תפסיר רס"ג, דברים יט

ואד̇א קטע אללה רבך אלאמם אלד̇ין מעטיך בלדהם פורת̇תהם וסכנת פי קראהם ומנאזלהם

אפרז לך ת̇לאת̇ קרי פי וסט בלדך אלד̇י אללה רבך מעטיך לתחוזה

ואצלח טרקהא עלי תת̇לית̇ תכ̇ם ארצ̇ך אלד̇י ינחלך אללה רבך פתכון מעדה ליהרב אליה כל קאתל

והד̇א כ̇בר אלקאתל אלד̇י יהרב אליה פיחיא מן יקתל צאחבה בלא מערפה והו גיר שאני לה מן אמס ומא קבלה

וד̇לך כמן ידכ̇ל מע צאחבה אלי אלשערא ליקטע חטבא פתמיל ידה באלמקטע ליקטע אלעוד או ינסל אלחדיד מן אלעוד פיציב צאחבה פימות והו יהרב אלי ואחדה מן הד̇ה אלקרי פיחיא

כילא יכלב ולי אלדם אלקאתל ממא יחמי קלבה פילחקה לכת̇רה אלטריק פיקתלה וליס עליה חכם קתל אד̇ ליס שאניא לה מן אמס ומא קבלה

פלד̇לך אמרך אליום באן תפרז לך ת̇לאת̇ קרי

ואן אוסע אללה רבך תכ̇מך כמא קסם לאבאיך פאעטאך ג̇מיע אלבלאד אלתי קסם באן יעטיהא לאבאיך

וד̇לך אד̇א תחפט̇ ג̇מיע הד̇ה אלשריעה ותעמל בהא באן תחב אללה רבך ותסיר פי טרקה טול אלזמאן פזד ת̇לאת̇ קרי אכ̇ר עלי הד̇ה אלת̇לאת̇

לילא יספך דם ברי פי בלדך אלד̇י אללה רבך מעטיך נחלה פיכון עליך דמא

ואן כאן אלרג̇ל שאניא לצאחבה פכמן לה וקאם עליה חתי צ̇רבה וקתלה פמאת ת̇ם הרב אלי ואחדה מן הד̇ה אלקרי

פליבעת̇ שיוך̇ קריתה ויאכ̇ד̇וה מן ת̇ם ויסלמוה אלי ולי אלדם חתי יקתל

ולא תשפך עליה בל אנף קאתלי אלברי מן בין בני אסראיל ויכ̇אר לך

לא תזיג תכ̇ם צאחבך אלד̇י תכ̇מוה אלאולון בנחלתך אלתי תנחלהא פי אלבלד אלד̇י אללה רבך מעטיך לתחוזה

לא יקם שאהד ואחד עלי אנסאן פי שי מן אלד̇נוב ואלכ̇טאיא ואלג̇נאיאת אלתי יג̇ניהא בל עלי קול שאהדין או ת̇לאת̇ה שהוד תקום אלאמור

ואן קאם שאהד ט̇לם עלי אנסאן לישהד עליה במחאל

פליקף אלרג̇לאן אללד̇אן אלחכומה להמא בין ידי אללה ובין ידי אלאימה ואלחכאם אלד̇ין ילו פי ד̇לך אלזמאן

פלילתמסו ד̇לך אלחכאם ג̇ידא פאן כאן אלשאהד שאהד זור וקד שהד בבאטל עלי אכ̇יה

פאצנעו בה מת̇ל מא הם אן יצנעה באכ̇יה ואנף אהל אלשר מן וסטך

ואלבאקיון יסמעון ויכ̇אפון ולא יעודו אן יצנעו מת̇ל הד̇א אלאמר אלרדי פי מא בינכם

ולא תשפק עינך פי אלקצאץ נפס בנפס ודיה עין בעין וסן בסן ויד ביד ורג̇ל ברג̇ל