תפסיר רס"ג, דברים י

פי ד̇לך אלוקת קאל אללה לי אנחת לך לוחי אלג̇והר כאלאולין ואצעד בהמא אלי אלג̇בל וקד צנעת צנדוקא מן כ̇שב

חתי אכתב עליהמא אלכלמאת אלתי כאנת עלי אללוחין אלאולין אללד̇ין כסרתהמא וצירהמא פי אלצנדוק

פצנעת צנדוקא מן כ̇שב אלסנט ונחת לוחי אלג̇והר כאלאולין וצעדת אלי אלג̇בל והמא פי ידי

פכתב עליהמא כאלכתאב אלאול אלעשר אלכלמאת אלתי כלמכם אללה בהא פי אלג̇בל מן וסט אלנאר פי יום אלג̇וק ודפעהמא אלי

ת̇ם ולית פנזלת מן אלג̇בל וצירת אללוחין פי אלצנדוק אלד̇י צנעתה פבקיא ת̇ם כמא אמרני אללה

ולמא שפעני פי הרון אקאם אלי אן רחל בנו אסראיל מן בארות בני יעקן אלי מוסרה ת̇ם מאת הרון ודפן ת̇ם ואם אלעזר אבנה מכאנה

ורחלו מן ת̇ם אלי גדגד ומנהא אלי יטבת ארץ̇ ד̇את אודיה מא

פי ד̇לך אלוקת אפרז אללה סבט לוי ליחמלו צנדוק עהד אללה ויקימון בין ידיה פיכ̇דמוה ויבארכו באסמה אלי יומנא הד̇א למא אסעפוני

ולד̇לך לם יכן לליואניין נציב ונחלה מע אכ̇ותהם בל הבאת אללה הי נציבהם כמא אמר בהא להם

ואנא אקמת פי אלג̇בל מת̇ל אלמרה אלאולי ארבעין יומא וארבעין לילה פסמע אללה פי ד̇לך אלוקת איצ̇א ושא אלא יהלכך

וקאל אללה לי קם פאמץ̇ בין ידי אלקום פרחלהם חתי ימצ̇ון פירת̇ון אלבלד אלד̇י קסמת לאבאיהם אן אעטיהם

ואלאן יא אסראיל מא אללה רבך יטלב מנך אלא אן תכ̇אפה ותסיר פי טרקה ותחבה ותעבדה מכ̇לצא בכל קלבך וכל נפסך

ותחפט̇ וצאיאה ורסומה אלתי אמרך בהא אליום ליכ̇אר לך

והוד̇א ללה רבך אלסמאואת כלהא ואלארץ̇ וכל מא פיהא

לכנה אצטפא אבאך פאחבהם ואכ̇תאר בניהם מן בעדהם ואנתם הם מן בין אלאמם כמא תשאהדון

פאזילו גש קלובכם ורקאבכם לא תצעבוהא אבדא

לאן אללה רבכם הו רב אלארבאב וסיד אלאסיאד אלטאיק אלכביר אלג̇באר אלמכ̇יף אלד̇י לא יחאבי אלוג̇וה ולא יאכ̇ד̇ רשוה

צאנע חכם אליתים וארמלה ומחב אלגריב ירזק לה טעאמא וכסוה

ואחבו אלגריב פטאלמא כנתם גרבא פי בלד מצר

וכ̇ף אללה רבך ואעבדה ואלזמה ואחלף באסמה בארא

הו מדחתך והו אלאהך כמא צנע מעך תלך אלכבאיר ואלמהאיב אלתי ראתהא עינאך

פמנהא אן אבאך נזלו מצר בסבעין נפסא ואלאן פקד צירך אללה רבך ככואכב אלסמא כת̇רה