תפסיר רס"ג, דברים יב

הד̇ה אואיל אלרסום ואלאחכאם אלתי תחפט̇והא ותעמלו בהא פי אלבלד אלד̇י אעטאך אללה אלאה אבאיך אן תחוזה טול אלזמאן אלד̇י אנתם אחיא עלי אלארץ̇

אן תבידו ג̇מיע אלמואצ̇ע אלד̇י עבד ת̇ם אלאמם אלד̇ין אנתם קארצ̇והם ומעבודאתהם עלי אלג̇באל אלרפיעה ועלי אליפאע ותחת כל שג̇רה ריאן

ואנקצ̇ו מד̇אבחהם וכסרו דכאכהם וסואריהם אחרקו באלנאר ופסול מעבודאתהם תג̇דעוהא ואבידו אסמאהם מן ד̇לך אלמוצ̇ע

ולא תצנעו כד̇אך ללה רבכם

בל אלמוצ̇ע אלד̇י יכ̇תארה אללה רבכם מן ג̇מיע אסבאטכם ליחל פיה נורה אלתמסו מסכנה חתי תצירו אליה

פתחמלו אליה צואעדכם וד̇באיחכם ועשורכם ורפאיעכם ונד̇ורכם ותברעכם ובכור בקרכם וגנמכם

פתאכלוהא ת̇ם בין ידי אללה רבכם ותפרחון בג̇מיע מא אנבסטת ידכם אנתם וביותכם במא רזקך אללה רבך

לא תצנעו מן הד̇ה אלאמור כמא נחן צאנעון אליום כל אנסאן מא חסן ענדה

פאנכם לם תצירו בעד אלי אלמסתקר ואלנחלה אלתי אללה רבך מעטיך

פאד̇א עברתם אלארדן וג̇לסתם פי אלבלד אלד̇י אללה רבכם מעטיכם ויסתקרכם מן ג̇מיע אעדאיכם אלמחיטון בכם וג̇לסתם ואת̇קין

פאי מוצ̇ע אכ̇תארה אללה רבכם ליחל נורה פיה אליה תאתו בג̇מיע מא אמרכם מן צואעדכם וד̇באיחכם ועשורכם ורפאיעכם וכ̇יאר נד̇ורכם אלתי תנד̇רוהא ללה

פתפרחו בהא בין ידי אללה רבכם אנתם ובנוכם ובנאתכם ועבידכם ואמאכם ואללוי אלד̇י פי מחאלכם אד̇ ליס לה נציב ונחלה מעכם

ואחד̇ר לך אן תקרב קראבינך פי אי מוצ̇ע ראיתה

אלא פי אלמוצ̇ע אלד̇י אכ̇תארה אללה מן אחד אסבאטך ת̇ם קרב קראבינך ואצנע ג̇מיע מא אמרך בה

לכן מתי אשתהת נפסך לחמא פאד̇בח כרזק אללה רבך אלד̇י אעטאך פי סאיר קראך וג̇איז אן יאכל מנה אלטאהר ואלנג̇ס כמא יוכלאן לחם אלט̇בי ואלאיל

לכן אלדם לא תאכלה צבה עלי אלארץ̇ כאלמא

ולא יג̇וז לך אן תאכל פי מחאלך עשור ברך ועצירך ודהנך ובכור בקרך וגנמך ונד̇ורך אלתי נד̇רתהא ותברעך ורפאיעך

אלא בין ידי אללה רבך תאכלה פי אלמוצ̇ע אלד̇י יכ̇תארה אללה רבך אנת ואבנך ואבנתך ועבדך ואמתך ואללוי אלד̇י פי מחאלך ותפרח בין ידי אללה רבך במא אנבסטת בה ידך

ואחד̇ר אן תתרך אללוי טול מקאמך פי בלאדך

ואד̇א אוסע אללה רבך תכ̇מך כמא ועדך פקלת אכל לחמא ען שהוה מן נפסך לה פכלה מתי אשתהיתה

ואן בעד ענך אלמוצ̇ע אלד̇י יכ̇תארה אללה רבך ליחל נורה פיה פאד̇בח מן בקרך וגנמך אלד̇י רזקך אללה רבך כמא אמרתך וכלה פי מחאלך מתי מא אשתהתה נפסך

לכן כמא יוכל אלט̇בי ואלאיל כד̇אך תאכלה אן יג̇וז ללנג̇ס ואלטאהר אן יאכלא מנה

לכן תשדד אלא תאכל אלדם פאנה מסכן אלדם אלנפס פלא תאכל אלנפס מע אללחם

ואד̇ לא יג̇וז אן תאכלה פצבה עלי אלארץ̇ כאלמא

ואד̇ לא תאכלה יכ̇אר לך ולבניך מן בעדך אד̇א תצנע אלמסתקים ענד אללה

עדא אקדאסך מא כאן לך מנהא ונד̇ורך פאחמלהא ואת בהא אלי אלמוצ̇ע אלד̇י יכ̇תארה אללה

ואצנע צואעדך לחומהא ודמאהא כמלא עלי מד̇בח אללה רבך ומן דם ד̇באיחך יצב עלי מד̇בחה וכל לחומהא

אחפט̇ ואקבל ג̇מיע הד̇ה אלאמור אלתי אמרך בהא לכי יכ̇אר לך ולבניך בעדך אלי אלדהר אד̇א תצנע אלכ̇יר ואלמסתקים ענד אללה רבך

ואד̇א קטע אללה רבך אלאמם אלד̇ין אנת דאכ̇ל אלי ת̇ם לתקרצ̇הם מן בין ידיך פאד̇א קרצ̇תהם וסכנת מא פי קראהם וביותהם

אחד̇ר לך אן תוהק פי תבעהם בעד אנפאד̇הם מן בין ידיך וכילא תלתמס למעבודאתהם קאילא כיף כאן יעבדהא האולי אלאמם פאצנע אנא איצ̇א כד̇אך

לא תצנע כד̇אך ללה רבך פאן כת̇ירא ממא יכרהה אללה וישנאה צנעוה למעבודאתהם חתי אן בניהם ובנאתהם קד יחרקונהא באלנאר להא