תפסיר רס"ג, שמות יד

ת̇ם כלם אללה מוסי קאילא

מר בני אסראיל אן ירג̇עו וינזלו בין ידי פם אלחירות בין אלמג̇דל ואלבחר בין ידי צנם צפון חיאלה תנזלון עלי אלבחר

חתי יקול פרעון ען בני אסראיל אנהם מתחירון פי אלבלד ואן אלבר קד אנגלק עליהם

פאשדד קלבה ויכלבהם ואתעט̇ם בה וג̇מיע ג̇נדה ויעלם אלמצריון אנני אללה פצנעו כד̇לך

ולמא אכ̇בר מלך מצר אן אלקום קד הרבו אנקלב קלבה וקלוב קואדה אליהם וקאלו מא ד̇א צנענא אד̇ אטלקנא בני אסראיל מן כ̇דמתנא

פאסרג̇ מרכבה ואכ̇ד̇ קומה מעה

ואכ̇ד̇ סת מאיה מרכב מכ̇תאר וסאיר מראכב אלמצריין וקואד עלי ג̇מיעהם

ושדד אללה קלב פרעון מלך מצר וכלב בני אסראיל ובנו אסראיל כ̇ארג̇ון ביד רפיעה

וכלבהם אלמצריון ולחקוהם נאזלין עלי אלבחר ג̇מיע כ̇יל פרעון ופרסאנה וג̇נדה אלי פם אלחירות בין ידי צנם צפון

ולמא קרב פרעון שאל בנו אסראיל עיונהם פאד̇א באלמצריין ראחלין וראהם פכ̇אפו ג̇דא וצרכ̇ו אלי אללה

וקאלו למוסי אמן עדם אלקבור במצר אכ̇רג̇תנא לנמות פי אלבר מא ד̇א צנעת בנא אד̇ אכ̇רג̇תא מן מצר

אליס הד̇א אלקול אלד̇י קלנאה לך במצר דענא נכ̇דם אלמצריין פאן כ̇דמתנא להם אצלח לנא מן מותנא פי אלבר

קאל מוסי ללקום לא תכ̇אפו קפו ואנט̇רו מגות̇ה אללה אלתי יצנעהא לכם אליום פאנכם כמא ראיתם אלמצריין אליום ליס תעודון אן תרוהם אבדא אלי אלדהר

אללה יחארב ענכם ואנתם פאמסכו

ת̇ם קאל אללה למוסי מא תצרך̇ אלי מר בני אסראיל אן ירחלו

ואנת ארפע עצאך ומד ידך אלי אלבחר פשקה פידכ̇ל בנו אסראיל פי וסטה פי אליבס

והאנא משדד קלב אלמצריין פידכ̇לון וראהם ואתעט̇ם בפרעון ובג̇מיע ג̇נדה ומראכבה ופרסאנה

ויעלם אלמצריון אנני אללה אד̇א תעט̇מת בפרעון ומראכבה ופרסאנה

פרחל מלאך אללה אלסאיר בין ידי עסכר בני אסראיל וצאר וראהם ורחל עמוד אלגמאם מן בין ידיהם ווקף וראהם

פדכ̇ל בין עסכר אלמצריין ובין עסכר אלאסראיליין וכאן אלגמאם ואלט̇לאם פגשיא אלליל ולם יתקדם אחדהמא אלי אלאכ̇ר טול אלליל

פמד מוסי ידה עלי אלבחר וסאק אללה אלבחר בריח אלקבול צעבה טול אלליל חתי צירה ג̇פאפא בעד מא אנשק אלמא

ודכ̇ל בנו אסראיל פי וסט אלבחר פי אליבס וצאר אלמא להם אסוארא ען ימינהם וען יסארהם

וכלבהם אלמצריון ודכ̇לו וראהם ג̇מיע כ̇יל פרעון ומראכבה ופרסאנה אלי וסט אלבחר

ולמא כאן פי נובה אלגדאה אטלע אללה אלי עסכר אלמצריין בעמוד מן נאר וגמאם פאהאמה

ואזאל לואלב מראכבהם וסאקהם בענף חין קאל אלמצריון נהרב מן בין ידי בני אסראיל לאן אללה יחארב ענהם אלמצריין

ת̇ם קאל אללה למוסי מד ידך עלי אלבחר ירג̇ע אלמא עלי אלמצריין ועלי מראכבהם ופרסאנהם

פמד מוסי ידה עלי אלבחר פרג̇ע אלבחר ענד אתג̇אה אלגדאה אלי צעובתה ואלמצריון הארבון תלקאה פגרקהם אללה פי וסט אלבחר

באן רג̇ע אלמא פגטא אלמראכב ואלפרסאן וסאיר ג̇יש פרעון אלדאכ̇לין וראהם פי אלבחר ולם יתבק מנהם ולא ואחד

ובנו אסראיל סארו פי אליבס פי וסט אלבחר ואלמא להם אסואר ען ימינהם וען יסארהם

ואגאת̇ אללה פי ד̇לך אלוקת בני אסראיל מן יד אלמצריין וראי בנו אסראיל אלמצריין אמואתא עלי שאטי אלבחר

וראי בנו אסראיל אלאפה אלעט̇ימה אלתי צנעהא אללה באלמצריין פכ̇אף אלקום אללה ואמנו באללה ובמוסי רסולה