תפסיר רס"ג, דברים כא

ואן וג̇ד קתיל פי אלבלד אלד̇י אללה מעטיך לתחוזה מטרוח פי אלצחרא לא יערף מן קתלה

פליכ̇רג̇ בעץ̇ שיוכ̇ך וחכאמך וימסחו אלי אלקרי אלתי חואלי אלקתיל

פאיה קריה כאנת אקרב אליה פליאכ̇ד̇ אהלהא עג̇לה מן אלבקר מא לם תפלח ומא לם תמד אלניר

ויחדרוהא אלי ואד צעב מא לם יפלח ולם יזרע ויקפוהא פיה

ת̇ם יתקדם בעץ̇ אלאימה בני לוי לאן אללה רבך אכ̇תארהם ליכ̇דמוה ויבארכו באסמה ועלי קולהם יפצל כל כ̇צומה וכל בלא

פאד̇א גסלו ג̇מיע שיוך̇ תלך אלקריה אלקריבה מן אלקתיל אידיהם עלי אלעג̇לה אלמקפאה פי אלואדי

ואבתדו וקאלו אידינא לם תספך הד̇א אלדם ועיוננא לם תר ד̇לך

ת̇נוהם פקאלו אללהם אגפר לקומך אלאסראיל ולא תדע עליהם עקובה תואן פי דם ברי פיגפר להם מא תואנו פי ד̇לך אלדם

ואנת פאנף קאתלי דם אלברי מן בינכם פאנך תצנע אלמסתקים ענד אללה

ואד̇א כ̇רג̇ת ללחרב עלי אעדאיך פאסלמה אללה רבך פי ידך פסבית סביה

וראית פי אלסביה אמראה חסני אלחליה פשגפת בהא פתכ̇ד̇תהא לך זוג̇ה

באן תדכ̇להא אלי וסט מנזלך ותחלק ראסהא ותרבי אט̇פארהא

ותנזע ת̇יאב סביהא ענהא ותקים ותבכי עלי מד̇הב אביהא ואמהא שהרא ת̇ם בעד ד̇לך תדכ̇ל אליהא פתבתני בהא ותכון לך זוג̇ה

פאן לם תרדהא בעד ד̇לך פאטלקהא חרה לנפסהא וביעא לא תביעהא בת̇מן ולא תסתרקהא בעד מא אתיתהא

ואן כאנת זוג̇תאן לרג̇ל ואחד אחדאהמא מחבובה ואלאכ̇רי משניה פולדתא לה אולאדא וכאן אלאבן אלבכר ללמשניה מנהמא

פפי יום ינחל בניה מא יכון לה פלא יג̇וז לה אן יפצ̇ל אבן אלמחבובה עלי אבן אלמשניה אלבכר

בל יג̇ב עליה אן יערף אלנאס באלבכר אבן אלמשניה ליעטי לה סהמין מן ג̇מיע מא יוג̇ד לה אד̇ הו אול נילה ולה חכם אלבכוריה

ואד̇א כאן לרג̇ל אבן זאיל מכ̇אלף ליס יקבל אמר אביה ואמר אמה ויודבאנה ולם יקבל מנהמא

פליקבץ̇ עליה אבוה ואמה ויכ̇רג̇אה אלי שיוך̇ קריתה ואלי באב חאכם מוצ̇עה

פיקולא להם אבננא הד̇א זאיל מכ̇אלף ליס יקבל אמרנא והו מצרף ומפרט פי אלחראם

פירג̇מוה ג̇מיע אהל קריתה באלחג̇ארה חתי ימות ואנף אהל אלשר מן בינכם וג̇מיע אלאסראיל יסמעון ויכ̇אפון

ואד̇א וג̇בת עלי אנסאן כ̇טיה חכמהא אלקתל פיקתל פאצלבה עלי כ̇שבה

ולא תבת ג̇ת̇תה עליהא בל אדפנה דפנא פי ד̇לך אליום אד̇ צלב למא אפתרא עלי אללה ולא תנג̇ס בלדך אלד̇י אללה רבך מעטיך נחלה