תפסיר רס"ג, דברים לא

ת̇ם מצ̇י מוסי וכלם בני אסראיל בג̇מיע הד̇ה אלכלמאת

וקאל להם אנא אליום אבן מאיה ועשרין סנה לא אטיק זיאדה עלי אלדכ̇ול ואלכ̇רוג̇ ואללה קד קאל לי אנך לא תעבר הד̇א אלארדן

אן אללה רבך אלד̇י נורה ג̇איז בין ידיך הו ינפד̇ האולי אלאמם מן בין ידיך ותחוזהם יהושע הו יעבר בין ידיך כמא קאל אללה

ויצנע אללה בהם כמא צנע בסיחון ועוג מלכי אלאמורי ובאהל בלדהמא אלד̇ין אנפד̇הם

ויסלמהם אללה בין ידיכם ותצנע בהם כג̇מיע אלוציה אלד̇י אוציתכם

תשדדו ותאידו לא תכ̇אפהם אן אללה רבך נורה סאיר בין ידיך לא ידעך ולא יתרכך

ודעי מוסי ביהושע וקאל לה בחצ̇רה ג̇מיע אסראיל תשדד ותאיד פאנך תדכ̇ל האולי אלקום אלי אלבלד אלד̇י קסם אללה לאבאיהם אן יעטיהם ואנת תנחלה להם

ואללה אלד̇י נורה סאיר בין ידיך הו יכון מעך לא ידעך ולא יתרכך פלא תכ̇ף ולא תרעד

ת̇ם כתב מוסי הד̇ה אלתוריה ודפעהא אלי אלאימה בני לוי אלחאמלין צנדוק עהד אללה ואלי ג̇מיע שיוך̇ אסראיל

פאמרהם מוסי קאילא בעד סבע סנין פי וקת סנה אלתסיב פי חג̇ אלמט̇ל

אד̇א חג̇ ג̇מיע אלאסראיל ליחצ̇רו בין ידי אללה רבך פי אלמוצ̇ע אלד̇י יכ̇תארה תקרא הד̇ה אלתוריה חד̇א ג̇מיע אסראיל בחית̇ יסמעונהא

וד̇אך באן תג̇וק ג̇מיע אלקום אלרג̇אל ואלנסא ואלאטפאל ואלגריב אלד̇י פי מחאלך לכי יסמעו ויתעלמו ויכ̇אפו אללה רבכם ויחפט̇ו ויעמלו בג̇מיע כלאם הד̇ה אלתוריה

ובנוהם אלד̇ין לם יבלגו יסמעו ויתעלמו ליכ̇אפו אללה רבכם טול אלזמאן אלד̇ין אנתם אחיא עלי אלבלד אלד̇י אנתם עאברון אלארדן לתחוזוה

וקאל אללה למוסי הוד̇א דנא אג̇לך לתמות אדע ביהושע וקפא פי כ̇בא אלחצ̇ר חתי אסתכ̇לפה פמצ̇י מוסי ויהושע ווקפא פי כ̇בא אלמחצ̇ר

פתג̇לא אללה פי אלכ̇בא בעמוד גמאם ווקף עלי באבה

פקאל אללה למוסי אנך מנצ̇ג̇ע מע אבאיך וסיקום הד̇א אלשעב פיטגו פי תבע מעבודאת אהל אלבלד אלד̇י הו סאיר אלי ת̇ם פי מא בינהם פיתרכני ויפסך̇ עהדי אלד̇י עאהדתה מעה

פישתד גציבי עליהם פי ד̇לך אליום פאתרכהם ואחג̇ב רחמתי ענהם פיצירון מאכלא ותציבהם שראיר כת̇ירה ומצ̇איק פיקול פי ד̇לך אלזמאן אלא אן ממא ליס נור רבי מעי אצאבתני הד̇ה אלשראיר

ומע ד̇לך אנא מקים עלי חג̇ב רחמתי פי ד̇לך אלזמאן ענהם בסבב אלשר אלד̇י עמל אד̇ ולי אלי מעבודאת אכ̇ר

ואלאן אכתבו לכם הד̇ה אלתסבחה ולקנהא לבני אסראיל חתי תצירהא פי אפואההם לכי תכון לי הד̇ה אלתסבחה שאהדא עליהם

אד̇ אדכ̇להם אלי אלבלד אלד̇י קסמת לאבאיהם והו יפיץ̇ לבנא ועסלא פיאכל קומהם וישבע ויסמן ת̇ם יולי אלי מעבודאת אכ̇ר פיעבדהא וירפצ̇ני ויפסך̇ עהדי

פיכון אד̇א אצאבתהם שראיר כת̇ירה ושדאיד חצ̇רת הד̇ה אלתסבחה בשאהד עליה אד̇ יג̇ב אן לא תנסי מן אפואה נסלה לאני עאלם בכ̇אטרה מן אליום קבל אן אדכ̇לה אלי אלבלד אלד̇י קסמת לה

פכתב מוסי הד̇ה אלתסבחה פי ד̇לך אלוקת ולקנהא בני אסראיל

ת̇ם אסתכ̇לף מוסי יהושע אבן נון וקאל לה תשדד ותאיד לאנך תדכ̇ל בני אסראיל אלבלד אלד̇י קסמת להם ואנא אכון מעך

פלמא פרג מוסי מן כתב ג̇מיע כלאם הד̇ה אללתוריה פי אלספר אלי אן כמלת

אמר מוסי אללואניין חאמלי צנדוק אלשהאדה וקאל להם

כ̇ד̇ו הד̇א אלספר אלתוריה וצירוה אלי ג̇אנב צנדוק עהד אללה רבכם פיכון ת̇ם עליך שאהדא

לאני עאלם כ̇לאפך וצעובה רקבתך הוד̇א ואנא פי אלחיאה מעכם לם תזאלו מכ̇אלפין וכיף בעד מותי

ג̇וקו אלי ג̇מיע שיוך̇ אסבאטכם וערפאכם חתי אכלמהם בהד̇א אלכלאם ואשהד עליהם אלסמא ואלארץ̇

לאני עאלם אנכם בעד מותי סתפסדון ותזולון מן אלטריק אלד̇י אמרתכם בה פיואפיכם אלשר פי אכ̇ר הד̇ה אלאיאם אד̇ תצנעון אלשר בין ידי אללה לתגיט̇וה באעמאל ידיכם

וכלמהם מוסי בג̇מיע כלאם הד̇ה אלתסבחה אלי אן כמלת