תפסיר רס"ג, דברים כח

ואעלם אנך אן סמעת ואטעת אמר אללה רבך לתחפט̇ ותעמל ג̇מיע וצאיאה אלתי אמרך בהא אליום יג̇עלך אללה רבך עאליא עלי סאיר אמם אלארץ̇

וחלת בך הד̇ה אלברכאת ואדרכתך אד̇א סמעת אמר אללה רבך

וכנת מבארכא פי אלחצ̇ר ומבארכא פי אלבר

מבארכא ת̇מר בטנך ות̇מר ריאצ̇ך ות̇מר בהאימך ונתאג̇ בקרך וגפראת גנמך

ומבארכא מא פי נבאיג̇ך ומעאג̇נך

וצרת מבארכא פי דכ̇ולך ומבארכא פי כ̇רוג̇ך

ויג̇על אללה אעדאך אלמקאומין לך מצדומין בין ידיך פיכ̇רג̇ון אליך פי טריק ואחדה ויהרבון מן בין ידיך פי סבע טרק

ויאמר אללה בברכתה פי אהראיך ופי ג̇מיע ממדוד ידך ויבארך לך פי אלבלד אלד̇י אללה רבך מעטיך

וינצבך אללה לה שעבא מקדסא כמא ועדך אד̇ תחפט̇ וצאיאה ותסיר פי טרקה

פינט̇ר ג̇מיע אלאמם אן אסם אללה קד סמי עליך פיכ̇אפונך

ויזידך אללה כ̇ירא פי ת̇מר ג̇סמך ות̇מר ריאצ̇ך ות̇מר בהאימך פי אלבלד אלד̇י קסם לאבאיך אן יעטיך

ויפתח אללה לך כ̇זאין כ̇ירה מן אלסמא פינזל מטר בלדך פי וקתה ויבארך פי ג̇מיע עמל ידיך חתי תקרץ̇ אממא כת̇ירה ואנת פלא תקתרץ̇

ויג̇עלך אללה ראסא ולא ד̇נבא ותכון עאליא מחצ̇א ולא תכון מתספלא אד̇ תקבל וצאיאה אלתי אנא אמרך בהא לתחפט̇הא ותעמל בהא

ולא תזול מן ג̇מיע אלאמור אלתי אמרך בהא אליום ימנה ולא יסרה פתתבע מעבודאת אכ̇ר פתעבדהא

ואן לם תקבל קול אללה רבך לתחפט̇ ותעמל וצאיאה ורסומה אלתי אמרך בהא אליום פחלת בך הד̇ה אללענאת פאדרכתך

וכנת מלעונא פי אלחצ̇ר ומלעונא פי אלבר

ומלעונא מא פי נביג̇תך ומעאג̇נך

ומלעונא ת̇מר בטנך וסאיר ת̇מר ארצ̇ך ונתאג̇ בקרך וגפראת גנמך

וצרת מלעונא פי דכ̇ולך ומלעונא פי כ̇רוג̇ך

ויבעת̇ אללה עליך אלמחק ואלאהאמה ואלזג̇רה פי ג̇מיע ממדוד ידך אלד̇י תצנעה אלי אנפאד̇ך ואבאדתך סריעא מן קבל רדאה שמאילך אד̇ תרכתני

וילזמך אללה אלובא אלי אן יפניך מן אלארץ̇ אלתי אנת דאכ̇ל אליהא לתחוזהא

ויצ̇רבך אללה בחמי אלסל ואלחאדה ואלרבע ואלפאלג̇ ובאלג̇פאף ואלשוב ואלירקאן פיכלבוך אלי אבאדתך

ותכון סמאוך אלתי פוק ראסך כאלנחאס ואלארץ̇ אלתי תחתך כאלחדיד

ויג̇על אללה מא ימטרה עלי ארצ̇ך גבארא ותראבא מן אלסמא יחדר עליך אלי אנפאד̇ך

יג̇עלך אללה מצדומא פי מא בין ידי אעדאיך חתי תכ̇רג̇ אליהם פי טריק ואחדה ותהרב בין ידיהם פי סבע טרק פתציר עברה לג̇מיע ממאלך אלארץ̇

ותציר ג̇ת̇תך מאכלא לטאיר אלסמא ובהאים אלארץ̇ וליס מזעג̇ להא

ויצ̇רבך אללה בקרח מצר ואלבואסיר ואלג̇רב ואלחכה מא לא תסתטיע מדאואתה

יצ̇רבך אללה באלג̇נון ואלעמי ובהתה אלקלב

חתי תציר כמג̇סס פי אלט̇הירה כמא יג̇סס אלאעמי וכ̇אצה פי אלאפלה ולא תנג̇ח טרקך ותציר מגשומא ומגצובא טול זמאנך וליס לך מגית̇

באן תתזוג̇ מראה פיאתיהא רג̇ל אכ̇ר ותבני ביתא ולא תג̇לס פיה ותגרם כרמא פלא תבד̇לה

ויכון ת̇ורך מד̇בוחא חד̇א עיניך פלא תאכל מנה וחמארך מגצובא מן בין ידיך פלא ירג̇ע אליך וגנמך מסלמה אלי אעדאיך וליס לך מגית̇

בנוך ובנאתך מדפועין אלי קום אכ̇רין ועינאך תריאהם שאכ̇צתאן אליהם טול אלזמאן ולא פי ידך טאקה

ות̇מר ארצ̇ך וסאיר כסבך יאכלה קום לם תערפהם ותציר כד̇אך מגשומא מעסופא טול אלזמאן

חתי תציר מעתוהא מן נט̇ר עיניך אלד̇י תראה

ויצ̇רבך אללה בקרח רדי עלי אלרכאב ואלסאקין מא לא תטיק מדאואתה במא יולמך מן קדמך אלי האמתך

ויג̇ליך אללה ומלכך אלד̇י תנצבה לך אלי קום לם תערפהם אנת ואבאוך פתכ̇דם ת̇ם מעבודאת אכ̇ר מן כ̇שב וחג̇ארה

פתציר וחשה ומת̇לה וחכאיה פי ג̇מיע אלאמם אלד̇י יסוקך אללה אלי ת̇ם

אד̇א כ̇רג̇ת בד̇ארא פי אלצחרא כת̇ירא פקליל מא תג̇מע מנה בל יקצמה אלג̇ראד

ואד̇א תגרס כרומא ותפלחהא פלא תשרב מנהא כ̇מרא ולא תועיה בל יאכלה אלדוד

ואד̇א יכון לך זיאתין פי ג̇מיע תכ̇מך פלא תדהן מנהא בדהן בל תנת̇ר נת̇רא

ואד̇א תולד בנינא ובנאת פלא יבקון לך בל יג̇לון פי אלסבי

וג̇מיע שג̇רך ות̇מר ארצ̇ך יקרצ̇ה אלפראש

ואלגריב אלד̇י פימא בינכם ירתפע עליך עליא כבירא ואנת תנחט ספלא הויא

חתי אנה יקרצ̇ך ואנת לא תקרצ̇ה הו יציר ראסא ואנת תציר ד̇נבא

ותחל בך ג̇מיע הד̇ה אללענאת ותכלבך פתדרכך אלי אנפאד̇ך אד̇ לם תקבל אמר רבך פתחפט̇ וצאיאה ורסומה אלתי אמרך בהא

פתציר בך איה וברהאנא ופי נסלך אלמשאבהך אלי אלדהר

ובדל מא לם תעבד אללה רבך בפרח וג̇ודה קלב מן כת̇רה אלאשיא

פתכ̇דם עדוך אלד̇י יסלטה אללה עליך בג̇וע ועטש וערי ועוז כל שי ויצ̇ע אצרא מן חדיד עלי ענקך אלי אן ינפד̇ך

ויגזיך אללה קבילא מן בעיד מן טרף אלארץ̇ כמא יתחלק אלנסר קבילא לא תפהם לגתה

קבילא וקיח אלוג̇ה מן לם יהאב וג̇ה שיך̇ ולא יראף עלי צבי

פיאכל ת̇מר בהאימך ות̇מר ארצ̇ך אלי אנפאד̇ך ולא יבקי לך ברא ולא עצירא ולא דהנא ולא נתאג̇ בקרך וגפראת גנמך אלי אן יבידך

ויחאצרך פי ג̇מיע מחאלך אלי אן יהד אסוארך אלשאמכ̇ה ואלחצינה אלתי אנת ואת̇ק בהא פי ג̇מיע בלדך ויחאצרך פי ג̇מיע מחאלך פי בלדך אלד̇י אעטאך אללה רבך

ותאכל ת̇מר ג̇סדך לחם בניך ובנאתך אלד̇י אעטאך אללה רבך בחצאר וצ̇יק ממא יצ̇יק עליך עדוך

חתי אן אלרג̇ל אלרכ̇ץ מנך ואלמדלל ג̇דא ישח עלי אכ̇יה ואמרתה חרמתה ובאקי בניה אלד̇ין יבקיהם

מן אן יעטי לואחד מנהם מן לחם בניה אלד̇י יאכל ממא לא יבקי לה שיא מן אלחצאר ואלצ̇יק אלד̇י יצ̇יק עליך עדוך פי ג̇מיע מחאלך

חתי אלרכ̇צה מנך ואלמדללה אלתי לם תעוד קדמהא אן תצ̇עה עלי אלארץ̇ מן אלדללה ואלרכ̇צה תשח עלי זוג̇הא חרמהא ואבנהא ובנתהא

ובמשימתהא אלסאקטה מנהא ואג̇ננהא אלתי תרמי בהא תנפרד בהא הי פתאכלהא מן עוז כל שי פי סתר בחצאר וצ̇יק ממא יצ̇יק עליך עדוך פי מחאלך

ואן לם תחפט̇ ותעמל ג̇מיע כלאם הד̇ה אלתוריה אלמכתובה פי הד̇א אלספר אן תכ̇אף אסם אלג̇ליל אלמכ̇וף הוא אללה רבך

פיג̇על אללה צ̇רבאתך עג̇יבה וצ̇רבאת נסלך אלמד̇כורין צ̇רבאת כברי דארה ואמראצ̇א רדיה דארה

וירד עליך ג̇מיע אדוא מצר אלתי חד̇רתהא מן קבלהם פתלזמך

ואיצ̇א כל צ̇רבה ממא ליס מכתובא פי ספר הד̇ה אלתוריה יסלמהא אללה עליך אלי אנפאד̇ך

ותבקו רהטא ד̇א אחצא בדל מא כנתם ככואכב אלסמא כת̇רה אד̇ לם תקבל קול אללה רבך

ויכון כמא קצד אללה בכם אן יחסן אליכם וית̇מרכם כד̇לך יקצד אללה רבכם אן יבידכם וינפד̇כם ותנדרסון ען אלבלד ותנג̇לון ען אלארץ̇ אלתי אנת דאכ̇ל אליהא לתחוזהא

ויבדדך אללה פי ג̇מיע אלאמם מן טרף אלארץ̇ אלי טרפהא פתעבדו ת̇ם מעבודאת אכ̇ר מא לם תערפהא אנת ואבאוך כ̇שבא וחג̇ארה

ופי תלך אלאמם לא תטמאן ולא יכון קראר לקדמך ויעטיך אללה ת̇ם קלבא רג̇זא ושכ̇וץ אלעין וד̇בול אלנפוס

פתכון חיאתך מעלקה חד̇אך ותפזע לילא ונהארא ולא תאמן בחיאתך

תקול באלגדאה יא ליתני אמסית ובאלעשא יא ליתני אצבחת מן פזע קלבך אלד̇י תפזע ומן נט̇ר עיניך אלד̇י תנט̇ר

וירדך אללה אלי מצר פי אלספן פי אלטריק אלתי קלת לך לא תעוד אבדא אן תראה ותערצ̇ון ת̇ם ללביע לאעדאיכם עבידא ואמא וליס משתר

הד̇א כלאם אלעהד אלד̇י אמר אללה מוסי אן יעאהד בני אסראיל פי בלד מואב סוי אלעהד אלד̇י עאהדהם פי חריב