תפסיר רס"ג, שמות יז

ת̇ם רחלו בנו אסראיל מן בריה סין פי מראחלהם עלי אמר אללה ונזלו פי רפידים ולם יכן מא ישרבה אלקום

פכ̇אצם אלקום מוסי וקאלו אעטנא מאא נשרבה פקאל להם מוסי מא תכ̇אצמוני ומא תמתחנון אללה

ולמא עטש ת̇ם אלקום אלי אלמא תדמרו עלי מוסי וקאלו לה לם אצעדתנא מן מצר לתקתלנא ואטפאלנא ומואשינא באלעטש

פצרך̇ מוסי אלי אללה קאילא מא אצנע בהאולי אלקום ען קליל וירג̇ומוני

פקאל אללה למוסי סר בין ידי אלקום וכ̇ד̇ מעך מן שיאכ̇הם ועצאך אלתי צ̇רבת בהא אלניל כ̇ד̇הא בידך ואמץ̇

האנא מוקף דלילא בין ידיך הנאך עלי אלצואן פי חריב פאצ̇רב אלצואן יכ̇רג̇ מנה מא ישרבה אלקום פצנע מוסי כד̇אך בחצ̇רה משאיך̇ בני אסראיל

פסמא אסם ד̇לך אלמוצ̇ע ד̇א אלמחנה ואלכ̇צומה עלי מא כ̇אצם בנו אסראיל ואמתחנו אללה קאילין הל מוג̇וד נור אללה פי מא ביננא אם לא

ת̇ם ג̇א עמלק פחארב בני אסראיל פי רפידים

פקאל מוסי ליהושע אכ̇תר לנא רג̇אלא ואכ̇רג̇ חארב עמלק גדא אנא ואקף עלי ראס אליפאע ואלעצא אלתי אמר אללה בהא פי ידי

פצנע יהושע כמא קאל לה מוסי אן יחארב אלעמאלקה ומוסי והרון וחור צעדו אלי ראס אליפאע

פכאן מוסי כמא ירפע ידה יגלב בנו אסראיל וכמא יחטהא יגלב אלעמלק

ולמא ת̇קלת ידא מוסי אכ̇ד̇ו חג̇רא וצירוה תחתה וג̇לס עליה והרון וחור אסנדא ידיה אחדהמא ימנה ואלאכ̇ר יסרה פכאנת ידאה מחצ̇ונתין אלי מגיב אלשמס

חתי כרד יהושע עמלק וקומה בחד אלסיף

וקאל אללה למוסי אכתב הד̇א ד̇כרא פי כתאב ואתלה עלי יהושע פאני סאמחו ד̇כר עמלק מן תחת אלסמא

ובנא מוסי מד̇בחא וסמאה אללה עלמי

קאל אן אלאזלי אקסם באלכרסי אן יכון ללה חרב פי אלעמלק ג̇ילא בעד ג̇יל