תפסיר רס"ג, שמות טז

ת̇ם רחלו מן אלים וג̇את ג̇מאעה בני אסראיל אלי בריה סין אלתי בין אלים וסיני פי אליום אלכ̇אמס עשר מן אלשהר אלת̇אני לכ̇רוג̇הם מן בלד מצר

פתדמר ג̇מאעה בני אסראיל עלי מוסי והרון פי תלך אלבריה

וקאלו להמא בנו אסראיל ליתנא מתנא באמר אללה פי בלד מצר פי ג̇לוסנא עלי קדור אללחם ואכלנא אלטעאם חתי שבענא אד̇ אכ̇רג̇תמאנא אלי הד̇ה אלבריה לתקתלא ג̇מיע הד̇א אלג̇וק באלג̇וע

וקאל אללה למוסי האנא מנזל לכם טעאמא מן אלסמא יכ̇רג̇ אלקום פילקטונה אמר יום ביום לקבל אן אמתחנהם הל יסירון פי שראיעי אם לא

פאד̇א כאן אליום אלסאדס יצלחון מא יאתון בה פאנה יכון צ̇עפא עלי מא ילקטונה פי כל יום

פקאל מוסי והרון לג̇מיע בני אסראיל באלעשא תעלמון אן אללה אכ̇רג̇כם מן בלד מצר

ובאלגדאה תנט̇רון נור אללה אד̇ סמע תדמרכם עליה ונחן מן חתי תתדמרו עלינא

ת̇ם קאל מוסי ד̇אך באן יעטיכם אללה באלעשא לחמא תאכלונה וטעאמא באלגדאה תשבעון מנה אד̇ סמע תדמרכם אלד̇י אנתם מתדמרון עליה ונחן מן ליס עלינא תדמרכם בל עלי אללה

ת̇ם קאל מוסי להרון קל לג̇מעאה בני אסראיל תקדמו בין ידי אללה פאנה קד סמע תדמרכם

פלמא כלם הרון בד̇לך אלי ג̇מאעה בני אסראיל אלתפתו פי אלבריה פאד̇א בנור אללה קד ט̇הר פי אלגמאם

וכלם אללה מוסי קאילא

קד סמעת תדמר בני אסראיל קל להם בין אלגרובין תאכלון לחמא ובאלגדאה תשבעון טעאמא ותעלמון אנני אללה רבכם

פלמא כאן באלעשי צעד אלסלוי פגטא אלעסכר ובאלגדאה כאן סכב אלטל חואלי אלעסכר

ולמא צעד סכב אלטל פאד̇א בה עלי וג̇ה אלבריה דק מדחרג̇ דק כאלדמק עלי אלארץ̇

פנט̇רה בנו אסראיל וקאל בעצ̇הם לבעץ̇ הו מן לאנהם לם יעלמו מא הו פקאל מוסי להם הו אלטעאם אלד̇י אעטאה אללה לכם מאכלא

הד̇א אלאמר אלד̇י אמר אללה בה ילקט מנה כל רג̇ל עלי קדר עיאלה מרזבאן לכל ג̇מג̇מה עלי אחצא נפוסהם וכל רג̇ל יאכ̇ד̇ למן פי ביתה

פצנע כד̇אך בנו אסראיל ולקטו מן כת̇ר ומן קלל

ת̇ם כאלוה באלמרזבאן פלם יפצ̇ל מן כת̇ר ומן קלל לם ינקצה כל רג̇ל עלי קדר עיאלה לקטו

וקאל להם מוסי לא יבק אנסאן מנה שיא אלי אלגדאה

פלם יקבל אנאס מן מוסי ובקי מנה אלי אלגדאה ונגל דודא ונתן פסכ̇ט עליהם מוסי

וכאנו ילקטונה פי כל גדאה כל רג̇ל עלי קדר עיאלה פאד̇א חמית אלשמס תמאסי

ולמא כאן פי אליום אלסאדס לקטו מן אלטעאם צ̇עפא מרזבאנין לכל ואחד פג̇א ג̇מיע אשראף אלג̇מאעה פאכ̇ברו מוסי

פקאל להם מוסי הו מא קאל אללה הי סבת עטלה מקדס ללה ג̇דא מא תרידון אן תכ̇בזוה פאכ̇בזוה ומא תרידון אן תטבכ̇וה פאטבכ̇וה ומא פצ̇ל דעוה לכם מחפוט̇א אלי אלגדאה

פודעוה אלי אלגדאה כמא אמרהם מוסי פלם ינתן ורמה לם תכן פיה

פקאל מוסי כלוה אליום לאן אליום סבת ללה ואליום לא תג̇דונה פי אלצחרא

וכד̇לך סתה איאם תלקטונה ואליום אלסאבע סבת לא יכון פיה

ולמא כאן פי אליום אלסאבע כ̇רג̇ אנאס מן אלקום לילתקטו פלם יג̇דו שיא

פקאל אללה למוסי אלי כם קד אביתם אן תחפט̇ו וצאיאי ושראיעי

אנט̇רו אן אללה קד אעטאכם שריעה אלסבת ולד̇לך הו מעטיכם פי אליום אלסאדס טעאם יומין פליג̇לס כל אמר מכאנה ולא יכ̇רג̇ אחד מן מוצ̇עה פי אליום אלסאבע

פאסבת אלקום פי אליום אלסאבע

וסמי אסראיל אסמה מן והו כבזר אלכזברה אביץ̇ וטעמה כקטאיף בעסל

ת̇ם קאל מוסי הד̇א אלאמר אלד̇י אמר אללה בה מל מרזבאן מנה יכן מחפוט̇א לאג̇יאלכם לכי ינט̇רו אלטעאם אלד̇י אטעמתכם פי אלבר חין אכ̇רג̇תכם מן בלד מצד

וקאל מוסי להרון כ̇ד̇ ברניה ואחדה ואג̇על פיהא מל מרזבאן מנה וצ̇עה בין ידי אללה מחפוט̇א לאג̇יאלכם

פכמא אמר אללה מוסי וצ̇עה הרון בין ידי אלשהאדה מחפוט̇א

ובנו אסראיל אכלו אלמן ארבעין סנה אלי דכ̇ולהם אלי בלד עאמר אכלו אלמן אלי דכ̇ולהם אלי טרף בלד כנעאן

וכאן אלמרזבאן עשר אלויבה