תפסיר רס"ג, דברים יא

פאחבב אללה רבך ואחפט̇ מא אסתחפט̇ך ורסומה ווצאיאה ואחכאמה טול אלזמאן

ואעלמו מן אליום אן ליס אלעמל עלי בניכם אלד̇ין לם יעלמו ולם ירו אדאב אללה רבכם ועט̇מתה וידה אלשדידה וד̇ראעה אלממדודה

ואיאתה ואעמאלה אלתי צנעהא פי וסט מצר בפרעון וג̇מיע קואדה וסאיר אהל בלדה

ומא צנע בג̇נד מצר וכ̇ילה ומראכבה אלד̇י אטאף מא בחר אלקלזם עלי וג̇וההם למא כלבוכם פאהלכהם אלי יומנא הד̇א

ומא צנע בכם פי אלבר אלי אן ג̇יתם אלי הד̇א אלמוצ̇ע

ומא צנע בדתן ואבירם בני אליאב אבן ראבן אד̇ פתחת אלארץ̇ פאהא פאבתלעתהם וביותהם ואכ̇ביתהם וג̇מיע אלאנאם אלד̇ין מעהם פי מא בין בני אסראיל

בל עיונכם ראת ג̇מיע צנע אללה אלעט̇ים אלד̇י צנעה

פאחפט̇ו ג̇מיע אלשריעה אלתי אמרכם בהא אליום לכי תשתדו ותדכ̇לו ותחוזו אלבלד אלד̇י צאירון אליה לתחוזוה

ולכי תטול מדתכם פיה כמא קסם אן יעטיה לאבאיכם ולנסלהם והו בלד יפיץ̇ לבנא ועסלא

פאן אלבלד אלד̇י אנת צאיר אליה לתחוזוה ליס הו כבלד מצר אלד̇י כ̇רג̇ת מנה אלד̇י כנת תזרע זרעך פיה ותסקיה ברג̇לך כג̇נאן אלבקול

לכן אלארץ̇ אלתי אנתם ג̇איזון אליהא לתחוזוהא ארץ̇ ג̇באל ובקאע מן מטר אלסמא תשרב מאא

ארץ̇ אללה רבך מתעאהדהא ודאימא ענאיתה בהא מן אול אלסנה אלי אכ̇רהא

פאן סמעתם לוצאיא אלתי אמרתם בהא אליום לתחבו אללה רבכם ותעבדוה מכ̇לצין בכל קלבכם ובכל נפסכם

נזלת מטר בלדכם פי וקתה וסמיא ולקיסא ותג̇מע ברך ועצירך ודהנך

ואנבת עשבא פי צחראך לבהאימך פתאכל ותשבע

ואחד̇רו אן ינכ̇דע קלובכם פתולון ותעבדון מעבודאת אכ̇ר ותסג̇דון להא

פישתד גצ̇ב אללה עליכם ויחבס אלסמא פלא יכון מטר ואלארץ̇ לא תנבת אדאהא פתבידון בסרעה ען אלארץ̇ אלג̇ידה אלתי אללה מעטיכמוהא

וצירו כלאמי הד̇א פי קלובכם ופי נפוסכם ואעקדוהא עלאמה עלי אידיכם ותכון מנשורה בין עיונכם

ואעלמוהא בניכם ותדרסוהא פי חאל ג̇לוסך פי מנזלך ומסירך פי טריקך וניאמך וקיאמך

ואכתבהא עלי כ̇דוד פתוח ביותך ואבואבך

לכי תטול איאמכם ואיאם בניכם עלי אלארץ̇ אלתי קסם אללה לאבאיכם אן יעטיכם כאיאם אלסמא עלי אלארץ̇

פאנכם אן חפט̇תם ג̇מיע הד̇ה אלוצאיא אלתי אנא אמרכם ועמלתם בהא אן תחבו אללה רבכם ותסירו פי ג̇מיע טרקה ותלזמוה

יקרץ̇ אללה ג̇מיע האולי אלאמם מן בין ידיכם פורת̇תם אממא אכבר ואעט̇ם מנכם

וכל מוצ̇ע יטאה קדמכם יכון לכם מן אלבר ואללבנאן ונהר אלפראת ואלבחר אלכביר יכון תכ̇מכם

ולא יקף אנסאן בין ידיכם בל פזעכם וכ̇ופכם ילקיה אללה רבכם עלי ג̇מיע אלבלד אלד̇י תסלכוה כמא ועדכם

אנט̇רו האנא תאל עליכם אליום ברכאת ולענאת

פאמא אלברכאת פאן קבלתם וצאיא אללה רבכם אלתי אנא אמרכם אליום

ואמא אללענאת פאן לם תקבלו וצאיא אללה רבכם וזלתם ען אלטריק אלד̇י אנא אמרתכם בה אליום ואתבעתם מעבודאת אכ̇ר מא לם תערפוהא

פאד̇א אדכ̇לך אללה רבך אלי אלבלד אלד̇י אנת צאיר אליה לתחוזה פאתל אלברכאת עלי ג̇בל גריזים ואללענאת עלי ג̇בל עיבל

אלא אנהמא פי ג̇אנב אלארדן ורא טריק מגיב אלשמס ען בלד אלכנעאני אלמקים פי אלגור ממא ילי אלג̇בל ענד מרוג̇ מרה

לאנכם ג̇איזון אלארדן לתדכ̇לו ותחוזו אלבלד אלד̇י אללה רבכם מעטיכם פאד̇א חזתמוה וג̇לסתם פיה

פאחפט̇ו ואעמלו בג̇מיע אלרסום ואלאחכאם אלתי אנא אמרכם בהא אליום