תפסיר רס"ג, שמות טו

חיניד̇ סבח מוסי ובנו אסראיל בהד̇א אלתסביח ללה וקאלו אג̇מעין נסבח ללה אד̇ אקתדר אקתדארא אלכ̇יל ורכאבהא רמא בהם פי אלבחר

עזי ומג̇די אלאזלי אלד̇י צאר לי גית̇א הד̇א טאיקי אוי אליה אלאה אבי ארפעה

אללה ד̇ו אלמלאחם אללה אסמה

מראכב פרעון וג̇נדה רמי בהא פי אלבחר וכ̇יאר קואדה גרקו פי בחר אלקלזם

אלגמור גטתהם נזלו פי אלקער כאלחג̇ארה

ימינך יא רב ג̇לילה פי אלקוה ימינך יא רב תרהב אלאעדא

ובכת̇רה אקתדארך תהדם מקאומיך תבעת̇ בסכ̇טך פיאכלהם כאלקש

ובריח גצ̇בך תערמת אלאמיא ווקפת כאלאטואד אלהואטל אנג̇מדת אלגמור פי קלב אלבחר

ואד̇ קאל אלעדו אכלבהם פאלחקהם ואקסם סלבהם ותשתפי מנהם נפסי ואג̇רד סיפי פתקרצ̇הם ידי

אהבבת ריחך פגטאהם אלבחר ורסבו כאלרצאץ פי אלמא אלגזיר

מן מת̇לך מן אלמעבודאת יא רב מן מת̇לך אלג̇ליל אלמקדס מכ̇וף אלמדאיח צאנע אלאעג̇ובאת

מדדת ימינך פאבתלעתהם אלארץ̇

וסירת בפצ̇לך אלשעב אלד̇י פככתהם פסקתהם בעזך אלי מאוא קדסך

פסמעת אלאמם פרג̇זת ואכ̇ד̇ אלטלק סכאן פלסטין

חיניד̇ דהש צנאדיד אדום ואג̇לא מואב אכ̇ד̇תהם אלרעדה ומאג̇ו ג̇מיע סכאן כנעאן

תקע עליהם אלהיבה ואלפזע בעט̇ים קדרתך יסכתון כאלחג̇ארה אלי אן יג̇וז שעבך יא רב אלי אן יג̇וז אלשעב אלד̇י מלכתהם חוזא

תאתי בהם פתגרסהם פי ג̇בל נחלתך מהיא לסכינתך צנעתה יא רב מקדסא יא רב אצלחתה ידך

אללה מלך אלדהר ואלאבד

אד̇ דכ̇ל כ̇יל פרעון ומראכבה ופרסאנה פי אלבחר פרד אללה עליהם מא אלבחר ובנו אסראיל סארו פי אליבס פי וסט אלבחר

ת̇ם אכ̇ד̇ת מרים אלנביה אכ̇ת הרון אלדף פי ידהא וכ̇רג̇ ג̇מיע אלנסא וראהא בדפוף וטנאביר

פאג̇אבתהם מרים סבחו ללה אד̇ אקתדר אקתדארא אלכ̇יל ורכאבהא רמא בהם פי אלבחר

ורחל מוסי בני אסראיל מן בחר אלקלזם וכ̇רג̇ו אלי בריה שור פסארו ת̇לת̇ה איאם פי אלבריה ולם יג̇דו מאא

פג̇או אלי אלמרירה ולם יטיקו אן ישרבו מנהא מאא לאנה מר ולד̇לך סמית אלמרירה

פתדמר אלקום עלי מוסי קאילין מא נשרב

פדעי אלי אללה פדלה עלי שג̇רה טרח מנהא פי אלמא פחלא אלמא ת̇ם ציר לה רסומא ואחכאמא ות̇ם אמתחנה

וקאל אן קבלת אמר אללה רבך וצנעת אלמסתקים ענדה ואנצת אלי וצאיאה וחפט̇ת ג̇מיע רסומה פג̇מיע אלאמראץ̇ אלתי אחללתהא באלמצריין לא אחלהא בך לאני אללה מעאפיך

ת̇ם ג̇או אלי אלים וכאן ת̇ם את̇נתא עשר עין מא וסבעון נכ̇לה ונזלו ת̇ם