תפסיר רס"ג, שמות כג

לא תקבל כ̇ברא זורא ולא תכ̇אלטן ידך מע אלט̇אלם פתכון לה שאהד ט̇לם

ולא תכן פי תבע כת̇יר לשר ולא תגיב פי כ̇צומה לתמילהא בל ורא אלאכת̇ר פמל

ולא תחאב אלפקיר פי כ̇צומתה

ואד̇א פאג̇ית ת̇ור עדוך או חמארה צ̇אלא פארדדה עליה

ואד̇א ראית חמאר שאניך ראבצ̇א תחת חמלה פאנתה ען תרכה בל חטא תחטה מעה

לא תמל חכם מסכינך פי כ̇צומתה

ומן כלאם אלבאטל פאבעד ואלברי ואלזכי לא תקתלהמא פאני לא אזכי ט̇אלמא

ולא תאכ̇ד̇ רשוה פאן אלרשוה תעמי אלבצרא ויזיף אלאמור אלעאדלה

ולא תצ̇גט אלגריב לאנכם עארפון בנפס אלגריב אד̇ טאלמא כנתם גרבא פי בלד מצר

סת סנין אזרע ארצ̇ך ואג̇מע גלתהא

ופי אלסאבעה תסיבהא ותד̇רהא יאכל מנהא מסאכן קומך ופצ̇להא יאכלה חיואן אלצחרא כד̇אך תצנע בכרמך וזיתונך

סתה איאם אעמל אעמאלך פיהא ופי אליום אלסאבע תסבת לכי יסתריח ת̇ורך וחמארך ויקר אבן אמתך ואלגריב ענדך

ובג̇מיע מא קלתה לכם אחפט̇ו ואסם אלמעבודאת אלאכ̇ר לא תד̇כרוה ולא יסמע מן פיך

ת̇לת̇ מראת תחג̇ לי פי אלסנה

חג̇ אלפטיר פאחפט̇ה סבעה איאם תאכל פטירא כמא אמרתך פי וקת שהר אלפריך לאנך פיה כ̇רג̇ת מן מצר ולא תחצ̇רו בין ידי פרגא

וחג̇ אלחצאד בכור עמלך אלד̇י תזרעה פי אלצחרא וחג̇ אלג̇מע ענד כ̇רוג̇ אלסנה וג̇מעך אעמאלך מן אלצחרא

ת̇לת̇ מראת פי כל סנה יחצ̇ר ג̇מיע רג̇אלך בין ידי אלסיד אללה

ולא תד̇בח פסחי עלי כ̇מיר ולא תבית שחום חג̇י אלי אלגדאה

ואואיל בכור ארצ̇ך תאתי בהא אלי בית אללה רבך ולא תאכל לחמא בלבן

האנא באעת̇ במלאך בין ידיך יחפט̇ך פי אלטריק ויאתי בך אלי אלמוצ̇ע אלד̇י אצלחתה לך

פאחד̇רה ואקבל אמרה ולא תכ̇אלפה פאנה לא יצפח ג̇רמכם ועלי אן אסמי מעה

פאנך אן קבלת אמרה וצנעת ג̇מיע מא אקולה עאדית אעדאך ואצ̇ררת מצ̇אריך

ואד̇א סאר מלאכי בין ידיך אדכ̇לך אלי אלאמוריין ואלכנעאניין ואלחתיין ואלפרזיין ואלחויין ואליבוסיין ואג̇חדתהם

לא תסג̇ד למעבודאתהם ולא תעבדהא ולא תעמל כאעמאלהם בל אהדמהא הדמא וכסר מד̇אבחהם תכסירא

ואעבדו אללה רבכם יבארך פי טעאמך ופי שראבך ויזיל אלאמראץ̇ ענך

לא תכון מת̇כל ועאקר פיך ואחצא איאמך אכמלהא

ואבעת̇ בהיבתי בין ידיך ואהים ג̇מיע אלקום אלד̇ין תציר אליהם ואג̇על ג̇מיע אעדאך בין ידיך מסתדברין

ואבעת̇ באלעאהה בין ידיך פתטרד אלחויין ואלכנעאניין ואלחתיין מן בין ידיך

לא אטרדהם מן בין ידיך פי סנה ואחדה כילא יציר אלבלד וחשא פיכת̇ר עליך חיואן אלצחרא

לכן קלילא קלילא אטרדהם מן בין ידיך אלי אן תנמו פתחוז אלארץ̇

פאג̇על תכ̇מך מן בחר אלקלזם אלי בחר אלפלסטין ומן אלבר אלי אלפראת באן אסלם פי אידיכם סכאן אלבלד ותטרדהם מן בין ידיך

לא תעהד מעהם ולא מע מעבודאתהם עהדא

ולא יקימו פי בלדך כילא יכטיוך לי באן תעבד מעבודאתהם פיכון לך והקא