תפסיר רס"ג, שמות כה

וכלם אללה מוסי תכלימא

מר בני אסראיל אן יאכ̇ד̇ו לי רפיעה מן ענד כל רג̇ל תסכ̇וה נפסה תאכ̇ד̇ו רפיעתי

והד̇ה אלרפיעה אלתי תאכ̇ד̇והא מנהם ד̇הב ופצ̇ה ונחאס

ואסמאנג̇ון וארג̇ואן וצבג קרמז ועשר ומרעז

וג̇לוד כבאש אדים וג̇לוד דארש וכ̇שב אלסנט

דהן ללאצ̇אה ואטיאב לדהן אלמסח ולבכ̇ור אלצמוג

וחג̇ארה אלבלור וחג̇ארה אלנט̇אם ללצדרה וללבדנה

פיצנעו לי מן ג̇מיע ד̇לך מקדסא אסכן נורי פי מא בינהם

כג̇מיע מא אנא מריך מן שכל אלמסכן ושכל ג̇מיע אניתה כד̇אך תצנעו

ויצנעו צנדוקא מן כ̇שב אלסנט ד̇ראעאן ונצף טולה וד̇ראע ונצף ערצ̇ה וד̇ראע ונצף סמכה

וגשה בד̇הב כ̇אלץ מן דאכ̇ל ומן כ̇ארג̇ ואצנע עליה זיג̇א מן ד̇הב מסתדירא

וצג לה ארבע חלק מן ד̇הב ואג̇עלהא עלי ארבע ג̇האתה חלקתין פי ג̇אנבה אלואחד וחלקתין פי ג̇אנבה אלת̇אני

ואצנע דהוקא מן כ̇שב אלסנט וגשהא בד̇הב

ואדכ̇ל אלדהוק פי אלחלק עלי ג̇אנבי אלצנדוק ליחמל בהא

ותקים אלדהוק פי חלק אלצנדוק לא תזול מנה

ואג̇על פי אלצנדוק אלשהאדה אלתי אעטיכהא

ואצנע גשאא מן ד̇הב כ̇אלץ ד̇ראעאן ונצף טולה וד̇ראע ונצף ערצ̇ה

ואצנע כרובין מן ד̇הב מצמתין תצנעהמא מן טרפי אלגשא

ואצנע כרובא ואחדא מן הד̇א אלטרף וכרובא ואחדא מן הד̇א אלטרף מן נפס אלגשא תצנע אלכרובין מן טרפיה

ויכון אלכרובאן באסטין אג̇נחתהמא אלי פוק ומט̇ללין בהא עלי אלגשא ווג̇וההמא אלואחד אלי אלאכ̇ר ואלי אלגשא תכון וג̇וההמא

ואג̇על אלגשא עלי אלצנדוק מן פוק בעד מא תג̇על פי אלצנדוק אלשהאדה אלתי אעטיכהא

פאחצ̇רך ת̇ם ואכ̇אטבך מן פוק אלגשא אלד̇י עלי צנדוק אלשהאדה מן בין אלכרובין בג̇מיע מא אמרך אלי בני אסראיל

ואצנע מאידה מן כ̇שב אלסנט ד̇ראעאן טולהא וד̇ראע ערצ̇הא וד̇ראע ונצף סמכהא

וגשהא בד̇הב כ̇אלץ ואצנע להא זיג̇א מן ד̇הב מסתדירא

ואצנע להא חאפה מקדאר קבצ̇ה מסתדירא ואצנע זיג̇א מן ד̇הב לחאפתהא מסתדירא

ואצנע להא ארבע חלק מן ד̇הב ואגעל אלחלק פי אלארבע זואיא אלתי באזא ארבע ארג̇להא

אמאם אלחאפה תכון אלחלק מכאנא ללדהוק לתחמל בהא

ואצנע אלדהוק מן כ̇שב אלסנט וגשהא בד̇הב לתחמל בהא אלמאידה

ואצנע קצאעהא ודרוג̇הא ומדאהנהא ומלאעקהא אלתי תגטא בהא מן ד̇הב כ̇אלץ תצנעהא

ואג̇על עלי אלמאידה כ̇בזא מוג̇הא בין ידי דאימא

ואצנע מנארה מן ד̇הב כ̇אלץ מצמתה תצנעהא וארג̇להא וקצבתהא וג̇אמאתהא ותפאפיחהא וסואסנהא מנהא תכון

וסת קצבאת כ̇ארג̇את מן ג̇אנביהא ת̇לת̇ קצבאת מן ג̇אנבהא אלואחד ות̇לת̇ קצבאת מן ג̇אנבהא אלת̇אני

ת̇לת̇ ג̇אמאת מלוזאת פי כל קצבה תפאחה וסוסנה כד̇אך ללסת אלקצבאת אלכ̇ארג̇את מנהא

ופי אלמנארה ארבע ג̇אמאת מלוזאת ותפאפיחהא וסואסנהא

ותפאחה תחת כל קצבתין מנהא כד̇אך ללסת אלקצבאת אלכ̇ארג̇את מן אלמנארה

תפאפיחהא וקצבאתהא מנהא תכון כלהא מצמתה ואחדה מן ד̇הב כ̇אלץ

ואצנע להא סבעה סרג̇ פאד̇א אסרג̇ סרג̇הא תצ̇י אלי ג̇הה וג̇ההא

כלבאתהא ומג̇אמראתהא מן ד̇הב כ̇אלץ

בדרה מן ד̇הב כ̇אלץ יצנעהא וג̇מיע הד̇ה אלאניה

ואנט̇ר ד̇לך ואעמל בשכלה אלד̇י אנת מראה פי אלג̇בל