תפסיר רס"ג, דברים טו

פי כל סבע סנין אצנע תסייבא

והד̇א שרח אלתסייב אן יסיב כל ד̇י נסי ידה ממא ינסי צאחבה פלא יקתצ̇י מן צאחבה ולא מן אכ̇יה אד̇ קד סמאהא תסייבא ללה

ואמא אלגריב פג̇איז אן תקתצ̇יה ואמא מא יכון לך עלי אכ̇יך פסיב ידך ענה

ויקינא אנה לא יכון פיך מסכין ממא יבארך לך אללה פי אלבלד אלד̇י יעטיכה נחלה תחוזהא

מא דאם תסמע ותקבל אמר אללה רבך ותחפט̇ ותעמל בג̇מיע הד̇ה אלשריעה אלתי אמרך בהא אליום

כמא אן אללה רבך קד בארך לך כמא ועדך פתעוץ̇ אממא כת̇ירה ואנת פלא תתעוץ̇ מנהם ותתסלט עלי כת̇יר מנהם ועליך לא יתסלטון

פאן כאן פיך מסכין בד̇נב או מחנה מן בעץ̇ אכ̇ותך פי בעץ̇ מחלך מן בלדך אלד̇י אללה רבך מעטיך פלא תקס קלבך ולא תקבץ̇ ידך ענה

בל אפתחהא לה פתחא ועוצ̇ה תעויצ̇א מקדר מא יעוזה

ואחד̇ר אן יכון פי קלבך קול ג̇הל פתקול קד קרבת אלסנה אלסאבעה סנה אלתסייב פתשח עלי אכ̇יך אלמסכין פלא תעטיה שיא פידעו עליך אלי אללה פתחל בך עקובתה

בל אעטה עטאא ולא תשח בה נפסך עליה פאן בג̇רירה הד̇א אלאמר יבארך לך אללה רבך פי אעמאלך וג̇מיע מא תמד אליה ידך

פעלי מא קלת לך ליס יעדם מסכין מן בין אלבלד אנא אמרך אליום באן תפתח ידך לאכ̇יך צ̇עיפך ומסכינך פי בלדך

ואן אסתבאע לך אכ̇וך אלעבראני או אכ̇תך אלעבראניה פליכ̇דמך סת סנין ופי אלסנה אלסאבעה אטלקה מן ענדך חרא

ואד̇א אטלקתה חרא מן ענדך פלא תטלקה פארגא

בל צלה בצלה מן גנמך וביד̇רך ותיג̇ארך וחסב מא רזקך אללה רבך פאעטה

ואד̇כר אנך טאל מא כנת עבדא במצר פעלי ד̇לך אפדך אללה רבך ואמרך במת̇ל הד̇א אלאמר פי מת̇ל הד̇א אליום

פאן קאל לך לא אכ̇רג̇ מן ענדך לאנה אחבך ואחב מנזלך אד̇ אלאצלח לה אלמקאם מעך

פכ̇ד̇ אלמיסאם וצ̇עה פי אד̇נה ענד באבך פיכון לך עבד אלדהר ולאמתך איצ̇א פאצנע כד̇אך

ולא יצעב עליך אטלאקך לה חרא מן ענדך פאנה יג̇וז אן יכון קד כ̇דמך צ̇עף מא יסאוי אג̇ר אג̇יר סת סנין פיבארך לך אללה רבך פי ג̇מיע מא תצנעה

וכל בכור יולד לך פי גנמך ובקרך אלד̇כור פאלזמה אלתקדיס ללה רבך לא תפלח באלבכר מן בקרך ולא תג̇ז אלבכר מן גנמך

בל תאכלה בין ידי אללה רבך סנה בסנה פי אלמוצ̇ע אלד̇י יכ̇תארה אנת ואלך

ואן כאן פיה עיב מן אזמן או אעמי וסאיר אלעיוב אלפאסדה פלא תד̇בחה ללה רבך

וג̇איז אן תאכלה פי מחלך ואן יאכלה איצ̇א אלטאהר ואלנג̇ס כמא יאכלאן אלט̇בי ואלאיל

מא כ̇לא דמה פלא תאכלה בל צבה עלי אלארץ̇ כאלמא