תפסיר רס"ג, שמות ב

ת̇ם מצ̇י רג̇ל מן אללוי פתזוג̇ באבנה לוי

פחמלת וולדת אבנא ולמא ראתה חסנא אכ̇פתה ת̇לת̇ה שהור

ולם תטק אן תכ̇פיה זיאדה פאכ̇ד̇ת לה תאבותא מן ברדי וקפרתה באלקפר ואלזפת וצירת פיה אלצבי וצירתה באלדיס עלי שאטי אלניל

ווקפת אכ̇תה מן בעיד לתנט̇ר מה יצנע בה

פנזלת אבנה פרעון לתגתסל פי אלניל וכאן ג̇ואריהא ימשין עלי שאטיה פראת אלתאבות פי וסט אלדיס פמדת ידהא פאכ̇ד̇תה

ופתחתה פראת בצבי יבכי פשפקת עליה וקאלת הד̇א מן אולאד אלעבראניין

קאלת להא אכ̇תה אאמצ̇י ואדעי לך במראה מרצ̇ע מן אלעבראניאת תרצ̇עה לך

קאלת להא אבנת פרעון אמץ̇ פמצ̇ת אלג̇אריה ודעת באם אלצבי

קאלת להא אבנה פרעון הא לך הד̇א אלצבי ארצ̇עיה לי ואנא אעטיך אג̇רתך פאכ̇ד̇ת אלמראה אלצבי וארצ̇עתה

ולמא כבר אלצבי ג̇את בה אלי אבנה פרעון וצאר להא כאבן וסמתה מוסי קאלת לאני נשלתה מן אלמא

וכאן פי תלך אלאיאם אן מוסי כבר וכ̇רג̇ אלי אכ̇ותה ונט̇ר פי נקלהם פאד̇א ברג̇ל מצרי יצ̇רב רג̇לא עבראניא מן אכ̇ותה

פאלתפת ימנה ויסרה פראי אנה ליס אנסאן פצ̇רב אלמצרי פמאת ודפנה פי אלרמל

ת̇ם כ̇רג̇ פי אליום אלת̇אני פאד̇א ברג̇לין עבראניין יתנאצאן פקאל ללט̇אלם לם תצ̇רב צאחבך

פקאל מן צירך רג̇לא רייסא וחאכמא עלינא אתריד אן תקתלני כמא קתלת אלמצרי פפזע מוסי וקאל אד̇ן קד ערף אלאמר

ולמא סמע פרעון בהד̇א אלכ̇בר טלב אן יקתל מוסי פהרב מוסי מן בין ידיה וצאר אלי בלד מדין וג̇לס עלי ביר מא

וכאן לאמאם מדין סבע בנאת פג̇את ודלת ומלאת אלאחואץ̇ לתסקי גנם אביהן

ולמא ג̇או אלרעאה פטרדוהן קאם מוסי פאגאת̇הן וסקי גנמהן

ולמא ג̇ין אלי רעואל אביהן קאל מא באלכן אסרעתן באלמג̇י אליום

קלן רג̇ל מצרי כ̇לצנא מן יד אלרעאה ואיצ̇א דלא לנא וסקי אלגנם

קאל להן ואין הו לם תרכתן אלרג̇ל אדעין בה יאכל טעאמא

פלמא אמען מוסי פי אלמקאם ענד אלרג̇ל זוג̇ה בצפורה אבנתה

פולדת אבנא וסמאה גרשם לאנה קאל צרת גריבא פי בלד אלגרבה

וכאן איצ̇א פי תלך אלאיאם אלטוילה ואנברץ מאת מלך מצר פתנהדו בנו אסראיל מן כ̇דמתהם וצרכ̇ו פצעד שהיקהם אלי אללה מן אלכ̇דמה

פסמע אללה שהיקהם וד̇כר עהדה אלד̇י מע אברהים ואסחק ויעקוב

ונט̇ר אללה אלי בני אסראיל ורחמהם