תפסיר רס"ג, שמות כט

והד̇א אלאמר אלד̇י תצנעה להם לתקדסהם ויאמו לי כ̇ד̇ רת̇א מן אלבקר וכבשין צחיחין

וכ̇בז פטיר וג̇ראדק פטיר מלת̇ות̇ה בדהן ורקאק פטיר ממסוחה בדהן מן סמיד אלחנטה תצנעהא

ואג̇עלהא פי סלה ואחדה וקדמהא פיהא מע אלרת̇ ואלכבשין

וקדם הרון ובניה אלי באב כ̇בא אלמחצ̇ר ואגסלהם באלמא

וכ̇ד̇ אלת̇יאב ואלבס הרון אכ̇אך אלתוניה ואלממטר ואלצדרה ואלבדנה ואשדדה בשפשג̇הא

וציר אלעמאמה עלי ראסה ואג̇על תאג̇ אלקדס דון אלעמאמה

וכ̇ד̇ מן דהן אלמסח וצבה עלי ראסה ואמסחה בה

ת̇ם קדם בניה ואלבסהם תואניא

ואשדדהם בזנאניר הרון ובניה ואלבסהם קאלניס פתציר להם אמאמה רסם אלדהר ואכמל ואג̇ב הרון וואג̇ב בניה

ת̇ם קדם אלרת̇ בין ידי כ̇בא אלמחצ̇ר ויסנד הרון ובנוה אידיהם עלי ראסה

ואד̇בח אלרת̇ בין ידי אללה ענד באב כ̇בא אלמחצ̇ר

וכ̇ד̇ מן דמה ואג̇עלה עלי ארכאן אלמד̇בח באצבעך וצב באקי אלדם עלי אסאס אלמד̇בח

וכ̇ד̇ ג̇מיע אלשחם אלמגטי אלג̇וף וזיאדה אלכבד ואלכליתין ואלשחם אלד̇י עליהמא וקתר ד̇לך עלי אלמד̇בח

ולחם אלרת̇ וג̇לדה ופרת̇ה תחרקה באלנאר כ̇ארג̇ אלעסכר לאנה ד̇כוה

ת̇ם קדם אחד אלכבשין ויסנד הרון ובנוה אידיהם עלי ראסה

ואד̇בחה וכ̇ד̇ מן דמה ורשה עלי אלמד̇בח מסתדירא

ועצ̇ה לאעצ̇איה ואגסל ג̇ופה ואכארעה ואצ̇פהא אלי אעצ̇איה וראסה

וקתרה עלי אלמד̇בח לאנה צעידה ללה מרצ̇י מקבול קרבאן ללה

ת̇ם קדם אלכבש אלת̇אני ויסנד הרון ובנוה אידיהם עלי ראסה

ואד̇בחה וכ̇ד̇ מן דמה ואג̇על עלי שחמה אד̇ן הרון אלימני ועלי שחמאת אד̇אן בניה אלאיאמן ועלי אבהאם אידיהם אלאיאמן ואבהאם ארג̇להם אלאיאמן ורש באקיה עלי אלמד̇בח מסתדירא

ת̇ם כ̇ד̇ מן אלדם אלד̇י עלי אלמד̇בח ומן דהן אלמסח ואנצ̇ח עלי הרון ות̇יאבה ועלי בניה ות̇יאב בניה מעה פיתקדס הו ות̇יאבה ובנוה ות̇יאב בניה מעה

וכ̇ד̇ מן אלכבש אלת̇רב ואלאליה וג̇מיע אלשחם אלמגטי אלג̇וף וזיאדה אלכבד ואלכליתין ואלשחם אלד̇י עליהמא ואלסאק אלאימן לאנה כבש אלכמאל

ורגיפא ואחדא מן כל נוע מן אלכ̇בז וג̇רדקה ואחדה ממסוחה בדהן ורקאקה ואחדה מן סלה אלפטיר אלתי בין ידי אללה

וציר אלג̇מיע עלי כפי הרון ועלי כפי בניה וחרך ד̇לך תחריכא בין ידי אללה

ת̇ם כ̇ד̇ה מן אידיהם וקתרה עלי אלמד̇בח פוק אלצעידה מקבול מרצ̇י בין ידי אללה קרבאן הו ללה

ת̇ם כ̇ד̇ אלקץ מן כבש אלכמאל אלד̇י להרון וחרכה תחריכא בין ידי אללה ויכון לך נציבא

וקדס קץ אלתחריך אלד̇י חרך וסאק אלרפיעה אלתי רפע מן כבש אלכמאל אלד̇י להרון ובניה

פיצירא להרון ובניה רסם אלדהר מן בני אסראיל כמא אנהמא רפיעה כד̇אך יכונא רפיעה מן ענד בני אסראיל מן ד̇באיח סלאמתהם המא רפיעה ללה

ות̇יאב אלקדס אלתי להרון תכון לבניה מן בעדה ימסחון פיהא ויכמלון בהא ואג̇בהם

סבעה איאם ילבסהא אלאמאם בעדה מן בניה פיצלח אן ידכ̇ל אלי כ̇בא אלמחצ̇ר אן יכ̇דם פי אלקדס

וכבש אלכמאל תאכ̇ד̇ ותנצ̇ג̇ לחמה פי מכאן מקדס

ויאכל הרון ובנוה לחם אלכבש מע אלכ̇בז אלד̇י פי אלסל ענד באב כ̇בא אלמחצ̇ר

ויאכלון ד̇לך אלד̇ין אסתגפר ענהם לאכמאל ואג̇בהם ותקדיסהם ואי אג̇נבי לא יאכל מנה אד̇ הו קדס

ואן תבקי מן לחם אלכמאל ומן אלכ̇בז אלי אלגדאה פאחרק אלפאצ̇ל לא יוכל אד̇ הו קדס

ואצנע להרון ובניה כד̇א כג̇מיע מא אמרתך סבעה איאם תכמל ואג̇בהם

ורת̇ ללד̇כוה תצנעה כל יום ללגפראן פתד̇כי אלמד̇בח ותסתגפר ענה ותמסחה ותקדסה

סבעה איאם תסתגפר עלי אלמד̇בח פתקדסה ויציר מן כ̇ואץ אלאקדאס כל מן דנא בה תקדס

והד̇א מא תקרבה עלי אלמד̇בח חמלין אבני סנה פי כל יום דאימא

ואלחמל אלואחד תצנע באלגדאה ואלאכ̇ר בין אלגרובין

ועשר מן אלסמיד מלת̇ות̇ ברבע קסט מן דהן זיתון מדקוק ומזאג̇ה רבע קסט כ̇מר מע כל חמל

ואד̇א קרבת אלת̇אני בין אלגרובין פכהד̇ה אלגדאה ומזאג̇הא תצנע בה פיציר מקבולא מרצ̇יא קרבאנא ללה

צעידה דאימה לאג̇יאלכם ענד באב כ̇בא אלמחצ̇ר בין ידי אללה אלד̇י אחצ̇רך ואכ̇אטבך ת̇ם

ואחצ̇ר הנאך לבני אסראיל ויתקדס בוקארי

ואקדס בה כ̇בא אלמחצ̇ר ואלמד̇בח ואקדס הרון ובניה ליאמו לי

ואסכן נורי פי מא בין בני אסראיל ואכון להם אלאהא

ויעלמון אנני אללה רבהם אלד̇י אכ̇רג̇תהם מן ארץ̇ מצר לאסכן נורי פי מא בינהם אנא אללה אפי בד̇לך