתי אערפכם מא אצנע בכם

פדאם בנו אסראיל עלי נזע זיהם פי ג̇בל חריב

וכאן מוסי יאכ̇ד̇ אלכ̇בא פיצ̇רבה כ̇ארג̇ אלעסכר בעידא מנה ויסמיה כ̇בא אלמחצ̇ר וכאן כל מן טלב אללה יכ̇רג̇ אלי כ̇בא אלמחצ̇ר אלד̇י כארג̇ אלעסכר

וכאן מוסי אד̇א כ̇רג̇ אלי אלכ̇בא יקום ג̇מיע אלנאס וינתצב כל רג̇ל עלי באב כ̇באה וילתפתון ורא מוסי אלי דכ̇ולה אלכ̇בא

וכאן מוסי אד̇א דכ̇ל אלכ̇בא ינזל עמוד אלגמאם ויקף עלי באב אלכ̇בא ויכלם אללה מוסי

פאד̇א ראי ג̇מיע אלקום עמוד אלגמאם ואקפא עלי באב אלכ̇בא קאמו אג̇מעין פסג̇ד כל רג̇ל עלי באב כ̇באיה

ויתכלם אללה מע מוסי שפאהא כמא יכלם אלמר צאחבה וירג̇ע אלי אלעסכר וכאן כ̇אדמה יהושע בן נון שאבא לא יזול מן אלכ̇בא

ת̇ם קאל מוסי ללה אנת עאלם באנך קלת לי אצעד האולי אלקום ואנת פלם תערפני במן תבעת̇ מעי ואנת פקד קלת לי אני קד שרפת אסמך ווג̇דת חט̇אא ענדי

פאלאן אן וג̇דת חט̇אא ענדך ערפני סירך חתי אערף בך לכי אג̇ד חט̇אא ענדך ואנט̇ר לשעבך הד̇ה אלאמה

קאל לה נורי יסיר מעך אלי אן אקרך

קאל לה אן לם יסר נורך מענא מן אלאן פלא תצעדנא מן ההנא

במא ד̇א יערף באני קד וג̇דת חט̇אא ענדך אנא וקומך אליס במצ̇י נורך מענא פנכון אנא וקומך מתשרפין אכ̇תר מן ג̇מיע אלקום אלד̇ין עלי וג̇ה אלארץ̇

קאל אללה למוסי הד̇א אלכלאם אלד̇י קלת אצנעה איצ̇א לאנך וג̇דת חט̇אא ענדי ושרפת אסמך

קאל ארני אלאן וקארך

קאל לה אנא אמר בג̇מיע נורי בין ידיך ואנאדי באסמי בחצ̇רתך וארוף עלי מן ארוף וארחם למן ארחם

וקאל לה איצ̇א לא תסתטיע אן תנט̇ר אול נורי לאנה לא יראה אנסאן פיחיי

קאל לה אללה פהוד̇א מוצ̇ע ענדי אנתצב עלי אלצואן

פאד̇א מר בך נורי צירתך פי נקור אלצואן וט̇ללת בסחאבי עליך חתי יג̇וז אולה

ת̇ם אזיל סחאבי חתי תנט̇ר אואכ̇ר נורי ואואילה לא תרא