תפסיר רס"ג, שמות י

ת̇ם קאל אללה למוסי אדכ̇ל אלי פרעון פאני קד קוית קלבה וקלב קואדה לכי אחל אפאתי הד̇ה בהם

ולכי תקץ עלי אבנך ואבן אבנך מא בטשת באלמצריין ואפאתי אלתי אחללתהא בהם ותעלמו אנני אללה

פדכ̇ל מוסי והרון אלי פרעון וקאלא לה כד̇א קאל אללה אלאה אלעבראניין אלי כם אבית אן תדען מן בין ידי אטלק קומי יעבדוני

פאנך אן אבית אן תטלק קומי הא אנא אתי באלג̇ראד גדא פי תכ̇מך

פיגטי ט̇הר אלארץ̇ ולא יטיק אחד אן ינט̇ר אליהא ויאכל באקי אלפליטה אלתי תבקת לכם מן אלברד ויאכל ג̇מיע אלשג̇ר אלנאבת לכם מן אלצחרא

ותמתלי מנה ביותך וביות קואדך וביות סאיר אלמצריין מא לם יר מת̇לה אבאוך ואבא אבאיך מד̇ כונהם עלי אלארץ̇ אלי הד̇א אליום ת̇ם ולי וכ̇רג̇ מן ענד פרעון

פקאל קואד פרעון לה אלי כם יכון הד̇א לנא והקא אטלק אלקום יעבדו אללה רבהם קבל אן תשאהד מצר קד באדת

פארד מוסי והרון אלי פרעון וקאל להמא אמצ̇ו ואעבדו אללה רבכם מן ומן אלמאצ̇יון

קאל מוסי בצביאננא ושיוכ̇נא נמצ̇י ובבנינא ובנאתנא וגנמנא ובקרנא נמצ̇י לאן חג̇ אללה לנא

קאל להמא כד̇אך יכון אללה מעכם כמא אטלקכם ואטפאלכם הוד̇א ארי אלשר חד̇י וג̇והכם

ליס כד̇אך ימצ̇י אלרג̇אל מנכם יעבדון אללה פאנכם אנמא תטלבונהא וטרדהמא מן ענד פרעון

ת̇ם קאל אללה למוסי מד ידך עלי בלד מצר בסבב אלג̇ראד פיצעד עלי בלד מצר ויאכל ג̇מיע עשב אלבלד ג̇מיע מא בקאה אלברד

פמד מוסי עצאה עלי בלד מצר וסאק אללה ריח אלקבול טול ד̇לך אליום וטול אלליל פלמא כאנת אלגדאה חמלת ריח אלקבול אלג̇ראד

פצעד אלג̇ראד עלי ג̇מיע בלד מצר ואסתקר פי ג̇מיע תכ̇מהא עט̇ימא ג̇דא מא לם יכן קבלה ג̇ראד מת̇לה ובעדה לא יכון כד̇אך

פגטא ט̇הר ג̇מיע אלבלד חתי אט̇לם אלבלד ואכל ג̇מיע עשבה וג̇מיע ת̇מר אלשג̇ר אלד̇י בקאה אלברד ולם יבק שי מן אלכ̇צ̇רה פי אלשג̇ר ופי עשב אלצחרא פי ג̇מיע בלד מצר

פאסרע פרעון פדעי במוסי והרון וקאל קד אכ̇טאת ללה רבכמא ולכמא

ואלאן פאחתמלא ד̇נבי הד̇ה אלמרה ואשפעא אלי אללה רבכמא ליזיל עני הד̇א אלמות אלמחץ̇

פלמא כ̇רג̇ מן ענדה שפע אלי אללה

פקלב אללה ריחא גרביה שדידה ג̇דא פחמלת אלג̇ראד וצכת בה בחר אלקלזם ולם תבק ג̇ראדה ואחדה פי בלד מצר

ושדד אללה קלב פרעון ולם יטלק בני אסראיל

ת̇ם קאל אללה למוסי מד ידך נחו אלסמא ויכון ט̇לאם עלי ג̇מיע בלד מצר בעד זואל ט̇לאם אלליל

פמד מוסי ידה נחו אלסמא פכאן ט̇לאם אפל פי ג̇מיע בלד מצר ת̇לת̇ה איאם

לם ירא אנסאן צאחבה ולם יקם אנסאן מן מכאנה ת̇לת̇ה איאם ולג̇מיע בני אסראיל כאן נור פי מסאכנהם

פדעי פרעון במוסי וקאל אמצ̇ו אעבדו אללה לכן גנמכם ובקרכם דעוהא ואמא אטפאלכם פתמצ̇י מעכם

קאל לה מוסי בל אנת תעטינא ד̇באיח וצואעד נקרבהא ללה רבנא

ומואשינא איצ̇א תמצ̇י מענא לא יבקא מנהא ט̇לף לאנא מנהא נאכ̇ד̇ מא נעבד בה אללה רבנא ונחן לא נעלם כם מקדאר מא נעבד אללה בה מנהא אלי אן נציר אלי ת̇ם

פשדד אללה קלבה ולם ישא אטלאקהם

ת̇ם קאל פרעון אמץ̇ עני אחד̇ר אן תעאוד תרא וג̇הי פאנך יום תרא וג̇הי תסתחק אן תמות

ת̇ם קאל לה מוסי נעמא קלת לסת אעאוד אן ארי וג̇הך