תפסיר רס"ג, דברים יז

לא תד̇בח ללה רבך ת̇ורא או שאה אלד̇י יכון פיה עיב שי מן אלעיוב אלרדיה לאן כריהה אללה רבך הו

ואן וג̇ד פי מא בינכם פי בעץ̇ קראך אלתי אללה רבך מעטיך רג̇ל או אמראה צנע אלשר בין ידי אללה רבך פתג̇אוז עהדה

ומצ̇א ועבד מעבודאת אכ̇ר וסג̇ד להא או ללשמס או ללקמר או ללסאיר נג̇ום אלסמא ממא לם אטלקלה

פאד̇א אכ̇ברת בד̇לך פאסתמעה ואלתמסה ג̇ידא פאד̇א כאן ד̇לך אלאמר חקא ת̇אבתא וקד צנעת הד̇ה אלכריהה פי מא בינכם

פאכ̇רג̇ ד̇לך אלרג̇ל או תלך אלאמראה אללד̇ין צנעא הד̇א אלאמר אלרדי פי מא בינכם אלרג̇ל וחדה או אלאמראה וחדהא וארג̇מהמא באלחג̇ארה אלי אן ימותא

בקול שאהדין או ת̇לאת̇ה שהוד יקתל מן יקתל ולא יקתל בקול שאהד ואחד

ואידי אלשאהדין תבטש בה אולא לקתלה ואידי סאיר אלנאס אכ̇רא ואנף אהל אלשר מן וסטך

ואד̇א כ̇פי ענך אמר מן אלאחכאם בין דם אלי דם ודין אלי דין וחכם בלא אלי בלא ואמור כ̇צומאת פי מחאלך פקם ואצעד אלי אלמוצ̇ע אלד̇י יכ̇תארה אללה רבך

וצר אלי אלאימה אלליואניין ואלי אלחאכם אלד̇י יכון פי ד̇לך אלזמאן פסל מנהם ד̇לך אמר אלחכם יפתונך בה

פאעמל בחסב אלאמר אלד̇י יפתוך בה מן ד̇לך אלמוצ̇ע אלד̇י יכ̇תארה אללה ואחפט̇ לתעמל בג̇מיע מא ידלונך

ובחסב אלדלאלה אלתי ידלונך ואלחכם אלד̇י יקולון לך תצנע ולא תזל מן אלאמר אלד̇י יפתונך ימנה ולא ויסרה

ואי רג̇ל יסתעמל אלקחה פלא יקבל מן אלאמאם אלמקים ת̇ם ליכ̇דם אללה רבך או מן אלחאכם פליקתל ד̇לך אלרג̇ל ואנף אהל אלשר מן אלאסראיל

וסאיר אלנאס יסמעון ויכ̇אפון ולא יתוקחון איצ̇א

ואד̇א דכ̇לת אלבלד אלד̇י אללה רבך מעטיך פתחוזה ואקמת פיה פקלת אנצב לי מלכא כסאיר אלאמם אלד̇י חואלי

פיג̇וז אן תנצב לך מלכא מן יכ̇תארה אללה רבך וליכן אלמלך אלד̇י תנצבה מן בעץ̇ אכ̇ותך ולא יג̇וז אן תנצב עליך רג̇לא גריבא מן ליס הו אכ̇אך

לכן לא יסתכת̇ר לה כ̇ילא לילא ירד אלקום אלי מצר לאסתכת̇אר אלכ̇יל ואללה פקד קאל לכם לא תעודו אלרג̇וע פי ד̇לך אלטריך אבדא

ולא יסתכת̇ר לה מן אלנסא לילא יזול קלבה ומן אלד̇הב ואלפצ̇ה לא יסתכת̇ר לה ג̇דא

וכמא יג̇לס עלי כרסי מלכה פתכתב לה נסכ̇ה הד̇ה אלתוריה פי ספר מן חצ̇רה אלאימה אללואניין

ותכון מעה ויקרא פיהא טול חיותה לכי יתעלם אן יכ̇אף אללה רבה ויחפט̇ ג̇מיע כלאם הד̇ה אלתוריה והד̇ה אלרסום ויעמל בהא

לילא ירתפע קלבה עלי אכ̇ותה ולילא יזול מן אלשריעה ימנה ולא יסרה ולכי תטול איאמה פי מלכה הו ובנוה פי מא בין אלאסראיל