תפסיר רס"ג, דברים ט

ואעלם יא אסראיל אנך ג̇איז פי הד̇ה אלמדה אלארדן לתדכ̇ל ותחוז אממא אכת̇ר ואעט̇ם מנך פי קרי כבירה וחצינה תדאני אלסמא

קום כביר רפיע בנו אלג̇באברה כמא עלמת וסמעת מן ד̇א יקום בין ידי אלג̇באברה

פאעלם מן אליום אן אללה רבך נורה ג̇איז בין ידיך כנאר אכלה הו ינפד̇הם והו יהזמהם בין ידיך פתקרצ̇הם ותבידהם סריעא כמא ועדך אללה

ולא תקל פי נפסך אד̇א דפעהם אללה מן בין ידיך אנה בצלאחי אדכ̇לני אללה אחוז הד̇א אלבלד ובט̇לם תלך אלאמם אללה קארצ̇הם מן בין ידיך

בל ליס בצלאחך ובאסתקאמה קלבך פקט אנת סאיר לתחוז בלדהם לכן מע ט̇לם אואליך אלאמם אללה רבך קארצ̇הם מן בין ידיך ולכי יפי באלקול אלד̇י קאל לאברהים ואסחק ויעקוב

פתיקן אנך ליס בצלאחך אללה רבך מעטיך הד̇א אלבלד לתחוזה אד̇ אנת שעב צעב אלרקאב

פאד̇כר ולא תנסי מא אסכ̇טת אללה רבך פי אלבר וד̇לך מן אליום כ̇רג̇ת מן מצר ואלי אן ג̇יתם אלי הד̇א אלבלד לם תזאלו מכ̇אלפין אללה

ופי חרב אסכ̇טתם אללה פגצ̇ב עליכם וכאד אן ינפד̇כם

חין צעדת אלי אלג̇בל לאכ̇ד̇ לוחי אלג̇והר לוחי אלשהאדה אלתי עהדהא אללה מעכם פאקמת פיה ארבעין יומא וארבעין לילה לם אכל טעאמא ולם אשרב מאא

ודפע אללה לי לוחי אלג̇והר אלמכתובין בקדרה אללה ועליהמא מת̇ל ג̇מיע אלכלמאת אלתי כלמכם אללה בהא פי אלג̇בל מן וסט אלנאר פי יום אלג̇וק

וכאן ד̇לך בעד ארבעין יומא וארבעין לילה דפעהמא אלי

וקאל לי קם אנחדר סריעא מן ההנא לאן קד אפסדו קומך אלד̇ין אכ̇רג̇תהם מן בלד מצר וזאלו סריעא מן אלטריק אלד̇י אמרתהם וצנעו להם מסבוכא

ת̇ם קאל אללה לי עלמת האולי אלקום אנהם צעאב אלרקאב

ואן כפפת ען אלתשפע אפניהם פמחית אסמאהם מן תחת אלסמא וג̇עלת מנך אמה עאט̇מה ואכת̇ר מנהם

פולית ונזלת מן אלג̇בל והו משתעל באלנאר ולוחא אלשהאדה עלי ידי

פנט̇רת פאד̇א בכם קד אכ̇טאתם ללה רבכם ואתכ̇ד̇תם עג̇לא מסבוכא וזלתם סריעא מן אלטריק אלד̇י אמרתכם

פצ̇בטת באללוחין וטרחתהמא ען ידי וכסרתהמא בחצ̇רתכם

ושפעת בין ידי אללה כאלמרה אלאולה ארבעין יומא וארבעין לילה לם אכל טעמא ולם אשרב מאא בסבב כ̇טיתכם אלתי אכ̇טאתם וצנעתם אלשר בין ידי אללה ואסכ̇טתמוה

לאן חד̇רת מן אלגצ̇ב ואלחמיה אלתי סכ̇ט אללה בהא עליכם לינפד̇כם פסמע אללה פי ד̇לך אלוקת

ועלי הרון וג̇ד אללה ג̇דא וכאד אן ינפד̇ה פאסתגפרת לה איצ̇א פי ד̇לך אלוקת

ואמא כ̇טיתכם והי אלעג̇ל אלד̇י אתכ̇ד̇תמוה פאני אכ̇ד̇תה פחרקתה באלנאר וברדתה באלמברד נעמא חתי דק כאלתראב פטרחת תראבה פי ואדי אלמא אלמנחדר מן אלג̇בל

ופי ד̇את אלאשתעאל וד̇את אלמחנה וקבור אלמשתהיין לם תזאלו מסכ̇טין אללה

ולמא בעת̇ אללה בבעצ̇כם מן רקים ברנע קאילא אצעדו ואנט̇רו אלארץ̇ אלד̇י אעטיכם כ̇אלפתמוה ולם תאמנו בה ולם תקבלו אמרה

באלג̇מלה לם תזאלו מכ̇אלפין אללה מן יום ערפתכם

פלמא שפעת בין ידי אללה תלך אלארבעין יומא ואלארבעין לילה אד̇ אראד אללה אן ינפד̇כם

פצלית בין ידי אללה וקלת אללהם יא רב לא תהלך קומך וצפותך אלד̇ין פככתהם בעט̇מתך ואכ̇רג̇תהם מן מצר ביד שדידה

אד̇כר אוליאך אברהים ואסחק ויעקוב ולא תנט̇ר אלי צעובה הד̇א אלקום וטלאחה וכ̇טיתה

כילא יקול אהל אלבלד אלד̇י אכ̇רג̇תנא מנה ממא לם יטק רבהם אן ידכ̇להם אלבלד אלד̇י ועדהם בה מן שנאתה להם אכ̇רג̇הם ליקתלהם פי אלבר

והם קומך וצפותך אלד̇ין אכ̇רג̇תהם בקותך אלעט̇ימה וד̇ראעך אלממדודה