תפסיר רס"ג, שמות כא

והד̇ה אלאחכאם אלתי תתלוהא בין ידיהם

קל להם אד̇א אבתעת עבדא עבראניא פליכ̇דמך סת סנין ופי אלסאבעה יכ̇רג̇ חרא מג̇אנא

אן דכ̇ל עאזבא פליכ̇רג̇ עאזבא ואן כאן ד̇ו זוג̇ה כ̇רג̇ת זוג̇תה מעה

ואן זוג̇ה מולאה במראה פולדת לה בנין או בנאת אלמראה ואולאדהא יכונו למולאהא והו יכ̇רג̇ עאזבא

ואן קאל אלעבד קד אחבבת מולאי וזוג̇תי ובני לא אכ̇רג̇ חרא

פליקדמה מולאה אלי אלחאכם יקדמה אלי מצראע אלבאב או כ̇דה ויוסם מולאה אד̇נה במיסמה ויכ̇דמה ללדהר

ואן באע רג̇ל בנתה לאמה פלא תכ̇רג̇ כאלעביד

אן קבחת ענד מולאהא אן יתזוג̇ בהא פליפדהא ולבעץ̇ קום גריב לא יתסלט אן יביעהא אד̇ גדר בהא

ואן זוג̇הא לאבנה פכסירה אלבנאת יצנע בהא

ואן תזוג̇ באכ̇רי פטעאמהא וכסותהא ואוקאתהא לא ינקצהא

פאן לם יצנע בהא ואחדה מן הד̇ה אלת̇לת̇ פלתכ̇רג̇ מג̇אנא בלא ת̇מן

ומן צ̇רב אנסאנא ומאת פליקתל קתלא

ואן לם יתעמדה ואללה סבב לה עלי ידה פאציר לך מוצ̇עא יהרב אלי ת̇ם

ואן אתקח אנסאן עלי צאחבה וקתלה במכר פמן ענד מד̇בחי תאכ̇דה ליקתל

ומן צ̇רב אבאה ואמה פליקתל קתלא

ומן סרק אנסאנא פבאעה או וג̇ד פי ידה פליקתל קתלא

ומן שתם אבאה ואמה פליקתל קתלא

ואד̇א תכ̇אצם אנאס פצ̇רב אחדהמא צאחבה בחג̇ר או בשאדך̇ פלם ימת בל וקע עלי פראש

פאן קאם ומשא פי אלסוק עלי וכאיה לנפסה פקד ברא אלצ̇ארב עדא עטלתה יעטיה ועלאג̇א יעאלג̇ה

ואן צ̇רב אנסאן עבדה או אמתה בקצ̇יב פמאת תחת ידה פליקד בה

ואמא אן קאם יומא או יומין פלא יקד בה לאנה מולאה

ואן תנאצא אנאס פצדמו מראה חאמלא פכ̇רג̇ אולאדהא ולם תכן מניה פליגרם אלצאדם כמא ילזמה בעלהא ויעטיה באנצאף

ואן כאנת מניה פאג̇על נפסא בדל נפס

ודיה עין בדל עין וסן בדל סן ויד בדל יד ורג̇ל בדל רג̇ל

וכי בדל כי ושג̇ה בדל שג̇ה וג̇ראחה בדל ג̇ראחה

ואן צ̇רב אנסאן עין עבדה או עין אמתה פאד̇הבהא פליטלקה חרא בדל עינה

ואן טרח סן עבדה או סן אמתה פליטלקה חרא בדל סנה

ואן נטח ת̇ור רג̇לא או מראה פקתלה פלירג̇ם אלת̇ור ולא יוכל מן לחמה ורב אלת̇ור ברי

ואן כאן ת̇ורא נטאחא מן אמס ומא קבלה פנושד צאחבה ולם יחפט̇ה וקתל רג̇לא או מראה פלירג̇ם אלת̇ור ואיצ̇א צאחבה יקתל

ואן אלזם דיה פליעט פדא נפסה ג̇מיע מא ילזמה

ואן נטח אבנא או אבנה פליצנע בה מת̇ל הד̇א אלחכם

פאן נטח עבדא או אמה פליעט מולאה ת̇לת̇ין מת̇קאלא מן אלפצ̇ה וירג̇ם אלת̇ור

ואן כשף אנסאן בירא או כרא בירא פלם יגטהא פוקע ת̇ם ת̇ור או חמאר

פליגרם ת̇מנה צאחב אלביר וירדה אלי צאחבה ואלמית יכון לה

ואן צאדם ת̇ור אנסאן ת̇ור צאחבה פמאת פליביעו אלת̇ור אלחי ויקתסמא ת̇מנה וכד̇לך אלמית יקתסמאנה

פאן ערף אנה ת̇ור נטאח מן אמס ומא קבלה ולם יחפט̇ה צאחבה פליגרם ת̇ורא בדל אלת̇ור ואלמית יכון לה

ואן סרק אנסאן ת̇ורא או שאה פד̇בחה או באעה פליגרם בדל ת̇ור כ̇מסה ובדל אלשאה ארבעה