תפסיר רס"ג, דברים כב

לא תר ת̇ור אכ̇יך או שאתה צ̇אלין פתתגאפל ענהמא בל רדהמא עליה רדא

ואן לם יכן אכ̇יך קריבא אליך או לם תערפה פצים ד̇לך אלי ממלך ויכון ענדך אלי אן ילתמסה אכ̇וך פתרדה עליה

וכד̇א פאצנע בחמארה ובת̇ובה ובסאיר צ̇אל אכ̇יך אלד̇י תצ̇יע מנה פתג̇דהא ולא יחל לך אן תתגאפל ענהא

לא תר חמאר אכ̇יך או ת̇ורה ואקעין פי אלטריק ותתגאפל ענהמא בל אקמהמא מעה אקאמה

לא תכן אלאת אלרג̇אל עלי אלנסא ולא ילבס אלרג̇ל זי אלנסא לאן אללה רבך יכרה כל מן יצנע ד̇לך

ואד̇א ואפית וכרא מן אלטאיר פי אלטריק או פי אלשג̇ר או עלי אלארץ̇ פיה פראך̇ או ביץ̇ ואלאם ראבצ̇ה עליהם פלא תאכ̇ד̇ אלאם מע אלבנין

בל אטלק אלאם אטלאקא וכ̇ד̇ אלבנין לנפסך לכי יכ̇אר לך ותטול איאמך

ואד̇א בנית ביתא ג̇דידא פאצנע דראבזין עלי סטחך ולא תג̇על גררא פי מנזלך יסקט מנה מן יסקט

לא תזרע כרמך מן נועין כילא תחרם עליך סלאפה אלזרע אלד̇י תזרעה מע גלה אלכרם

לא תצ̇מד אלת̇ור ואלחמאר ג̇מיעא

לא תלבס ת̇ובא מכ̇תלטא מן צוף וכתאן ג̇מיעא

ואצנע לך ג̇דאילא פי ארבעה אטראף אזארך אלד̇י תתגטא בה

ואן תזוג̇ רג̇ל במראה ודכ̇ל בהא ת̇ם שנאהא

פג̇על להא עללא מן אלכלאם ואכ̇רג̇ עליהא אסמא רדיא פקאל אני תזוג̇ת בהד̇ה אלמראה פדנית מנהא פלם אג̇ד להא בראה

ת̇ם אכ̇ד̇ אבוהא או אמהא אלבראה ואכ̇רג̇אהא אלי שיוך̇ אלקריה ואלי באב אלחאכם

פקאל אבוהא ללשיוך̇ אני זוג̇ת בנתי להד̇א אלרג̇ל פשנאהא

והוד̇א קד ג̇על להא עללא מן אלכלאם פקאל לם אג̇ד להא בראה והד̇ה בראה בנתי ובסטו אלמנדיל או מקאמה בין ידיהם

פליאכ̇ד̇ו שיוך̇ אלקריה אלרג̇ל יודבוה

ויג̇רמוה מיאה דרהם פצ̇ה וידפעוהא אלי אבי אלג̇אריה למא אכ̇רג̇ אסמא רדיא עלי בכר אסראיל ותכון לה זוג̇ה ולא יג̇וז לה טלאקהא טול עמרה

ואן כאן אלאמר חקא ולא תוג̇ד ללג̇אריה בראה

פלתכ̇רג̇ אלג̇אריה אלי באב בית אביהא וירג̇מוהא ג̇מיע אהל קריתהא באלחג̇ארה אלי אן תמות למא צנעת חסיסה פי אלאסראיל ופג̇רת מחצנהא פי בית אביהא פאנף אהל אלשר מן בינכם

ואן וג̇ד רג̇ל מצ̇אג̇ע אמראה ד̇את אלבעל פליקתלא ג̇מיעא אלרג̇ל אלמצ̇אג̇עהא והי ואנף אהל אלשר מן אלאסראיל

ואד̇א כאנת ג̇אריה בכר ממלכה לרג̇ל פוג̇דהא רג̇ל פי אלקריה פצ̇אג̇עהא

פאכ̇רג̇והמא ג̇מיעא אלי באב תלך אלקריה וארג̇מוהמא באלחג̇ארה חתי ימותא אמא אלג̇אריה פבסבב מא לם תצרך̇ והי פי אלקריה ואמא אלרג̇ל פבסבב מא אתי זוג̇ה צאחבה ואנף אהל אלשר מן בינכם

ואן וג̇ד אלרג̇ל אלג̇אריה אלממלכה פי אלצחרא פאמסכהא וצ̇אג̇עהא פליקתל ד̇לך אלרג̇ל אלמצ̇אג̇עהא וחדה

ולא תצנע בהא שיא אד̇ ליס להא כ̇ט̇יה תוג̇ב אלקתל ואנמא מת̇ל אמרהא הד̇א כמן יקום עלי צאחבה פיצ̇רבה פיפיתה רוחה

ואד̇ וג̇דהא פי אלצחרא פימכן אן תכון קד צרכ̇ת פלם יכן לה מגית̇

ואד̇א וג̇ד רג̇ל ג̇אריה בכרא מא לם תמלך פצ̇בטהא פצ̇אג̇עהא פוג̇דא

פליעט ד̇לך אלרג̇ל לאביהא כ̇מסין דרהמא ותכון לה זוג̇ה בדל מא אתאהא ולא יג̇וז לה טלאקהא טול עמרה