תפסיר רס"ג, שמות לב

ולמא ראי אלקום אן מוסי קד אבטא אן ינזל מן אלג̇בל תג̇וקו עלי הרון וקאלו לה קם אצנע לנא מעבודא יסיר בין ידינא פאן ד̇לך אלרג̇ל מוסי אלד̇י אצעדנא מן בלד מצר לם נעלם מא כאן מן אמרה

פקאל להם הרון פכו אשנאף אלד̇הב אלתי פי אד̇אן נסאיכם ובניכם ובנאתכם ואתוני

ופכך ג̇מיע אלקום אשנאף אלד̇הב אלתי באד̇אנהם ואתו בהא אלי הרון

פאכ̇ד̇הא מנהם ואמר מן צורהא בקאלב פצנעהא עג̇לא מסבוכא וקאלו הד̇א רבך יא אלאסראיל אלד̇י אצעדך מן בלד מצר

פלמא ראי ד̇לך הרון בנא מד̇בחא בין ידיה ונאדי וקאל ללה חג̇ גדא

ת̇ם אדלג̇ו מן גד פקרבו צואעד וד̇בחו סלאמה וג̇לסו אלקום ליאכלו וישרבו וקאמו לילעבו

פקאל אללה למוסי אמץ̇ אנזל פאן קד אפסד קומך אלד̇י אצעדתהם מן בלד מצר

וזאלו סריעא מן אלטריק אלד̇י אמרתהם בה וצנעו להם עג̇לא מסבוכא פסג̇דו לה וד̇בחו וקאלו הד̇א רבך יא אלאסראיל אלד̇י אצעדך מן בלד מצר

ת̇ם קאל לה קד עלמת אן האולי אלקום הוד̇א הם קום צעאב אלרקאב

ואלאן פאן תרכתני אשתד גצ̇בי עליהם פאפניתהם וצנעת מנך אמה עט̇ימה

פאבתהל מוסי אלי אללה רבה וקאל יא רב לא ישתד גצ̇בך עלי קומך אלד̇י אכ̇רג̇תהם מן בלד מצר בקוה עט̇ימה ויד שדידה

ולא יקולו אלמצריון קאילין בשר אכ̇רג̇הם ליקתלהם פי מא בין אלג̇בל ויפניהם ען וג̇ה אלארץ̇ ארג̇ע מן שדה גצ̇בך ואצפח ען אלבליה לקומך

ואד̇כר לאברהים ואסחק ואסראיל עבידך אלד̇ין אקסמת להם באסמך וקלת אכת̇ר נסלכם ככואכב אלסמא וג̇מיע אלבלד אלד̇י קלת אעטיה לנסלכם ויחוזוה אלי אלדהר

פצפח אללה ען אלבליה אלתי קאל אן יחלהא בקומה

ת̇ם ולי מוסי ונזל מן אלג̇בל ולוחא אלשהאדה פי ידה לוחאן מכתובאן מן ג̇אנביהמא מן דאכ̇ל ומן כ̇ארג̇

ואללוחאן המא צנעה אללה ואלכתאב הו כתאב אללה מחפור עליהמא

פסמע יהושע צות אלקום פי תג̇ליבהם פקאל למוסי צות חרב פי אלעסכר

ת̇ם קאל ליס צות ידל עלי ט̇פר ולא צות ידל עלי הזימה בל צות צ̇וצ̇א אנא סאמע

פלמא קרב מן אלעסכר ראי אלעג̇ל ואלטבול פאשתד גצ̇ב מוסי פטרח אללוחין מן ידיה וכסרהמא תחת אלג̇בל

ת̇ם אכ̇ד̇ אלעג̇ל אלד̇י צנעוה פאחרקה באלנאר וברדה באלמברד אלי אן דק וד̇ראה עלי וג̇ה אלמא וסקא בני אסראיל אבאחה

וקאל מוסי להרון מא צנע בך האולי אלקום אד̇ ג̇לבת עליהם כ̇טיה עט̇ימה

קאל לא ישתד גצ̇ב סידי אנת עארף באלקום אנהם שרירון

פקאלו לי אצנע לנא מעבודא יסיר בין ידינא פאן ד̇לך אלרג̇ל מוסי אלד̇י אצעדנא מן בלד מצר לם נעלם מא כאן מן אמרה

פקלת להם אנט̇רו למן ד̇הב פפכוה ואתוני בה פטרחתה פי אלנאר פכ̇רג הד̇א אלעג̇ל

פלמא ראי מוסי אלקום אנהם מכשופון אד̇ כשף הרון ד̇וי אלשין מן מקאומיהם

ווקף מוסי בבאב אלעסכר פקאל מן ללה יקבל אלי פאג̇תמע אליה ג̇מיע בני לוי

פקאל להם כד̇א קאל אללה אלאה אסראיל יתקלד כל רג̇ל מנכם סיפה עלי ורכה ואמצ̇ו וארג̇עו מן באב אלי באב פי אלעסכר ויקתל כל רג̇ל חתי אכ̇אה וצאחבה וקארבה

פצנע בנו לוי כמא אמרהם מוסי פוקע מן אלקום פי ד̇לך אליום שביה בת̇לת̇ה אלאף רג̇ל

וקאל מוסי אכמלו אליום ואג̇בכם ללה כל רג̇ל חתי באבנה ואכ̇יה ותחל עליכם אליום ברכה

ולמא כאן מן גד קאל מוסי ללקום אנתם אכ̇טאתם כ̇טיה עט̇ימה ואלאן אצעד אלי אללה לעל אסתגפרה ען כ̇טיתכם

ורג̇ע מוסי אלי אללה וקאל יא רב קד אכ̇טא האולי אלקום כ̇טיה כבירה וצנעו להם מעבודא מן ד̇הב

ואלאן אן גפרת כ̇טיתהם ואלא פאמחני מן דיואנך אלד̇י כתבתה פאסתריח

פקאל אללה למוסי אלד̇י אכ̇טא לי אמחוה מן דיואני

ואלאן אמץ̇ סיר אלקום אלי אלמוצ̇ע אלד̇י קלתה לך והוד̇א מלאכי יציר בין ידיהם ופי יום מטאלבתי אטאלבהם בכ̇טיתהם

פצדם אללה מן אלקום עלי מא אצטנעו אלעג̇ל אלד̇י צנעה הרון