תפסיר רס"ג, שמות ט

ת̇ם קאל אללה למוסי אדכ̇ל אלי פרעון וקל לה כד̇א קאל אללה אלאה אלעבראניין אטלק קומי יעבדוני

פאנך אן אבית אן תטלקהם ועאדך מתמסך בהם

פאן אפה אללה כאינה פי מואשיך אלתי פי אלצחרא פי אלכ̇יל ואלחמיר ואלג̇מאל ואלגנם ואלבקר ובא עט̇ים ג̇דא

ויבין אללה בין מואשי בני אסראיל ומואשי אלמצריין ולא ימות שי מן ג̇מיע מא הו לבני אסראיל

וציר אללה וקתא קאילא גדא יצנע אללה הד̇א אלאמר פי אלבלד

פצנע אללה הד̇א אלאמר מן אלגד ומאת ג̇מיע מואשי אלמצריין ומן מואשי בני אסראיל לם ימת ואחדה

ובעת̇ פרעון פאד̇א לם ימת מן מואשי בני אסראיל ואחדה פת̇קל קלבה ולם יטלקהם

ת̇ם קאל אללה למוסי והרון כ̇ד̇א מלא חפניכמא מן פיח אלאתון ויהוי בה מוסי פי אלהוא בחצ̇רה פרעון

פיציר גבארא פי ג̇מיע בלד מצר ויציר פי אלנאס ואלבהאים קרחא נאבתא מתנפטא פי ג̇מיע בלד מצר

פאכ̇ד̇א מן פיח אלאתון ווקפא בין ידי פרעון והוי בה מוסי פי אלהוא פצאר קרח מתנפט נאבת פי אלנאס ואלבהאים

ולם יטיקו אלעלמא אן יקפו בין ידי מוסי מן קבל אלקרח אלד̇י כאן פיהם ופי סאיר אלמצריין

ושדד אללה קלב פרעון ולם יקבל מנהמא כמא קאל אללה אלי מוסי

ת̇ם קאל אללה למוסי אדלג̇ באלגדאה וקף בין ידי פרעון וקל לה כד̇א קאל אללה אלאה אלעבראניין אטלק קומי יעבדוני

לאני פי הד̇ה אלמרה אנא באעת̇ בכת̇יר מן אפאתי פי קלבך וקואדך וקומך לכי תעלם אן ליס מת̇לי פי ג̇מיע אלעאלם

לאני אלאן לו אטלקת ידי לקתלתך וקומך באלובא ואג̇תחדת מן אלבלד

ולכן בסבב כ̇לה אבקיתך לכי אוריך קותי לכי יקץ באסמי פי ג̇מיע אלעאלם

ועאדך מתרבץ בקומי לילא תטלקהם

הא אנא ממטר פי מת̇ל הד̇א אלוקת מן גד ברדא עט̇ימא ג̇דא מא לם יכן מת̇לה פי מצר מן יום אססת אלי אלאן

ואלאן אבעת̇ פצ̇ם מאשיתך וג̇מיע מא לך פי אלצחרא פאנה אי אנסאן או בהימה וג̇ד פי אלצחרא ולם ינצ̇ם אלי אלמנאזל ינזל עליהם אלברד פימותון

פמן כ̇אף כלאם אללה מן קואד פרעון אהרב עבידה ומאשיתה אלי אלביות

ומן לם ירד באלה אלי כלאם אללה תרך עבידה ומאשיתה פי אלצחרא

ת̇ם קאל אללה למוסי מד ידך נחו אלסמא פיכון אלברד פי ג̇מיע בלד מצר עלי אלנאס ועלי אלבהאים וג̇מיע עשב אלצחרא פי בלד מצר

פמד מוסי עצאה נחו אלסמא פאעלן אללה אצואתא וברדא וסארת אלנאר עלי אלארץ̇ ואמטר אללה בררא עלי בלד מצר

פכאן אלברד ואלנאר אלמתלבדה פי וסטה עט̇ימא ג̇דא מא לם יכן מת̇לה פי בלד מצר מד̇ צארת לאמה

פצ̇רב אלברד פי ג̇מיע בלד מצר מא פי אלצחרא מן אנסאן אלי בהימה וצ̇רב ג̇מיע עשבהא וכסר ג̇מיע שג̇רהא

עדא פי בלד אלסדיר אלתי ת̇ם בנו אסראיל לם יכן ברד

פבעת̇ פרעון במוסי והרון וקאל להמא קד אכ̇טאת הד̇ה אלמרה אללה אלעאדל ואנא וקומי אלט̇אלמון

אשפעא אלי אללה וחסבנא אן תכון אצואת אללה וברד עלינא חתי אטלקכם ולא תעאדו אן תקפו

קאל לה מוסי אד̇א כ̇רג̇ת מן אלקריה אבסט ידי אלי אללה פתנתהי אלאצואת ואלברד לא יכון אבדא לכי תעלם אן אלארץ̇ ללה

ואנת וקואדך פאעלמו אנכם קבל אן תכ̇אפו מן בין ידי אללה

אן אלכתאן ואלשעיר קד עטבא לאן אלשעיר כאן פריכא ואלכתאן משלפא

ואלחנטה ואלכרסנה לם יעטבא לאנהמא אפלתאן

ולמא כ̇רג̇ מוסי מן ענד פרעון מן קריתה בסט ידיה בין ידי אללה פאנתהת אלאצואת ואלברד ולם ינחל מטר עלי אלארץ̇

ולמא ראי פרעון אן קד אנתחי אלמטר ואלברד ואלאצואת עאוד אלכ̇טא פת̇קל קלבה הו ועבידה

ושדד אללה קלב פרעון ולם יטלקהם כמא קאל אללה למוסי