תפסיר רס"ג, דברים לג

והד̇ה אלברכאת אלתי בארך בהא מוסי רסול אללה בני אסראיל קבל מותה

וקאל אללהם אלד̇י תג̇לי לנא מן טור סיני ואשרק בנורה מן ג̇בל שעיר ולוח בה מן ג̇בל פארן ואתי רבואת אלקדס בשריעה נור מן ימינה להם

ואחתבא איצ̇א שעבא פג̇מיע כ̇ואצהם פי טאעתך והם יקפון את̇ארך ויתנאקלון כלמאתך

אללהם אלד̇י אמר לנא מוסי באלתוריה פג̇עלהא וראת̇ה לג̇וקה יעקוב

וכאן מלכא פי אלמוצוף חין תג̇תמע אליה ריאסה וסאיר אסבאטה

אסאלך אן יחיא אלראובן ולא ימות ולא יציר רהטה ד̇א אחצא

והד̇א מא קאל ליהודה אללהם אסמע צות יהודה ורדה אלי קומה מן גזוה ואג̇על ידיה מנתצפתין לה וכן לה עונא עלי אעדאיה

וקאל ללוי אללהם אלד̇י אנחלת צחאיחך ואנוארך ללרג̇ל אלד̇י הו בארך וקד אמתחנתה פי ד̇את אלמחנה ואכ̇צמתה פי מא אלכ̇צומה

פוג̇דתה אלקאיל ען אביה ואמה כאנה לם יראהם ולם ית̇בת אכ̇ותה ולם יעתרף בבניה ממא חרסו מקאלתך והם יחפט̇ון עהדך

והם יפתון פי אחכאמך לאל יעקוב ופי תוראתך לאל אסראיל ויצירון אלבכ̇ור בין ידיך ואלכמאל עלי מד̇בחך

אללהם כד̇אך פבארך פי ג̇נדה וארץ̇ מא תצנעה ידאה ואוהן אחקא מקאומיה ושאניה מן אן יקאומוה

וקאל לבנימין אד̇ הו ודיד אללה סיסכן ואת̇קא בה והו יטוף בה טול אלזמאן ובין ט̇הראניה יסכן

וקאל ליוסף אללהם פבארך פי בלדה מן מלאד̇ סמאואתך וטלהא מן אלגמור אלגאיציה אלספלי

ומן מלאד̇ אלגלאת אלשמסיה ומלאד̇ אלחבוב אלקמריה

ומן אצול אלג̇באל אלאוליה ומן פרוע אליפאע אלדהריה

ומן נעמה אלארץ̇ באסרהא ורצ̇א סאכן אלסנא יחל ג̇מיע ד̇לך בראס יוסף ובהאמה נאסך אכ̇ותה

וליכן אלבהא ללממת̇ל בבכר ת̇ורה פתציר קרונה כקרון אלכרכדאן חתי ינטח בהא אלאמם אלי אקטאר אלארץ̇ ושרחהא אנהא רבואת אפרים ואלוף מנשה

וקאל לזבולן אפרח יא זבולן פי אספארך ואנת יא יששכר פי מנאזלך

פאן אלאמם אלי ג̇בלכמא תחצ̇ר ותד̇בח פיה ד̇באיח עאדלה פהם גרק אלבחאר ירצ̇עון ודפאין אלרמל יכנזוהא

ולגד קאל תבארך אלמוסע לה בלדה פהו כלבו יסכנהא אלד̇י ידק אלד̇ראע מע אלהאמה

ואנה ראי פי אול בלדה אן יכון ג̇וקה אלראסמין הנאך מכנוזה פאתי ריסא אלקום פתלמד̇הם וצנע בעדל אללה ואחכאמה מע סאיר אלאסראיל

ולדן קאל כן יא דן כשבל אלאסד בקוה אד̇א יערץ̇ מן אלבת̇ניה

ולנפתלי קאל יא נפתלי אסתכת̇ר מן אלרצ̇א וכן ממלוא מן ברכה אללה וחז מן אלארץ̇ גרבא וג̇נובא

ולאשר קאל כן מבארכא מן אלאוליא יא אשר אלד̇י סיכון רצ̇א אכ̇ותה וגאמסא פי אלדהן קדמה

תכון מן אלחדיד ואלנחאס מגאלקך ולתכן כאיאמך הד̇ה שג̇אעתך

ליס אללה אלא אלאה אסראיל אלד̇י ליס כמת̇לה סאכן אלסמא ואלשואהק בקדרתה פי עונך

והו אלוטן אלאלאה אלאזלי ומן דונה מלוך אלעאלם כמא טרד מן בין ידיך אלעדו וקאל לך אנפד̇ה

חתי סכן בעץ̇ אלאסראיל ואת̇קא מנפרדא נט̇יר קול יעקוב פי בלד ד̇י בר ועציר ואיצ̇א סמאוה תדר טלא

פטובאך יא נסל אסראיל מן מת̇לך שעב מגאת̇ באללה והו תרסך ועונך וסיפך ואקתדארך פיכ̇צ̇ע אעדאוך לך ואנת תטא עלי קמאקמהם