תפסיר רס"ג, שמות ל

ואצנע מד̇בחא לתבכ̇יר אלבכ̇ור מן כ̇שב אלסנט תצנעה

ד̇ראע טולה וד̇ראע ערצ̇ה מרבעא יכון וד̇ראעאן סמכה מנה ארכאנה

וגשה בד̇הב כ̇אלץ סטחה וחיטאנה מסתדירא וארכאנה ואצנע לה זיג̇א מן ד̇הב מסתדירא

וחלקתאן מן ד̇הב תצנעהמא לה מן דון זיג̇ה פי ג̇התיה כד̇אך עלי גאנביה תכון מכאנא ללדהוק ליחמל בהא

ותצנע אלדהוק מן כ̇שב אלסנט וגשהא בד̇הב

ואג̇עלה בין ידי אלסג̇ף אלד̇י עלי צנדוק אלשהאדה בין ידי אלגשא אלד̇י אחצ̇רך הנאך

ויבכ̇ר עליה הרון מן בכ̇ור אלצמוג פי כל גדאה אד̇א אצלח אלסרג̇ בכ̇ר בה

כד̇לך אד̇א אסרג̇ אלסרג̇ בין אלגרובין בכ̇ר בה בכ̇ורא דאימא בין ידי אללה לאג̇יאלכם

לא תבכ̇רו עליה בכ̇ורא גריבא ולא צעידה ולא הדיה ומזאג̇א לא תרשו עליה

ויסתגפר הרון ענד ארכאנה מרה ואחדה פי אלסנה מן דם ד̇כוה יום אלגרפאן מרה פי אלסנה יסתגפר ענה לאג̇יאלכם מן כ̇ואץ אלאקדאס ללה

ת̇ם כלם אללה מוסי תכלימא

אד̇א חצרת ג̇מלה בני אסראיל עלי עדדהם פליעט כל רג̇ל פדא נפסה ללה אד̇א אחציתהם ולא יחל בהם ובא ענד ד̇לך

והד̇א יעטי כל מן ג̇אז עליה אלעדד נצף מת̇קאל במת̇קאל אלקדס עשרון דאנקא אלמת̇קאל נצפה רפיעה ללה

כל מן ג̇אז עלי אלעדד והו אבן עשרין סנה פצאעדא יעטי רפיעה ללה

אלמוסר לא יכת̇ר ואלפקיר לא יקלל מן נצף מת̇קאל פאעטו רפיעה ללה וכפרו ען אנפסכם

וכ̇ד̇ פצ̇ה אלגפראן מן בני אסראיל ואצרפה פי כ̇דמה כ̇בא אלמחצ̇ר ויכון לבני אסראיל ד̇כרא בין ידי אללה ליסתגפר ען אנפסכם

וכלם אללה מוסי תכלימא

אצנע חוצ̇א מן נחאס ומקעדה מן נחאס ללגסל ואג̇עלה בין כ̇בא אלמחצ̇ר ואלמד̇בח ואג̇על פיה מאא

ויגסל הרון ובנוה מנה אידיהם וארג̇להם

פי דכ̇ולהם אלי כ̇בא אלמחצ̇ר יגתסלו באלמא ולא יהלכו ופי תקדמהם אלי אלמד̇בח ליכ̇דמו ויקתרו קרבאנא ללה

יגסלון איצ̇א אידיהם וארג̇להם ולא יהלכו ויכון להם רסם אלדהר לה ולבניה לאג̇יאלהם

ת̇ם כלם אללה מוסי תכלימא

ואנת פכ̇ד̇ לך מן רוס אלטיב מן אלמסך אלכ̇אלץ כ̇מס מאיה מת̇קאל ומן עוד אלטיב מת̇ל נצפה מאיתין וכ̇מסין מת̇קאלא ומן קצבה ד̇רירה מאיתין וכ̇מסין איצ̇א

ומן אלקסט כ̇מס מאיה מת̇קאל במת̇קאל אלקדס ומן דהן אלזיתון מל קסט

ואצנע ד̇לך דהן מסח אלקדס עטרא מעטרא צנעה עטאר בד̇אך יכון דהן מסח אלקדס

ואמסח מנה כ̇בא אלמחצ̇ר וצנדוק אלשהאדה

ואלמאידה וג̇מיע אניתהא ואלמנארה ואניתהא ומד̇בח אלבכ̇ור

ומד̇בח אלצעידה וג̇מיע אניתה ואלחוץ̇ ומקעדה

וקדסהם יכונו מן כ̇ואץ אלאקדאס כל מן דנא בהם תקדס

והרון ובנוה תמסחהם וקדסהם ליאמו לי

ומר בני אסראיל קאילא יכון הד̇א דהן מסח אלקדס לי לאג̇יאלכם

עלי בדן אנסאן לא ידהן מנה ובהיאתה לא תצנעו מת̇לה וכמא הו קדס כד̇אך קדסא יכון לכם

אי אנסאן תעטר במת̇לה או ג̇על מנה עלי אג̇נבי ינקטע מן קומה

וקאל אללה למוסי כ̇ד̇ לך אצמאגא מנהא מצטכי ולאדין ולבנא אלצמוג ולבאן ד̇כי ג̇ז בג̇ז יכון

ותצנעהא בכ̇ור עטר צנעה עטאר מטריא טאהרא מקדסא

ותסחק מנהא דקיקא ותג̇על מנהא חד̇א אלשהאדה פי כ̇בא אלמחצ̇ר חית̇ אחצ̇רך ת̇ם כ̇ואץ אלאקדאס יכון לכם

ובכ̇ור אלד̇י תצנעוה בהיאתה לא תצנעו לכם קדסא יכון ללה

אי אנסאן צנע במת̇להא ליתבכ̇ר בה פינקטע מן קומה