תפסיר רס"ג, דברים כז

ת̇ם אמר מוסי ושיוך̇ אלאסראיל אלקום קאילין אחפט̇ו ג̇מיע אלוציה אלתי אמרכם בהא אליום

פיכון פי יום תעברון אלארדן אלי אלבלד אלד̇י אללה רבך מעטיך אנצב לך חג̇ארה עט̇ימה וביצ̇הא באספידאג̇

ואכתב עליהא ג̇מיע עיון הד̇ה אלתוריה בעד עבורך לכי תפתח אלבלד אלד̇י אללה רבך מעטיך בלד יפיץ̇ לבנא ועסלא כמא ועדך אללה אלאה אבאיך

פמן אול מא תעברון אלארדן תנצבו הד̇ה אלחג̇ארה אלתי אמרכם בהא אליום פי ג̇בל עיבל ותביצ̇והא באספידאג̇

ואבן ת̇ם מד̇בחא ללה רבך מד̇בח חג̇ארה לם תחרך עליהא חדידה

ולתכן מע ד̇לך חג̇ארה צחיחה וקרב עליהא צואעדך ללה רבך

ואד̇בח ד̇באיח סלאמה וכלהא ת̇ם ואפרח בין ידי אללה רבך

ואכתב עלי אחג̇אר ג̇מיע כלאם אלתוריה בינא נעמא

ת̇ם כלם מוסי ואלאימה אללואניון לאל אסראיל קאילין ארכן ואסמע יא אלאסראיל פאנך יומך הד̇א קד צרת שעבא ללה רבך

ואקבל קולה ואעמל ג̇מיע וצאיאה אלתי אמרך בהא אליום

ת̇ם אמר מוסי קומה פי ד̇לך אליום קאילא

האולי יקומון ליבארכו אלאמה עלי ג̇בל גריזים בעד עבורכם אלארדן שמעון ולוי ויהודה ויששכר ויוסף ובנימן

והאולי יקומון עלי אללענה עלי ג̇בל עיבל ראובן גד ואשר זבולון דן ונפתלי

פיבתדו אלליואניון ויקולו לג̇מיע אלאסראיל בצות עאל

מלעון אלרג̇ל אלד̇י יצנע פסלא או מסבוכא למא יכרהה אללה או יתכ̇ד̇ה מן צנעה צאנע פיצירה לה פי פיג̇יבהם ג̇מיע אלקום אמין

ומלעון מסתכ̇ף באביה ואמה ויקול ג̇מיע אלקום אמין

ומלעון מן יסוג תכ̇ם צאחבה ויקול ג̇מיע אלקום אמין

ומלעון מצ̇ל ג̇אהלא פי אלטריק ויקול ג̇מיע אלקום אמין

ומלעון מן ימיל חכם גריב ויתים או ארמלה ויקול ג̇מיע אלקום אמין

ומלעון מן יצ̇אג̇ע זוג̇ה אביה למא כשף כנפה ויקול ג̇מיע אלקום אמין

ומלעון מן יצ̇אג̇ע שיא מן אלבהאים ויקול ג̇מיע אלקום אמין

ומלעון מן יצ̇אג̇ע אכ̇תה בנת אביה או בנת אמה ויקול ג̇מיע אלקום אמין

ומלעון מן יצ̇אג̇ע חמאתה ויקול ג̇מיע אלקום אמין

ומלעון מן יצ̇רב צאחבה סרא ויקול ג̇מיע אלקום אמין

ומלעון מן יאכ̇ד̇ רשוה ליקתל נפסא זכיה ויקול ג̇מיע אלקום אמין

ומלעון מן לא ית̇בת כלאם הד̇ה אלתוריה ליעמל בהא ויקול ג̇מיע אלקום אמין