תפסיר רס"ג, שמות כח

ואנת איצ̇א פקרב אליך הרון אכ̇אך ובניה מעה מן בין ג̇מיע בני אסראיל ליאמו לי הרון ונדב ואביהוא ואלעזר ואיתמר בניה

ואצנע ת̇יאב אלקדס להרון אכ̇יך לכראמה ופכ̇ר

ואנת פכלם כל חכים קלב אכמלת פיה רוח אלחכמה אן יצנעו ת̇יאב הרון לתקדיסה ליאם לי

והד̇ה אלת̇יאב אלתי יצנעוהא בדנה וצדרה וממטרא ותוניה מושאה ועמאמה וזנארא ויצנעו ת̇יאב אלקדס להרון אכ̇יך ובניה ליאמו לי

והם יאכ̇ד̇ו אלד̇הב ואלאסמאנג̇ון ואלארג̇ואן וצבג אלקרמז ואלעשר

פיצנעו אלצדרה מן ד̇הב ואסמאנג̇ון וארג̇ואן וצבג קרמז ועשר משזור צנעה חאד̇ק

וג̇יבאן מכ̇יטאן תכון להא תכ̇יט עלי טרפיהא

ושפשג̇ אלצדרה אלתי עליהא כצנעתהא יכון מת̇להא מן ד̇הב ואסמאנג̇ון וארג̇ואן וצבג קרמז ועשר משזור

וכ̇ד̇ חג̇רי בלור ואנקש עליהמא אסמא בני אסראיל

סתה מן אסמאיהם עלי אלחג̇ר אלואחד ואלאסמא אלסתה אלבאקיה עלי אלחג̇ר אלת̇אני כתאלידהם

צנעה כ̇ארט אלג̇והר כנקש אלכ̇אתם תנקש עלי אלחג̇רין אסמא בני אסראיל מחיטה מעינה מן ד̇הב תצנעהא

וציר אלחג̇רין פי ג̇יבי אלצדרה חג̇ארה ד̇כר לבני אסראיל ויחמל הרון אסמאהם בין ידי אללה עלי כתפיה ד̇כרא

ואצנע עיונא מן ד̇הב

וסלסלתין מן ד̇הב כ̇אלץ מעתדלתין תצנעהמא צנעה אלצ̇פר ועלק אלסלסלתין אלמצ̇פורתין עלי אלעיון

ואצנע בדנה מהיאה צנעה חאד̇ק כצנעה אלצדרה מן ד̇הב ואסמאנג̇ון וארג̇ואן וצבג קרמז ועשר משזור תצנעהא

ותכון מרבעה מצ̇אעפה טולהא שבר וערצ̇הא שבר

ואנט̇ם פיהא נט̇אם ג̇והר ארבעה סטור מן אלג̇והר אלסטר אלאול יאקות אחמר וזמרד ואצפר

ואלסטר אלת̇אני כחלי ומהא ובהרמאן

ואלסטר אלת̇לאת̇ ג̇זע וסבג̇ ופירזוג̇

ואלסטר אלראבע אזרק ובלור ויסף תכון מעינה בד̇הב פי נט̇אמהא

ותכן עלי אלחג̇ארה אסמא בני אסראיל אד̇ הי את̇ני עשר נט̇יר אסמאיהם כנקש אלכ̇אתם אסם כל ואחד עלי חג̇רה תכון לאת̇ני עשר סבטא

ואצנע ללבדנה סלאסל מעתדלה צנעה צ̇פר מן ד̇הב כ̇אלץ

ואצנע להא חלקתין מן ד̇הב ואג̇עלהמא פי טרפיהא

ועלק אלצ̇פירתין אלד̇הב עלי אלחלקתין אלתי פי טרפי אלבדנה

וטרפא אלצ̇פירתין אלאכ̇רתין תעלקהמא עלי אלעיון פתציר עלי ג̇יבי אלצדרה מן מקדמהא

ואצנע איצ̇א חלקתין מן ד̇הב ואג̇עלהמא פי טרפי אלבדנה פי חאשיתהא אלתי אלי ג̇אנב אלצדרה מן דאכ̇ל

ואיצ̇א אצנע חלקתין מן ד̇הב ואג̇עלהמא באזא ג̇יבי אלצדרה מן אספל פי מקדמהא אמאם תאליפהא פוק שפשג̇הא

ויחבכו אלבדנה מן חלקהא אלי חלק אלצדרה בסלך מן אסמאנג̇ון חתי תציר פוק שפשג̇הא ולא תזול ענהא

ויחמל הרון אסמא בני אסראיל פי אלבדנה אלמהיאה עלי קלבה ענד דכ̇ולה אלי אלקדס ד̇כרא בין ידי אללה דאימא

ותג̇על עלי אלבדנה אלמהיאה אלאנואר ואלצחאיח ותכונו עלי צדר הרון פי דכ̇ולה בין ידי אללה ויחמל הרון היאה בני אסראיל עלי קלבה בין ידי אללה דאימא

ואצנע ממטר אלצדרה צנעה חאיך ג̇מלתה מן אסמאנג̇ון

ויכון פוה אלד̇י [הו] ראסה מן וסטה וחאשיה תחיט בפיה מסתדירא צנעה חאיך כפם אלדרע תציר לה לילא יתכ̇רק

ואצנע פי ד̇ילה רמאמין מן אסמאנג̇ון וארג̇ואן וצבג קרמז פי ד̇ילה מסתדירא וג̇לאג̇ל מן ד̇הב פי מא בינהא מסתדירא

ג̇לג̇ל מן ד̇הב ורמאנה ג̇לג̇ל מן ד̇הב ורמאנה פי ד̇יל אלממטר מסתדירא

ויכון עלי הרון אד̇א כ̇דם ויסמע צותה פי דכ̇ולה אלי אלקדס בין ידי אללה ופי כ̇רוג̇ה ולא ימות

ואצנע עצאבה מן ד̇הב כ̇אלץ ואנקש עליהא כנקש אלכ̇אתם קדסא ללה

ושדהא בסלך מן אסמאנג̇ון ותכון דון אלעמאמה מן מקדמהא

ותכון עלי ג̇בהה הרון אד̇א אסתגפר ען ד̇נוב אלאקדאס אלתי יקדסהא בנו אסריל לג̇מיע עטאיאהם ואקדאסהם פתכון עלי ג̇בהתה דאימא לירצ̇א ענהם בין ידי אללה

ווש אלתוניה אלעשר ואצנע אלעמאמה מן עשר ואלזנאר תצנעה צנעה ראקם

ולבני הרון תצנע תואניא ואצנע להם זנאניר וקלאנס תצנעהא להם לכראמה ופכ̇ר

ואלבסהא הרון אכ̇אך ובניה מעה ואמסחהם ואכמל ואג̇בהם וקדסהם פיאמו לי

ואצנע להם סראויל מן עשר לתגטי מן אבדאנהם אלסואה מן אלחקוין אלי אלרכבתין תכון

ותכון עלי הרון ובניה פי דכ̇ולהם אלי כ̇בא אלמחצ̇ר ופי תקדמהם אלי אלמד̇בח ליכ̇דמו פי אלקדס ולא יחמלו וזרא פיהלכו רסם אלדהר לה ולנסלה מן בעדה