תפסיר רס"ג, דברים כ

ואד̇א כ̇רג̇ת ללחרב עלי אעדאיך פראית כ̇יולא ומראכב קומא אכת̇ר מנך פלא תכ̇אפהם פאן אללה רבך מעך אלמצעדך מן בלד מצר

וענד תקדמכם אלי אלחרב פליתקדם אלאמאם ויכ̇אטב אלקום

ויקול להם אסמעו יא אלאסראיל אנתם אליום מתקדמון אלי אלחרב עלי אעדאיכם פלא תרק קלובכם ולא תכ̇אפו ולא תפזעו ולא תרהבו מנהם

לאן אללה רבכם אלסאלך נורה מעכם יחארב לכם אעדאכם ויגית̇כם

ת̇ם יכלם אלערפא אלקום קאילין אי רג̇ל בנא ביתא ג̇דידא ולם ידשנה פלימץ̇ וירג̇ע אלי מנזלה כילא יקתל פי אלחרב ורג̇ל אכ̇ר ידשנה

ואי רג̇ל גרס כרמא ולם יבד̇לה פלימץ̇ וירג̇ע אלי מנזלה כילא יקתל פי אלחרב ורג̇ל אכ̇ר יבד̇לה

ואי רג̇ל אמלך אמראה ולם יזפהא פלימץ̇ וירג̇ע אלי מנזלה כילא יקתל פי אלחרב ורג̇ל אכ̇ר יזפהא

ת̇ם יזידו אלערפא פי מכ̇אטבה אלקום ויקולון אי רג̇ל כ̇איף רקיק אלקלב פלימץ̇ וירג̇ע אלי מנזלה ולא יחל קלב אכ̇ותה כקלבה

פענד פראגהם מן מכ̇אטבה אלקום כד̇לך יוכל בהם ריסא אלג̇יוש

ואד̇א תקדמת אלי קריה לתחארבהא פנאדהא אולא באלסלאם

פאן אג̇אבתך באלסלאם ופתחת לך פג̇מיע אלקום אלמוג̇ודין פיהא יכונו לך ד̇מה ויכ̇דמוך

ואן לם תסאלמך בל חארבתך פחאצרתהא

פיסלמהא אללה רבך פי ידך פאקתל רג̇אלהא בחד אלסיף

ואמא אלנסא ואלאטפאל ואלבהאים וג̇מיע מא פי אלקריה מן סלבהא פאגנמה לנפסך וכל סלב אעדאיך אלד̇י רזקך אללה רבך

כד̇א אצנע באלקרי אלבעידה מנך ג̇דא אלתי ליסת מן קרי האולי אלאמאם

ואמא מן קרי האולי אלאמם אלד̇ין אללה רבך מעטיך נחלה פלא תבק מנהם נסמה

בל אתלפהם אתלאפא אלחתיין ואלאמוריין ואלכנעאניין ואלפרזיין ואלחויין ואליבוסיין כמא אמרך אללה רבך

לכי לא יעלמוכם אן תצנעו כג̇מיע מכארההם אלתי צנעוהא למעבודתהם פתכ̇טו ללה רבכם

ואד̇א חאצרת קריה איאמא כת̇ירה לתחארבהא לתפתחהא פלא תפסד שג̇רהא באן תחרך עליה אלחדיד אד̇ מנה תאכל פלא תקטעה ט̇נא מנך אן שג̇ר אלצחרא כאלאנסאן אלד̇י אכ̇תפי מנך פי אלחצאר

לכן אי שג̇ר עלמתה אנה ליס במטעם פאפסדה ואקטעה ואבני אלאת אלחצאר עלי איה קריה חארבתך אלי אן תחדרהא