תפסיר רס"ג, שמות יב

ת̇ם קאל אללה למוסי והרון פי בלד מצר קאילא

הד̇א אלשהר הו לכם אול אלשהור יכון לכם אולא לשהור אלסנה

וכלמא ג̇מאעה בני אסראיל וקולא להם פי אלעאשר מנה אן יתכ̇ד̇ו להם כל פריק ראסא לביות אבאיהם ד̇אך ראס לכל בית

פאן קאל אהל בית מן אלחאג̇ה אלי ראס פליאכ̇ד̇ הו וג̇ארה אלאקרב אלי מנזלה במואסאה מן אלנפוס כל רג̇ל עלי קדר טעאמה תתואסוה

וליכן לכם ראסא צחיחא ד̇כרא מן סנתה מן אלצ̇אן ואלמאעז תאכ̇ד̇וה

יכון ענדכם מחפוט̇א אלי אליום אלראבע עשר מן הד̇א אלשהר פיד̇בחה ג̇וק ג̇מאעה בני אסראיל בין אלגרובין

ויאכ̇ד̇ו מן דמה ויג̇עלו עלי כ̇די אלבאב ואלמט̇ל עלי אלביות אלד̇י יאכלונה פיהא

ויאכלו לחמה פי תלך אללילה שוא נאר ופטיר מע מראר יאכלוה

לא תאכלו שיא מנה ניא ולא טביכ̇א מנצ̇ג̇א במא אלא משויא בנאר ראסה ואכארעה וג̇ופה

ולא תבקו מנה אלי אלגדאה פאן בקי מנה שי אלי אלגדאה פאחרקוה באלנאר

וכד̇א פכלוה תכון אחקאוכם משדודה ונעאלכם פי ארג̇לכם ועציכם פי אידיכם ותאכלוה פי חפז הו פסח ללה

ואתג̇לי פי בלד מצר פי הד̇ה אללילה ואקתל כל בכר פיה מן אנסאן אלי בהאים ובג̇מיע מעבודאת אלמצריין אצנע אחכאמא אנא אללה

פיציר אלדם לכם עלאמה עלי אלביות אלתי אנתם פיהא ואנט̇ר אלדם וארת̇י עליכם ולא יכון בכם ובא מהלך אד̇א צ̇רבת אהל בלד מצר

פיציר הד̇א אליום לכם ד̇כרא ותחג̇ון פיה חג̇א ללה לאג̇יאלכם רסם אלדהר תחג̇ונה

סבעה איאם תאכלו פטירא לכן פי אליום אלאול תעטלו כ̇מירא מן מנאזלכם וכל מן אכל כ̇מירא ינקטע ד̇לך אלאנסאן מן בני אסראיל מן אליום אלאול אלי אליום אלסאבע

ואליום אלאול אסם מקדס ואליום אלסאבע אסם מקדס יכונא לכם ולא יצנע פיהמא שי מן אלצנאיע אלא מא יוכל לכל נפס הו וחדה יצנע לכם

ואחפט̇ו אלפטיר לאני פי ד̇את הד̇א אליום אכ̇רג̇ת ג̇יושכם מן בלד מצר ואחפט̇ו הד̇א אליום לאג̇יאלכם רסם אלדהר

ופי אלשהר אלאול פי אליום אלראבע עשר מנה באלעשי כלו פטירא אלי אליום אלאחד ועשרין מן אלשהר באלעשי

סבעה איאם לא יוג̇ד כ̇מיר פי ביותכם וכל מן אכל מכ̇מרא ינקטע ד̇לך אלאנסאן מן ג̇מאעה בני אסראיל מן אלגריב אלי צריח אלבלד

שיא מן אלמכ̇מר לא תאכלו ופי ג̇מיע מסאכנכם כלו פטירא

פדעי מוסי בג̇מיע שיוך̇ אסראיל וקאל להם אג̇ד̇בו וכ̇ד̇ו לכם גנמא לעשאירכם ואד̇בחו אלפסח

וכ̇ד̇ו באקה מן צעתר ואגמסוהא פי אלדם אלד̇י פי אלטסת ואדנו אלי אלמט̇ל וכ̇די אלבאב מן ד̇לך אלדם אלד̇י פי אלטסת ולא יכ̇רג̇ אנסאן מנכם מן באב מנזלה אלי אלגדאה

פיתג̇לי אללה ליצדם אלמצריין וינט̇ר אלדם עלי אלמט̇ל ועלי כ̇די אלבאב פירת̇י למן דאכ̇לה ולא ידע אלמהלך אן ידכ̇ל אלי ביותכם פיהלככם

ואחפט̇ו הד̇א אלאמר רסמא לכם ולבניכם אלי אלדהר

ואד̇א דכ̇לתם אלי אלבלד אלד̇י יעטיכם אללה כמא קאל פאחפט̇ו הד̇ה אלצנעה

פאד̇א קאל לכם בנוכם מא הד̇ה אלצנעה לכם

קולו הו ד̇בח רת̇א ללה כמא רת̇י לביות בני אסראיל אד̇ צדם אלמצריין וכ̇לץ ביותנא פכ̇ר אלקום וסג̇דו

ומצ̇ו בני אסראיל וצנעו בג̇מיע מא אמר אללה מוסי והרון כד̇אך צנעו

פלמא כאן נצף אלליל קתל אללה כל בכר פי ג̇מיע בלד מצר מן בכר פרעון אלג̇אלס עלי כרסיה אלי בכר אלסבי אלד̇י פי אלחבס וג̇מיע בכור אלבהאים

פקאם פרעון לילא הו וג̇מיע קואדה וסאיר אלמצריין פכאן צראך̇ עט̇ים במצר אד̇ ליס בית אלא ופיה מית

פדעי במוסי והרון לילא וקאל קומא אכ̇רג̇א מן בין קומי אנתמא ובנו אסראיל ואמצ̇ו ואד̇בחו ללה כמא קלתם

ואיצ̇א גנמכם ובקרכם כ̇ד̇והא כמא קלתם ואמצ̇ו ואג̇עלוני פי הל

ושדד אלמצריון עלי אלקום ליסרעו יטלקונהם מן אלבלד לאנהם קאלו כלנא מאיתון

פחמל אלקום עג̇ינהם קבל אן יכ̇תמר פכאנת מעאג̇נהם משדודה פי ת̇יאבהם עלי אענאקהם

ובנו אסראיל צנעו חיניד̇ כמא אמר מוסי פאסתוהבו מן אלמצריין אניה פצ̇ה ואניה ד̇הב ות̇יאבא

ואללה אעטא אלקום חט̇אא ענד אלמצריין פוהבוהא להם ואנתספו אלמצריין

ת̇ם רחל בנו אסראיל מן עין אלשמס אלי סכות שביה בסת מאיה אלף רג̇ל אלרג̇אל כ̇לא אלאטפאל

ואיצ̇א כ̇לט כת̇יר צעד מעהם וגנם ובקר מואשי עט̇ימה ג̇דא

פאכ̇תבזו אלעג̇ין אלד̇י אכ̇רג̇וה מן מצר מלילא פטירא אד̇ לם יכ̇תמר למא טרדו מן מצר ולם יטיקו אן יתלבת̇ו וחתי זאדא לם יצנעו להם

וכאן מקאם אהל אסראיל אלד̇י אקאמוה פי עמל מצר ארבע מאיה ות̇לת̇ין סנה

פלמא כאן בעד ארבע מאיה ות̇לת̇ין סנה פי ד̇את ד̇לך אליום כ̇רג̇ ג̇מיע ג̇יוש אללה מן בלד מצר

כמא כאן הד̇ה אללילה מחפוט̇ה ללה ליכ̇רג̇הם מן בלד מצר כד̇אך הד̇א אלליל ללה מחפוט̇ לבני אסראיל לאג̇יאלהם

ת̇ם קאל אללה למוסי והרון הד̇א רסם אלפסח כל אג̇נבי לא יאכל מנה

וכל עבד לאנסאן משתרי בת̇מן פאכ̇תנה חיניד̇ יאכל מנה

ואלצ̇יף ואלאג̇יר לא יאכלא מנה

ופי בית ואחד יוכל לא יכ̇רג̇ מן אלבית מן אללחם כ̇ארג̇א ועט̇מא לא תכסרו מנה

כד̇אך ג̇מאעה בני אסראיל יצנעוה

ואד̇א דכ̇ל מעכם גריב ואראד אן יצנע פסחא ללה פליכ̇תתן כל ד̇כר פי נאחיתה פחיניד̇ יתקדם פיצנעה אד̇ יציר כצריח אלבלד וכל אקלף לא יאכל מנה

שריעה ואחדה תכון ללצריח וללגריב אלדכ̇יל פי מא בינכם

פצנע בנו אסראיל כמא אמר אללה מוסי והרון כד̇אך צנעו

ולמא כאן פי ד̇את הד̇א אליום אלד̇י אכ̇רג̇ אללה בני אסראיל מן בלד מצר עלי ג̇יושהם