תפסיר רס"ג, דברים כט

ת̇ם דעי מוסי בג̇מיע בני אסראיל וקאל להם אנתם שאהדתם ג̇מיע מא צנע אללה בחצ̇רתכם פי בלד מצר בפרעון וג̇מיע קואדה וסאיר אהל בלדה

אלאעלאם אלעט̇אם אלתי ראתהא עינאך ותלך אלאיאת ואלבראהין אלעט̇ימה

ולם יעטכם אללה קלבא לתעלמו ועיונא תנט̇רו ואד̇אנא תסמעו אלי הד̇א אליום

וסירתכם ארבעין סנה פי אלבר ת̇יאבכם לם תבל עליכם ונעאלכם עלי ארג̇אלכם

וטעאמכם אלד̇י אעתדתמוה לם תאכלוה וכ̇מרא ומסכרא לם תשרבו לכי תעלמו אנא אללה רבכם

ת̇ם ג̇יתם אלי הד̇א אלמוצ̇ע וכ̇רג̇ סיחון מלך חשבון ועוג מלך אלבת̇ניה תלקנא ללחרב פקתלנאהמא

ואכ̇ד̇נא בלדהמא ודפענאהא נחלה ללראובניין וללגדיין ונצף סבט מנשה

פאחפט̇ו כלאם הד̇א אלעהד ואעמלו בה לכי תנג̇חו פי ג̇מיע מא תצנעון

אנתם וקוף אליום כלכם בין ידי אללה רבכם ריאסכם ואסבאטכם ושיוכ̇כם וערפאכם וג̇מיע אלאסראיל

ואטפאלכם ונסאכם ואלגריב אלד̇י פי וסט עסכרך מן מחתטב חטבך אלי מסתקי מאך

לאדכ̇לך פי עהד אללה רבך ופי חרג̇ה אלד̇י אללה עאהד מעך אליום

לכי ית̇בתך אליום לה לאמה והו יכון לך אלאהא כמא ועדך וכמא קסם לאבאיך לאברהים ואסחק ויעקוב

וליס מעכם וחדכם אנא עאהד הד̇א אלעהד והד̇א אלחרג̇

אלא מע מן הו מוג̇וד חאצ̇ר אליום בין ידי אללה רבך ומע מן ליס מענא אליום

ואנתם עלמתם מא אקמנא פי בלד מצר ומא ג̇זנא פי מא בין אלאמם אלד̇ין ג̇זתם בינהם

וראיתם ארג̇אסהם וטואגיתהם מן כ̇שב וחג̇ארה ופצ̇ה וד̇הב אלתי מעהם

כילא יוג̇ד פיכם רג̇ל או אמראה או עשירה או סבט מן קלבה מאיל אליום ען טאעה אללה רבנא לימצ̇י ויעבד מעבדאת אלתי לאולאיך אלאמם כילא יוג̇ד פיכם אצל מת̇מר סם או עלקם

פאד̇א סמע הד̇א אלחרג̇ קדר פי נפסה קאילא לא יכון לי אלא סלאם אד̇ אנמא אסיר מע הוי קלבי לכי אמד באלרוא אלעטש

פלא ישא אללה אן יגפר לה ד̇לך בל חיניד̇ ישתד גצ̇ב אללה וחמיתה פי ד̇לך אלרג̇ל וילזק בה ג̇מיע הד̇א אלחרג̇ אלמכתוב פי הד̇א אלספר וימחו אללה אסמה מן תחת אלסמא

ויפרדה אללה עלי שר מן ג̇מיע אסבאט אסראיל כג̇מיע חרג̇ הד̇א אלעהד אלמכתוב פי ספר הד̇ה אלתוריה

חתי יקול אלג̇יל אלאכ̇ר מן בניכם אלד̇ין יקומן מן בעדכם ואלגריב אלד̇י יאתי מן בלד בעיד פינט̇רון צ̇רבאת תלך אלארץ̇ ואמראצ̇הא אלתי אמרצ̇הא אללה

חתי כאן ג̇מיע ארצ̇הא מחרקה בכברית ונאר לא תזרע ולא תנבת ולא יטלע פיהא שי מן אלעשב כמקלב סדום ועמורה אדמה וצבוים אלתי קלב אללה בגצ̇בה וחמיתה

ויקול ג̇מיע אלאמם למא ד̇א צנע אללה כד̇לך לתלך אלארץ̇ ומא סבב שדה אלגצ̇ב אלעט̇ים הד̇ה

פיג̇אבון באן ד̇לך עלי מא תרכו אללה אלאה אבאיהם אלד̇י עהד מעהם חין אכ̇רג̇הם מן בלד מצר

ומצ̇ו ועבדו מעבודאת אכ̇ר וסג̇דו להא מעבודאת לם יערפוהא ולם תנצב להם נציבא

ואשתד גצ̇ב אללה עלי ד̇לך אלבלד ליאתי עליהא ג̇מיע אללענה אלמכתובה פי הד̇א אלספר

פקלעהם אללה מן בלדה בגצ̇ב וחמיה ובסכ̇ט עט̇ים וטרחהם אלי בלד אכ̇ר כמא תרונהם אליום

פיעתברון פיקולון כד̇אך אלמסתוראת ללה רבנא ואלמכשופאת אלתי הי אלינא ולבנינא אלי אלדהר פי אן נעמל ג̇מיע הד̇ה אלתוריה ג̇מיעא