תפסיר רס"ג, דברים ל

ויכון אד̇א חלת בך ג̇מיע הד̇ה אלאמור אלברכאת ואללענאת אלתי תלותהא עליך פארג̇ע פי נפסך פי מא בין ג̇מיע אלאמם אלד̇י דחאך אללה רבך ת̇ם

ותב אלי אללה ואקבל קולה כג̇מיע מא אנא אמרך אליום אנת ובניך בכל קלבך ובכל נפסך

פירד אללה רבך סביך וירחמך ויעוד ויג̇מעך מן בין ג̇מיע אלאמם אלד̇י בדדך אללה רבך הנאך

פלו אן דחאך פי טרף אלסמא לג̇מע שמלך אללה מן ת̇ם ולקדמך

וידכ̇לך אללה רבך אלי אלבלד אלד̇י חאזו אבאוך וחזתה ויחסן אליך וית̇מרך ויכת̇רך מן אבאיך

וישרח אללה רבך צדרך וצדר נסלך לתחב אללה בג̇מיע קלבך ונפסך לכי תחיא

ויחל אללה רבך הד̇ה אללענאת עלי אעדאיך ועלי שאניך אלד̇ין כלבוך

ואנת תתוב ותקבל אמר אללה ותצנע ג̇מיע וצאיאה אלתי אנא אמרך אליום

ויזידך אללה כ̇ירא פי ג̇מיע עמל ידך ות̇מר ג̇סמך ות̇מר בהאימך ות̇מר ריאצ̇ך אד̇ ירג̇ע אללה אן יקצד בך כ̇ירא כמא קצד באבאיך

אד̇ תקבל קול אללה רבך לתחפט̇ וצאיאה ורסומה אלמכתובה פי ספר הד̇ה אלתוריה אד̇ תתוב אלי אללה רבך בכל קלבך ונפסך

ואעלם אן הד̇ה אלוצאיא אלתי אנא אמרך בהא אליום ליס הי בכ̇פיה ענך ולא הי בעידה

ליסת הי באלסמא פיקול קאיל מן ד̇א יצעד לנא אלי אלסמא וינזלהא לנא ויסמעונהא ונעמל בהא

וליסת הי מן עבר אלבחר פיקול קאיל מן ד̇א יעבר לנא אלי ג̇אנב אלבחר ויאכ̇ד̇הא לנא ויסמעונהא ונעמל בהא

בל אלאמר קריב אליך ג̇דא ימכנך בפיך ובקלבך לתעמל בה

אנט̇ר קד ג̇עלת בין ידיך אליום אלחיאה ואלכ̇יר ואלמות ואלשר

אלד̇י אמרך אליום לתחב אללה רבך ותסיר פי טרקה ותחפט̇ וצאיאה ורסומה ואחכאמה ותחיא ותכת̇ר ויבארכך אללה רבך פי אלבלד אלד̇י אנת דאכ̇ל אליה לתחוזה

ואן תולי קלבך ולם תחפט̇ ותזול ותסג̇ד למעבודאת אכ̇ר ותעבדהא

פקד אכ̇ברתכם מן אליום באנכם תאבדון ולא תטול מדתכם פי אלבלד אלד̇י אנתם עאברון אלארדן לתסיר אליה לתחוזוה

קד אשהדת עליכם אליום אלסמא ואלארץ̇ אלחיאה ואלמות באני ג̇עלת בין ידיך אלברכאת ואללענאת וארי לך אן תכ̇תאר אלחיאה לכי תחיא אנת ונסלך

וד̇לך לתחב אללה רבך ותקבל קולה ותלזם טאעתה אד̇ הי חיאתך וטול איאמך לתקים עלי אלארץ̇ אלתי קסם אללה לאבאיך אברהים ואסחק ויעקוב אן יעטיהם