תפסיר רס"ג, שמות לד

ת̇ם קאל אללה למוסי אנחת לך לוחי ג̇והר כאלאולין אכתב עליהמא אלכלמאת אלתי כאנת עלי אללוחין אלאולין אללד̇ין כסרתהמא

וכן מהיא ללגדאה ואצעד פי אלגדאה אלי ג̇בל סיני וקף לי ת̇ם עלי ראס אלג̇בל

ורג̇ל לא יצעד מעך ולא ירא אנסאן פי שי מן אלג̇בל חתי אלגנם ואלבקר לא ירעון מקאבלה

פנחת מוסי לוחי אלג̇והר כאלאואלין ואדלג̇ באלגדאה וצעד אלי ג̇בל סיני כמא אמרה אללה ואכ̇ד̇ מעה אללוחין

פתג̇לי אללה פי אלגמאם ואוקף נורה מעה ת̇ם ונאדא באסם אללה

ולמא מר אללה בנורה בין ידיה נאדאה אללה אללה אלטאיק אלרחים אלרווף טויל אלמהל כת̇יר אלפצ̇ל ואלאחסאן

חאפט̇ אלפצ̇ל לאלוף גאפר אלד̇נב ואלג̇רם ואלכ̇טיה ויברי ולא יברי ומטאלב בד̇נוב אלאבא מע אלבנין ובני אלבנין ואלת̇ואלת̇ ואלרואבע

פאסרע ומוסי וכ̇ר עלי אלארץ̇ וסג̇ד

וקאל אן וג̇דת חט̇אא ענדך יא רב אד̇ יסיר נורך פי מא ביננא והם קום צעאב אלרקאב פאגפר ד̇נבנא וכ̇טיתנא ואצטפנא

קאל האנא עאהד עהדא חד̇א ג̇מיע קומך אצנע אעג̇ובאת מא לם יכ̇לק מת̇להא פי ג̇מיע אלעאלם פי מא בין אלאמם פינט̇ר ג̇מיע אלקום אלד̇י אנת פי מא בינהם צנע אללה אנה מכ̇וף אלד̇י אנא צאנעה מעך

פאחפט̇ מא אנא אמרך בה אליום האנא טארד מן בין ידיך אלאמוריין ואלכנעאניין ואלחתיין ואלפרזיין ואלחויין ואליבוסיין

ואחד̇ר אן תעהד עהדא לאהל אלבלד אלד̇י אנת דאכ̇ל אליה כילא יכונו והקא פי מא בינך

בל מד̇אבחהם תנקצ̇ו דככהם תכסרו וסואריהם תג̇דעו

ולא תסג̇ד למעבוד אכ̇ר לאן אללה אסמה אלמעאקב והו יקדר עלי אן יעאקב

כילא תעהד עהדא מע אהל אלבלד פיטגון פי תבע מעבודאתהם ויד̇בחון להא וידעו בך פתאכל מן ד̇בחה

ותזוג̇ בניך מן בנאתה פתטגא בנאתה פי תבע מעבודאתהן ותטגי בניך איצ̇א

ומעבודא מסבוכא לא תצנע לך

וחג̇ אלפטיר פאחפט̇ה סבעה איאם כל פטירא כמא אמרתך פי וקת שהר אלפריך לאנך כ̇רג̇ת מן בלד מצר פי שהר אלפריך

וכל אול בטן פהו לי מא ד̇כרתה מן ג̇מיע מאשיתך מן אואיל אלבקר ואלגנם

ובכר אלחמיר פאפדה בשאה ואן לם תפדה פאקפה וג̇מיע בכור בניך אפדהם ולא תחצ̇רו בין ידי פארגא

ופי סתה איאם אכ̇דם ופי אלסאבע אסבת חתי פי וקת אלחרת̇ ואלחצאד תסבת

וחג̇ אלאסבוע תצנעה לך בכור חצאד אלחנטה וחג̇ אלג̇מע פי נהאיה אלסנה

ת̇לת̇ מראר פי אלסנה יחצ̇ר ג̇מיע רג̇אלך בין ידי אלסיד אללה אלאה אסראיל

פאני אקרץ̇ אלאמם מן בין ידיך ואוסע תכ̇מך ולא יתמני אחד ארצ̇ך אד̇א צעדת לתחצ̇ר בין ידי אללה רבך ת̇לת̇ מראר פי אלסנה

לא תד̇בח פסחי עלי כ̇מיר ולא תבית שחומה אלי אלגדאה

ואואיל בכור ארצ̇ך תאתי בהא אלי בית אללה רבך ולא תאכל לחמא מע לבן

ת̇ם קאל למוסי אכתב לך הד̇ה אלכלמאת לאני בסבבהא עהדת מעך עהדא ומע בני אסראיל

פאקאם ת̇ם ענד אללה ארבעין יומא וארבעין לילה לם יאכל טעאמא ולם ישרב מאא וכתב לה עלי אללוחין כלאם אלעהד אלעשרה כלמאת

פלמא נזל מוסי מן אלג̇בל ולוחא אלשהאדה פי ידיה פי נזולה מן אלג̇בל ומוסי לם יעלם אן קד בץ וג̇הה חין כלמה אללה

פראה הרון וסאיר בני אסראיל פאד̇א קד בץ וג̇הה פכ̇אפו אן יתקדמו אליה

ת̇ם דעא בהם מוסי פרג̇ע אליה הרון וג̇מיע אשראף אלג̇מאעה פכלמהם

ובעד ד̇לך תקדם סאיר בני אסראיל פאמרהם בג̇מיע מא קאל לה אללה פי ג̇בל סיני

פלמא פרג מן כלאמהם ג̇על עלי וג̇הה ברקעא

וכאן אד̇א דכ̇ל מוסי בין ידי אללה ליכ̇אטבה ינזע אלברקע אלי כ̇רוג̇ה ת̇ם יכ̇רג̇ ויכלם בג̇מיע מא יומר בה

חתי ינט̇ר ג̇מיעהם וג̇הה אנה קד בץ חתי ירד אלברקע עלי וג̇הה אלי וקת דכ̇ולה ליכ̇אטבה