תפסיר רס"ג, דברים טז

ואחפט̇ שהר אלפריך אן תצנע פיה פסחא ללה רבך כמא אטלקך פיה ללכ̇רוג̇ מן מצר לילא

ואד̇בח אלפסח ללה רבך מן אלגנם ומעה מן אלבקר פי אלמוצ̇ע אלד̇י יכ̇תארה ליחל נורה פיה

ולא תאכל מעה כ̇מירא בל כל בעדה סבעה איאם פטירא טעאם אלצ̇עף לאנך כ̇רג̇ת מן מצר בחפז ואד̇כר יום כ̇רוג̇ך מן מצר טול זמאנך

ולא ירי לך כ̇מיר פי ג̇מיע תכ̇מך סבעה איאם ולא יבית מן אללחם אלד̇י תד̇בחה פי אלעשא אלי גדאה אליום אלאול

ולא יג̇וז לך אן תד̇בח אלפסח פי בעץ̇ מחאלך אלד̇י אללה רבך מעטיך

אלא פי אלמוצ̇ע אלד̇י יכ̇תארה אללה רבך ליחל נורה ת̇ם ת̇ם תד̇בח אלפסח ענד אלמסא קבל מג̇ב אלשמס וד̇לך פי פצל כ̇רוג̇ך מן מצר

ואנצ̇ג̇ה וכלה פי ד̇לך אלמוצ̇ע אלד̇י יכ̇תארה אללה רבך פיה ת̇ם ול באלגאדה ואמץ̇ אלי מנזלך

וכל בעדה אלפטיר סתה איאם ופי אליום אלסאבע מכת̇ פי קדס אללה רבך ולא תצנע פיה צנאעה

ואחץ סבעה אסאביע מן וקת אבתדא אלמנג̇ל פי סנבל אבתדי בהא

ואצנע חג̇ אסאביע ללה רבך עלי מקדאר ניל ידך ומא תתברע בה כמא ירזקך אללה רבך

ואפרח בין ידיה אנת ואבנך ואבנתך ועבדך ואמתך ואללוי אלד̇י פי מחאלך ואלגריב ואליתים ואלארמלה אלד̇ין פי מא בינכם פי אלמוצ̇ע אלד̇י יכ̇תארה אללה ליחל נורה פיה

ואד̇כר אנך כנת עבדא במצר ואחפט̇ הד̇ה אלרסום ואעמל בהא

ואצנע חג̇ אלמט̇ל סבעה איאם ענד ג̇מעך גלתך מן ביד̇רך ותג̇ארך

ואפרח פי חג̇ך אנת ואבנך ואבנתך ועבדך ואמתך ואללוי ואלגריב ואליתים ואלארמלה אלד̇ין פי מחאלך

כד̇אך תחג̇ סבעה איאם ללה רבך פי אלמוצ̇ע אלד̇י יכ̇תארה ליבארך לך פי ג̇מיע גלתך וסאיר מא תמד אליה ידיך פתכון פארחא מחצ̇א

ת̇לאת̇ מראר פי אלסנה יחצ̇ר ג̇מיע רג̇אלך בין ידי אללה רבך פי אלמוצ̇ע אלד̇י יכ̇תארה פי חג̇ אלפטיר וחג̇ אלאסאביע וחג̇ אלמט̇ל ולא יחצ̇רו בין ידיה פארגא

בל יאת כל רג̇ל במא תנאל ידה כרזק אללה רבך אלד̇י אעטאך

ואג̇על לך חכמא וערפא פי ג̇מיע מחאלך אלד̇י יעטי אללה רבך אסבאטך ויחכמו פי מא בין אלקום חכם עדל

לא תמיל אלחכם ולא תחאב אלוג̇וה ולא תאכ̇ד̇ אלרשא לאן אלרשא תעמי עיון אלעלמא ען אלחק ותזיף אלאקואל אלעאדלה

ואטלב אלחק אלמחץ̇ לכי תחיא ותחוז אלבלד אלד̇י אללה רבך מעטיך

לא תגרס סאריה מן אלשג̇ר אלי ג̇אנב מד̇בח אללה רבך אלד̇י תצנעה

ולא תנצב לך דכה עלי מא ישנאה אללה רבך