תפסיר רס"ג, שמות יח

ת̇ם סמע יתרו אמאם מדין חמו מוסי ג̇מיע מא צנעה אללה במוסי ובאל אסראיל קומה אד̇ אכ̇רג̇ אללה בני אסראיל מן מצר

פאכ̇ד̇ יתרו חמו מוסי צפורה זוג̇תה בעד מא בעת̇ בהא אליה

ואבניהא אללד̇ין אסם אחדהמא גרשם לאנה קאל צרת גריבא פי אלגרבה

ואסם אלאכ̇ר אליעזר לאנה קאל אלאה אבי כאן פי עוני וכ̇לצני מן סיף פרעון

וג̇א יתרו חמו מוסי ואבנאה וזוג̇תה אליה אלי אלבר אלד̇י הו נאזל ת̇ם אלי ג̇בל אללה

ובעת̇ במן קאל למוסי ענה אנא חמוך יתרו ג̇א אליך וזוג̇תך ואבנאהא מעהא

פכ̇רג̇ מוסי תלקא חמאה פסג̇ד ת̇ם קבלה וסאל כל ואחד ען סלאמה צאחבה בעד מא דכ̇לא אלי אלכ̇בא

וקץ מוסי עלי חמיה ג̇מיע מא צנע אללה בפרעון ואלמצריין בסבב בני אסראיל וג̇מיע אלמצאיב אלתי נאלתהם פי אלטריק וכ̇לצהם אללה

פסר יתרו בג̇מיע אלכ̇יר אלד̇י צנעה אללה לבני אסראיל וכ̇לצהם מן יד אלמצריין

וקאל יתרו תבארך אללה אלד̇י כ̇לצכם מן יד אלמצריין ומן יד פרעון אלד̇י כ̇לץ אלקום מן תחת נקל אלמצריין

אלאן עלמת אן אללה אכבר מן ג̇מיע אלמעבודאת אד̇ עאקבהם באלאמר אלד̇י אתקחו בה עליהם.

ת̇ם קדם יתרו חמו מוסי צואעד וד̇באיח ללה וג̇א הרון וג̇מיע שיוך̇ בני אסראיל ליאכלו טעאמא מע חמי מוסי בין ידי אללה

פלמא כאן מן גד ג̇לס מוסי ליחכם ללקום פוקף אלקום אמאם מוסי מן אלגדאה אלי אלעשי

וראי חמו מוסי ג̇מיע מא הו צאנע באלקום וקאל לה מא הד̇א אלאמר אלד̇י אנת צאנע באלקום מא באלך אנת ג̇אלס וחדך וג̇מיע אלקום ואקף אמאמך מן אלגדאה אלי אלעשי

קאל מוסי לה אד̇א ג̇אני אלקוס יטלבון אמר אללה

אן כאן להם כ̇צומה פג̇או אלי חכמת בין אלרג̇ל וצאחבה וערפתהם רסום אללה ושראיעה

קאל חמו מוסי לה ליס יצלח הד̇א אלאמר אלד̇י אנת צאנעה

כלאלא תכל אנת ואלקום אלד̇ין מעך איצ̇א לאן הד̇א אלאמר ת̇קיל עליך ולא תטיק אן תצנעה וחדך

אלאן אקבל מני מא אשיר עליך בראי ויכון אללה מעך כן אנת ללקום מן ג̇הה אללה תרפע אמורהם אליה

ותנד̇רהם עלי אלרסום ואלשראיע ותערפהם אלטריק אלד̇י יסלכון פיה ואלעמל אלד̇י יעמלונה

ואנת פאנט̇ר מן ג̇מיע אלקום אנאסא ד̇וי חיל אתקיא אללה אנאסא ד̇וי אלחק שאניי אלטמע וול עליהם רווסא אלוף ומאיין וכ̇מסין ועשראת

פיחכמו אלקום פי כל וקת ויכון כל אמר עט̇ים ירפעונה אליך וכל אמר צגיר יחכמון פיה הם וכ̇פף ען נפסך ויחתמלון מעך

פאן אנת צנעת הד̇א אלאמר ואמרך אללה בה אסתטעת אלקיאם ואיצ̇א ג̇מיע הד̇א אלקום אלי מוצ̇עה יסיר בסלאם

וקבל מוסי מן חמיה וצנע ג̇מיע מא קאל לה

פאכ̇תאר מוסי אנאסא ד̇וי חיל מן בני אסראיל פולאהם רווסא עליהם רווסא אלוף ומאיין וכ̇מסין ועשראת

פצאר יחכמון אלקום פי כל וקת אלאמר אלצעב ירפעונה אלי מוסי ואלאמר אלצגיר יחכמון פיה הם

ת̇ם אטלק מוסי חמאה ומצ̇י אלי בלדה