תפסיר רס"ג, דברים לב

ינצת אהל אלסמאואת חתי אתכלם ויסמע אהל אלארץ̇ אקואל פאי

וידר כאלמטר בת̇י ותהטל כאלטל מקאלתי כאלטש עלי אלכלא וכאלרד̇אד̇ עלי אלעשב

לאני אדעוכם באסם אללה פאעטו אלכבריא לרבנא

אלכ̇אלק אלצחיח פעלה אלד̇י ג̇מיע סירה באלחכם אלטאיק ד̇ו אלאמאנה לא ג̇ור ענדה הו אלעדל אלמסתקים

אפסד אמאמה לא כאוליאה לכן אלמעיבין אלג̇יל אלעסר אלמנפתל

אללה תכאפון בהד̇ה אלאפעאל יא שעב ג̇אהל גיר חכים אליס הו מנשיך קאניך הו צנעך ואתקנך

אד̇כר איאם אלדהר פתפהם סנין ג̇יל וג̇יל סל אבאך ויכ̇ברך אשיאכ̇ך ויקולון לך

אן אלעאלי מן חית̇ אנחל אלאמם ופרק בני אדם אוקף מן תכ̇ם אלאמם אחצא בני אסראיל

לאן צפוה אללה שעבה אליעקוב פצ̇לה וכ̇אצתה

כפאה פי ארץ̇ אלבריה ופי תיה פלאה אלסמאואה אחאט בה ופהמה וחפט̇ה כג̇נין עינה

כאלנסר ית̇ייר עלי וכרה ועלי ג̇ואזלה ירפרף יבסט ג̇נאחיה פיאכ̇ד̇הם ויחמלהם עלי רישה

כד̇אך אללה סירה פראדא וליס מעה מעבודאת אכ̇ר

וארכבה עלי קמאקם אלארץ̇ חתי אכל מן נמו אלריאץ̇ וכאנה ארצ̇עה אללבן מן אלחג̇ר ואלעסל מן אלצואן אלצלדי

סמן אלבקר ולבן אלגנם מע שחום אלכ̇ראף וכבאש בני אלבת̇ניה ואלעתדאן מע לב דרמך אלחנטה וכאן דם אלענב ישרבה כ̇מרא

פלמא סמן אלמוצוף כד̇אך בטר אד̇ קיל לה קד סמנת וגלט̇ת וג̇סות פתרך אלאלאה אלד̇י צנעה ואמתחן מעתמד גות̇ה

ואגארוה באג̇נביין ובמכארה יגצ̇בונה

יד̇בחון ללשיאטין וליסת באלהה והי מעבודאת לם יערפוהא ג̇דד ג̇את מן קריב ולם יעב בהא אכ̇יאר אבאיכם

פקיל לה אלכ̇אלק אלמנשיך תנסי ואלטאיק אלמבתדיך

פלמא ראי ד̇לך אללה פרפצ̇הם ממא אגצ̇בוה מנהם אלבנון ואלבנאת

פקאל אחג̇ב רחמתי ענהם אוריהם מא עאקבתהם לאנהם ג̇יל מתקלב בנון לא אמאנה פיהם

כמא אנהם אכאדוני בגיר אלאה ואגצ̇בוני בגרוראתהם כד̇אך אני אכידהם בלא שעב ובקביל ג̇אהל אגיט̇הם

לאן אלנאר תנקדח מן גצ̇בי פתתוקד אלי אספל אלת̇רי ותאכל אלארץ̇ ונבאתהא חתי תסטע אסאס אלג̇בל

כד̇אך אזידהם שרורא וסהאמי אפרקהא פיהם

סג̇אר אלג̇וע וחמי אלוהג̇ וחתף אלמר ואסנאן אלבהאים אטלקהא פיהם מע חמיה זואחל אלתראב

וסיף מת̇כל מן כ̇ארג̇ והיבה מן אלכ̇דור חתי אלשאב חתי אלעאתק ואלרצ̇יע מע ד̇וי אלשיבה כ̇אפה

ולקד קלת אתקצאהם באסתחקאק ואעטל מן בין אלנאס ד̇כרהם

לולא אנא אחד̇ר להם כיד אלעדו לילא ינכר ד̇לך אעדאוהם כילא יקולו ידנא קד עלת וליס אללה פעל בהם כל הד̇ה אלאמור

לאנהם קביל מצ̇יע אלחכמה וליס פיהם פהם

ולו תחכמו לעקלו כ̇לה יפהמון בהא עאקבתהם

והו אן יקולו כיף יקלב אלואחד אלפא ואת̇נאן יהרבון רבוה לולא אן מעתמדהם אסלמהם ואללה אמכן מנהם

אנה ליס כמעתמדנא מעתמדהם ולא אעדאונא יפקהון

אנהם יעאקבון כאן מן ג̇פן סדום ג̇פנהם ומן דואלי עמרה כד̇אך ענבהם ענאב אלסם וענאקידהם מרה להם

וכחמיה אלתנאנין כ̇מרהם וסם אלרקש מנהא אלצ̇אריה

אלא אן ג̇מיע ד̇לך מכנוז ענדי ומכ̇תום פי כ̇זאיני

ולי אלאנתקאם ואלתופיה פי וקת תזול אקדאמהם אנה מא אקרב יום תעסהם ואסרע אלמעדאת להם

אד̇ יחכם אללה לשעבה וען עבידה יצפח אד̇א ראי אן אלמקדרה קד ד̇הבת וכ̇לא אלמחבוס ואלמתרוך ג̇מיעא מן סכ̇טהם

וקאל אלעדו אין אלאההם אלמעתמד אלד̇י אסתכנו אליה

אלד̇ין כאנו יאכלון שחום ד̇באיחהם וישרבון כ̇מר מזאג̇הם יקומו אלאן פיעינוכם ויכונו עליכם ג̇נה

אנט̇רו אלאן אנני הו וחדי וליס אלאה מעי אנא אמית ואחיי כמא טאלמא קד אוהנת ולם אזל אשפי וליס מן ידי מכ̇לץ

ואנא אקסם באלסמא ואקול ובקאי אלדאים

לאסנן בריק סיפי ותמסך אלחכם ידי וארד אלאנתקאם לאעדאיי ואלמכאפה עלי שאניי

פכאני אסכר סהאמי מן דמאהם וסיפי יאכל לחומהם פירוי מן דם אלצריע ואלסבי מן רוס פראענה אלאעדא

אמדחו יאיהא אלאמם שעבה לאנה ינתקם דם עבידה פירד תלך אלנקמה עלי אעדאיה ויגפר לבלאדה ושעבה

ואתי מוסי וכלם אלקום בהד̇ה אלתסביחה הו ויושע בן נון

פלמא פרג מוסי ליכלם ג̇מיע הד̇ה אלכלמאת אלי ג̇מיע אסראיל

קאל להם רדו באלכם אלי ג̇מיע אלכלאם אלד̇י אנא שאהדכם בה אליום לתאמרו בה בניכם פיחפט̇ו ויעמלו ג̇מיע אמור הד̇ה אלתוריה

לאנה ליס בכלאם פארג הו ענכם בל הי חיאתכם ובה תטול מדתכם פי אלבלד אלד̇י אנתם ג̇איזון אלארדן אליה לתחוזוה

ת̇ם כלם אללה מוסי פי ד̇את ד̇לך אליום קאילא

אצעד אלי ג̇בל אלעברין הד̇א ג̇בל נבו אלד̇י פי בלד מואב אלד̇י בחצ̇רה יריחו ואנט̇ר אלבלד אלד̇י אנא מעטיה לבני אסראיל חוזא

ומת פי אלג̇בל אלד̇י אנת צאעד אליה ואנצ̇ם אלי קומך כמא מאת הרון אכ̇וך פי ג̇בל הר ואנצ̇ם אלי קומה

עלי מא נכת̇תמא אלאמה בי פי מא כ̇צומה רקים פי בריה סין ולם תקדסאני פי מא בינהם

לד̇לך תנט̇ר אלארץ̇ אלתי אעטיתהא לבני אסראיל מן אלמקאבלה ולא תדכ̇ל אליהא