תפסיר רס"ג, שמות יא

פקאל אללה למוסי קד בקי בלא ואחד אתי בה עלי פרעון ועלי אלמצריין בעד ד̇לך יטלקכם מן ההנא פענד אטלאקה ג̇מלה יטרדכם מן ההנא

מר אלקום אן יסתוהב אלרג̇ל מן צאחבה ואלמראה מן צאחבתהא אניה פצ̇ה ואניה ד̇הב

פאעטא אללה אלקום חט̇אא ענד אלמצריין ואמא מוסי אלרסול פעט̇ים ג̇דא פי ג̇מיע בלד מצר ענד קואד פרעון וענד אלקום

פקאל מוסי כד̇א קאל אללה פי נצף אלליל אנא מתג̇לי פי בלד מצר

פימות כל בכר פיה מן בכר פרעון אלג̇אלס עלי כרסיה אלי בכר אלאמה אלתי ורא אלרחא וסאיר בכור אלבהאים

ויכון צראך̇ עט̇ים פי ג̇מיע בלד מצר מא לם יכן מת̇לה ולא יעוד מת̇לה

ולג̇מיע בני אסראיל לא ינבח כלב בפיה פמא פוקה מן אלאד̇א מן נאסהם אלי בהאימהם לכי תעלמו מא יבין אללה בין אלמצריין ובין אלאסראיליין

פינחדר ג̇מיע קואדך האולי אלי ויסג̇דון לי קאילין אכ̇רג̇ אנת וג̇מיע אלקום אלד̇י מעך ובעד ד̇לך אכ̇רג̇ פכ̇רג̇ מן ענד פרעון בשדה גצ̇ב

ת̇ם קאל אללה אלי מוסי לא יקבל מנכמא פרעון לכי תכת̇ר בראהיני פי בלד מצר

ומוסי והרון צנעא ג̇מיע הד̇ה אלבראהין בחצ̇רתה פשדד אללה קלבה ולם יטלק בני אסראיל מן בלדה