תפסיר רס"ג, שמות יט

פי אלשהר אלת̇אלת̇ מן כ̇רוג̇ בני אסראיל מן בלד מצר פי ד̇לך אליום ג̇או אלי בריה סיני

אד̇ רחלו מן רפידים פג̇או אלי בריה סיני ונזלו פי אלבר ונזל ת̇ם אלאסראיל חד̇א אלג̇בל

ומוסי צעד אלי אללה פנאדאה אללה מן אלג̇בל קאילא כד̇א קל לאל יעקוב ואכ̇בר אסראיל

אנתם שאהדתם מא צנעתה באלמצריין וחמלתכם שביהא עלי אג̇נחה אלנסור ואתית בכם אלי ג̇בלי הד̇א

ואלאן אן קבלתם אמרי וחפט̇תם עהדי כנתם לי כ̇אצה מן ג̇מיע אלשעוב עלי אן לי ג̇מיע אלעאלם

ואנתם תכונון לי מלך אמאמה ושעבא מקדסא הד̇א אלכלאם אלד̇י תקולה לבני אסראיל

פג̇א מוסי פדעי באשיאך̇ אלקום ותלא עליהם ג̇מיע הד̇א אלכלאם אלד̇י אמרה אללה בה

פאג̇אבוה אג̇מעין וקאלו ג̇מיע מא קאל אללה נצנעה פרד מוסי כלאמהם אלי אללה

חין קאל אללה למוסי האנא מתג̇ל לך פי גמאם אלסחאב לכי יסמע אלקום מכ̇אטבתי לך וליומנו בך איצ̇א אלי אלדהר וקץ מוסי בכלאם אלקום ללה

פקאל אללה למוסי אמץ̇ אלי אלקום וטהרהם אליום וגדא ויגסלו ת̇יאבהם

ויכונו מסתעדין אלי אליום אלת̇אלת̇ פאן פיה יתג̇לי אללה בחצ̇רתהם עלי ג̇בל סיני

פתכ̇ם אלקום חואליה וקל להם אחד̇רו מן אלצעוד אלי אלג̇בל ואלדנו מן טרפה וכל מן דנא בה פליקתל קתלא

מן חית̇ לא תמסה יד אלא ירג̇ם רג̇מה או ינשב פיהא נשבא בהימה כאן אם אנסאנא לא יחיא ואד̇א צ̇רב באלבוק ג̇איז להם אן יצעדו אלג̇בל

פנזל מוסי אלי אלקום פטהרהם וגסלו ת̇יאבהם

וקאל להם כונו מסתעדין לת̇לאת̇ה איאם ולא תקארבו אמראה

פלמא כאן אליום אלת̇אלת̇ באלגדאה כאנת אצואת וברוק וגמאם עט̇ים עלי אלג̇בל וצות בוק שדיד ג̇דא חתי זעג̇ ג̇מיע אלקום אלד̇י פי אלעסכר

פאכ̇רג̇ מוסי אלקום ליתלקי אמר אללה מן אלעסכר פוקפו אספל אלג̇בל

וג̇בל סיני מתדכ̇ן כלה מן קבל מא תג̇לי אללה עליה באלנאר וצעד דכ̇אנה כדכ̇אן אלאתון ותזעזע אלג̇בל ג̇דא

וכאן צות אלבוק כלמא מר אשתד ג̇דא ומוסי יתכלם ואללה יג̇יבה בצות

אד̇ תג̇לי אללה עלי ג̇בל סיני פי ראס אלג̇בל ונאדי אללה מוסי מן ראסה פצעד

פקאל לה אנזל נאשד אלקום כילא יהג̇מו אלי נור אללה פינט̇רו פיקע מנהם כת̇יר

ואיצ̇א אלאימה אלמקרבון אלי אללה יתקדסון לילא ית̇לם אללה מנהם

קאל לה מוסי לא יטיק אלקום אלצעוד אלי ג̇בל סיני לאנך נאשדתנא וקלת לנא תכ̇ם אלג̇בל וקדסה

קאל לה אללה אמץ̇ אנזל ת̇ם אצעד אנת והרון מעך ואלאימה וסאיר אלקום לא יהג̇מו עלי אלצעוד אלי נור אללה לילא ית̇לם מנהם

פנזל מוסי אלי אלקום וקאל להם ד̇לך