תפסיר רס"ג, דברים לד

ת̇ם צעד מוסי מן בידאת מואב אלי ג̇בל נבו ראס אלקלעה אלתי בחצ̇רה יריחו פאוראה אללה ג̇מיע אלבלד מן ג̇רש אלי באניאס

וג̇מיע בלד נפתלי ואפרים ומנשה וג̇מיע בלד יהודה אלי אלבחר אלגרבי

ואלדארום ואלמרג̇ בקיע יריחו קריה אלנכ̇ל אלי זגר

וקאל לה הד̇א אלבלד אלד̇י אקסמת לאברהים ואסחק ויעקוב קאילא לנסלכם אעטיה אוריתך בעיניך ואלי ת̇ם לא תג̇וז

פמאת ת̇ם מוסי רסול אללה פי בלד מואב באמר אללה

ודפנה פי אלואדי פי בלד מואב ממא ילי בית פעור ולם יעלם אחד בקברה אלי יומנא הד̇א

ומוסי אבן מאיה ועשרין סנה אד̇ מאת לם תדמס עינה ולם תזל רטובתה

פבכי בנו אסראיל עלי מוסי פי בידאת מואב ת̇לאת̇ין יומא אלי אן אנקצ̇ת איאם חזנה

ויהושע בן נון מלי רוח אלחכמה ממא אסנד מוסי ידיה עליה פקבל מנה בנו אסראיל וצנעו כמא אמר אללה מוסי

ולא יקום בעד ד̇לך נבי לאל אסראיל כמוסי לאן ערפה אללה משאפהה

ולסאיר אלאיאת ואלבראהין אלתי בעת̇ אללה בהא מוסי פצנעהא פי בלד מצר לפרעון ולג̇מיע קואדה ולסאיר אהל בלדה

ולג̇מיע אלאידי אלשדידה וסאיר אלמכ̇אוף אלעט̇ימה אלתי צנעהא מוסי בחצ̇רה ג̇מיע אלאסראיל