תפסיר רס"ג, שמות יג

ת̇ם כלם אללה מוסי תכלימא

קדס לי כל בכר פאתח כל בטן מן בני אסראיל מן אלנאס ואלבהאים לי הם

פקאל מוסי ללקום אד̇כרו הד̇א אליום אלד̇י כ̇רג̇תם פיה מן מצר מן בית אלעבודיה לאן ביד שדידה אכ̇רג̇כם אללה מן הנא ולא יוכל כ̇מיר

אליום אנתם כ̇ארג̇ון פי שהר אלפריך

ואד̇א אדכ̇לך אללה אלי בלד אלכנעאניין ואלחתיין ואלאמוריין ואלחויין ואליבוסיין אלד̇י קסם אללה לאבאיך אן יעטי לך בלד יפיץ̇ אללבן ואלעסל פאצנע הד̇ה אלצנעה פי הד̇א אלשהר

סבעה איאם תאכל פטירא ופי אליום אלסאבע חג̇ ללה

ואד̇א אכל פטיר פי הד̇ה אלסבעה איאם לא ירא לך כ̇מיר ולא מכ̇מר פי ג̇מיע תכ̇מך

ואכ̇בר אבנך פי ד̇לך אליום קאילא הד̇א בסבב מא צנע אללה לי פי כ̇רוג̇י מן מצר

ויכן איה לך עלי ידך וד̇כרא בין עיניך לכי תכון שריעה אללה פי פיך לאן ביד שדידה אכ̇רג̇ך אללה מן מצר

ואחפט̇ הדא אלרסם פי וקתה מן חול אלי חול

כד̇אך אד̇א אדכ̇לך אללה אלי בלד אלכנעאניין כמא קסם לך ולאבאיך ואעטאה לך

פאעזל כל פאתח בטן ללה וכל אול נתאג̇ אלבהאים אלד̇י יכון לך מן אלד̇כור ללה

ובכור אלחמיר אפדה בשאה ואן לם תפדה פאקפה וכל בכר ד̇כר מן בניך פאפדה

ואד̇א סאלך אבנך גדא קאילא מא הד̇א פקל לה בשדה יד אכ̇רג̇נא אללה מן מצר מן בית אלעבודיה

ולמא תצעב פרעון ליטלקנא קתל אללה כל בכר פי בלד מצר מן בכור אלנאס אלי בכור אלבהאים ולד̇לך אנא ד̇אבח ללה כל פאתח בטן מן בכור אלבהאים וכל בכור בני אפדיהם

פתכון איה עלי ידך ומנשורא בין עיניך לאן ביד שדידה אכ̇רג̇נא אללה מן מצר

וכאן למא אטלק פרעון אלקום לם יסירהם אללה טריק בלד אלפלסטיניין לאנה קריב ולאן קאל אללה כילא ינדם אלקום אד̇א ראו אלחרב פירג̇עון אלי מצר

פאדארהם אללה טריק אלבר אלי בחר אלקלזם ומתעביין צעדו בנו אסראיל מן בלד מצר

ואכ̇ד̇ מוסי עט̇אם יוסף מעה לאנה אחלף בני אסראיל וקאל להם אד̇א ד̇כרכם אללה פאצעדו עט̇אמי מן האהנא מעכם

ת̇ם רחלו מן סכות ונזלו פי איתם פי טרף אלבר

ואללה סאיר בין ידיהם נהארא בעמוד מן גמאם לידלהם עלי אלטריק ופי אלליל בעמוד מן נאר ליצ̇י להם פיסירו נהארא ולילא

לא יזול עמוד אלגמאם נהארא ועמוד אלנאר לילא מן בין ידי אלקום