תפסיר רס"ג, דברים ח

וג̇מיע אלוצאיא אלתי אמרך בהא אליום אחפט̇והא ואעמלו בהא לכי תחיו ותכת̇רו ותדכ̇לו ותחוזו אלבלד אלד̇י קסם אללה לאבאיכם

ואד̇כר ג̇מיע אלטריק אלד̇י סירך רבך פי אלבר הד̇ה ארבעין סנה ליתעבך וימתחנך ויט̇הר ללנאס מא פי קלבך אתחפט̇ וצאיאה אם לא

ואתעבך ואג̇אעך פאטעמך אלמן אלד̇י לם תערפה ולם יערפה אבאוך לכי יערפך אנה ליס עלי אלכ̇בז וחדה יחיא אלאנסאן בל עלי ג̇מיע קול אללה יעיש

ות̇יאבך לם תבל ורג̇לך לם תחף פי הד̇ה אלארבעין אלסנה

פאעלם פי נפסך אנה כמא יודב אלמר ולדה אללה רבך מודבך

פאחפט̇ וצאיאה וסר פי טרקה וכ̇פה

פאן אללה רבך מדכ̇לך אלי בלד ג̇יד בלד אודיה מא ועיון וגמר תפג̇ר פי בקאעה וג̇באלה

בלד חנטה ושעיר וג̇פן ותין ורמאן בלד זיתון זית ועסל

בלד לא תאכל פיה טעאמך בתקדיר ולא יעוזך פיה שיא בלד מן חג̇ארתה אלחדיד ומן ג̇באלה תקטע אלנחאס

פאד̇א אכלת ושבעת פבארך אללה רבך עלי אלבלד אלג̇יד אלד̇י אעטאך

ואחד̇ר אן תנסא אללה רבך פלא תחפט̇ וצאיאה ואחכאמה ורסומה אלתי אמרך בהא אליום

כילא תאכל ותשבע ותבני ביותא חסאנא פתסכנהא

ובקרך וגנמך יכת̇רון ופצ̇ה וד̇הב יכת̇ר לך וג̇מיע מא לך יכת̇ר

פירתפע קלבך פתנסא אללה רבך אלד̇י אכ̇רג̇ך מן בלד מצר מן בית אלעבודיה

אלמסלכך פי אלבר אלכביר אלמכ̇יף חית̇ אלחיאת אלמחרקה ואלעקארב ועטש חית̇ ליס מא אלמכ̇רג̇ לך מאא מן אלצואן אלצלד

אלמטעמך אלמן פי אלבר מא לם יערף אבאוך ליעד̇בך וימתחנך ויעוצ̇ך כ̇ירא פי אכ̇רתך

ולא תקל פי נפסך אן קותי ועט̇ם קדרתי אכתסבת לי הד̇א אליסאר

בל אד̇כר אללה רבך פאנה אלמעטיך קוה תכתסב בהא אליסאר לכי יפי בעהדהא אלד̇י קסם לאבאיך כיומנא הד̇א

פאן נסית אללה רבך ומצ̇ית פעבדת מעבודאת אכ̇ר וסג̇דת להא פקד ערפתכם מן אליום אנכם תבידון

כאלאמם אלד̇ין אללה מבידהם מן בין ידיכם כד̇לך תובדון אד̇ לא תקבלו אמר אללה רבכם