תפסיר רס"ג, שמות כ

ת̇ם כלמהם אללה בג̇מיע הד̇א אלכלאם קאילא

אנא אללה רבך אלד̇י אכ̇רג̇תך מן בלד מצר מן בית אלעבודיה

לא יכון לך מעבוד אכ̇ר מן דוני

לא תצנע לך פסלא ולא שבהא ממא פי אלסמא פי אלעלו וממא פי אלארץ̇ פי אלספלי וממא פי אלמא תחת אלארץ̇

לא תסג̇ד להם ולא תעבדהם לאני אללה רבך אלטאיק אלגיור אלמטאלב בד̇נוב אלאבא מע אלבנין ואלת̇ואלת̇ ואלרואבע לשאניי

וצאנע אלאחסאן לאלוף למחבי וחאפט̇י וצאיאי

לא תחלף באסם אללה רבך באטלא לאן אללה לא יברי מן יחלף באסמה באטלא

אד̇כר יום אלסבת וקדסה

סתה איאם תעמל ותצנע ג̇מיע צנאיעך

ואליום אלסאבע סבת תסבת פיה ללה רבך לא תצנע שיא מן אלצנאיע אנת ואבנך ואבנתך ועבדך ואמתך ובהאימך וצ̇יפך אלד̇י פי מחאלך

לאן אללה כ̇לק פי סתה איאם אלסמא ואלארץ̇ ואלבחר וג̇מיע מא פיהא ואראחהא פי אליום אלסאבע ולד̇לך בארך אללה פי אליום אלסאבע וקדסה

אכרם אבאך ואמך לכי יטול עמרך פי אלבלד אלד̇י אללה רבך מעטיה לך

לא תקתל אלנפס לא תזן לא תסרק לא תשהד עלי אכ̇יך שהאדה באטלה

לא תתמן מנזל צאחבך לא תתמן זוג̇תה ועבדה ואמתה ות̇ורה וחמארה וג̇מיע מא לה

וג̇מיע אלקום ינט̇רון אלאצואת ואלפלאיל וצות אלבוק ואלג̇בל מתדכ̇נא פלמא ראי אלקום ד̇לך זעג̇ו ווקפו מן בעיד

וקאלו למוסי כלמנא אנת נסמע מנך ולא יכלמנא אללה כילא נהלך

קאל מוסי ללקום לא תכ̇אפו פאנה לכי ימתחנכם תג̇לי לכם אללה ולכי תכון תקותה פי קלובכם לילא תכ̇טאו

פוקף אלקום מן בעיד ותקדם מוסי אלי אלצ̇באב אלד̇י ת̇ם נור אללה

פקאל אללה למוסי כד̇א קל לבני אסראיל אנתם שאהדתם אני מן אלסמא כ̇אטבתכם

פלא תצנעו מעי מעבודאת מן פצ̇ה ומעבודאת מן אלד̇הב לא תצנעו לכם

מד̇בחא עלי אלארץ̇ אצנע לי ואד̇בח עליה צואעדך וד̇באיח סלמאתך מן גנמך ובקרך ופי כל מוצ̇ע אד̇כר אסמי אתג̇לי לך ואברך פיך

ואן צנעת לי מד̇בחא מן חג̇ארה פלא תבנהא מהנדמה פאנך אן חרכת חדידא עליהא בד̇לתהא

ולא תצעד בדרג̇ עלי מד̇בחי לילא תנכשף סואתך עליה