תפסיר רס"ג, שמות כד

ת̇ם קאל למוסי אצעד אלי אללה אנת והרון ונדב ואביהוא וסבעון מן שיוך̇ בני אסראיל ואסג̇דו מן בעיד

ת̇ם יתקדם מוסי וחדה אלי אללה והם לא יתקדמו ואלקום לא יצעדו מעה

ת̇ם ג̇א מוסי וקץ עלי אלקום ג̇מיע כלאם אללה וג̇מיע אלאחכאם פאג̇אבה ג̇מיע אלקום בצות ואחד וקאלו ג̇מיע אלאמור אלתי אמר אללה נצנעהא

פכתב מוסי ג̇מיע כלאם אללה ואדלג̇ באלגדאה ובנא מד̇בחא תחת אלג̇בל ונצב את̇נתי עשרה דכה באזא את̇ני עשר אסבאט אסראיל

ובעת̇ בבכור בני אסריל פקרבו צואעד וד̇בחו ד̇באיח סלאמה ללה מן אלבקר

פאכ̇ד̇ מוסי בעץ̇ אלדם וג̇עלה פי אג̇אג̇ין ובאקיה רשה עלי אלמד̇בח

ת̇ם אכ̇ד̇ כתאב אלעהד פקראה עלי אלקום וקאלו ג̇מיע מא אמר אללה בה נקבלה ונצנעה

פאכ̇ד̇ מוסי אלדם ורשה עלי אלקום וקאל הוד̇א דם אלעהד אלד̇י עהד אללה מעכם עלי ג̇מיע הד̇ה אלכלמאת

ת̇ם צעד מוסי והרון ונדב ואביהוא וסבעון מן שיוך̇ אסראיל

פנט̇רו נור אללה אסראיל ומן דונה כצנעה ביאץ̇ אלמהא וכד̇את אלסמא פי אלנקא

ועלי נקבא בני אסראיל לם יבעת̇ באפה פנט̇רו נור אללה ועאשו פאכלו ושרבו

ת̇ם קאל אללה למוסי אצעד אלי אלי אלג̇בל וקם ת̇ם אעטיך לוחי אלג̇והר ואלשראיע ואלוצאיא אלתי כתבתהא לאדלהם בהא

פקאם מוסי ויהושע כ̇אדמה וצעד מוסי אלי ג̇בל אללה

וקאל ללשיוך̇ אג̇לסו לנא ההנא אלי אן נרג̇ע אליכם והוד̇א הרון וחור מעכם מן לה אמר יתקדם אליהמא

ולמא צעד מוסי אלי אלג̇בל גטא אלגמאם אלג̇בל

וסכן נור אללה עלי אלג̇בל וגטאה אלגמאם סתה איאם ת̇ם דעא במוסי פי אליום אלסאבע מן וסט אלגמאם

וכאן ריא נור אללה כנאר אכלה פי ראס אלג̇בל בחצ̇רה בני אסראיל

פדכ̇ל מוסי פי וסט אלגמאם אד̇ צעד אלי אלג̇בל ואקאם פיה ארבעין יומא וארבעין לילה