תפסיר רס"ג, דברים יג

פג̇מיע מא אמרכם בה פאחפט̇וה ואעמלו בה לא תזידו עליה ולא תנקצו מנה

ואן קאם פי מא בינכם מדעי נבוה או חאלם חלם פאעטאכם איה או ברהאנא

פלו אתת אלאיה ואלברהאן ממן קאל לך תעאל בנא אלי מעבודאת אכ̇ר מא לם תערפהא פנעבדהא

פלא תקבל מן ד̇לך אלמדעי אלנבוה או אלחאלם אלחלם פאן אללה רבכם ממתחנכם ליט̇הר הל אנתם מחבוה מכ̇לצין בכל קלובכם ונפוסכם

בל פי תבע אללה רבכם תסירו ואיאה פארהבו ווצאיאה פאחפט̇והא וקולה פאקבלו ואיאה פאעבדו וטאעתה פאלזמוהא

וד̇לך אלמדעי אלנבוה ואלחאלם אלחלם פיקתל למא תקול אלמחאל עלי אללה רבכם אלמכ̇רג̇כם מן בלד מצר אלמפדיכם מן בית אלעבודיה לידחו בך ען אלטריק אלד̇י אמרך אללה רבך אן תסיר פיה פאנף אהל אלשר מן וסטך

ואן אגואך אכ̇וך אבן אמך או אבנך או אבנתך או אמרתך אלתי הי חרמתך או צדיקך אלד̇י כנפסך פי אלסתר קאילא תעאל נעבד מעבודאת אכ̇ר מא לם תערפהא אנת ואבאוך

מן מעבודאת אלאמם אלד̇ין חואליכם אלאקרבין אליך או אלאבעדין מנך מן טרף אלארץ̇ אלי טרפהא

פלא תשא ד̇לך ולא תקבל מנה ולא תשפק עליה ולא תרת̇ לה ולא תסתר עליה

בל אקתלה קתלא וידך תבטש פיה אולא פתקתלה ויד סאיר אלקום אכ̇ירא

וארג̇מה באלחג̇ארה חתי ימות למא קצד אדחאך ען אללה רבך אלמכ̇רג̇ך מן בלד מצר מן בית אלעבודיה

וסאיר אלקום יסמעון ויכ̇אפון פלא יעאודון אן יצנעו מת̇ל הד̇א אלאמר אלרדי פי וסטך

ואן סמעת ען בעץ̇ קראך אלתי אללה רבך מעטיכהא אן תסכן פיהא קול קאיל

אן קד כ̇רג̇ קום כפאר מנהא פאצ̇לו אהל קריתהם קאילין תעאלו נעבד מעבודאת אכ̇ר מא לם תערפוהא

פאלתמס ד̇לך ואסתברה וסל ענה נעמא באן כאן אלאמר חקא ת̇אבתא קד צנעת הד̇ה אלכריהה פי וסטך

פאקתל קתלא אהל תלך אלקריה בחד אלסיף ואתלפהא וג̇מיע מא פיהא חתי בהאימהא בחד אלסיף

וג̇מיע סלבהא אג̇מעה אלי וסט רחבתהא ואחרק באלנאר תלך אלקריה וג̇מיע סלבהא ג̇מלה ללה רבך ותכון תלא אלי אלדהר לא תבנא אבדא

ולא ילזק בידך שי מן אלמתלוף לכי ירג̇ע אללה לך מן שדה גצ̇בה ויעטיך רחמתה פירחמך ויכת̇רך כמא קסם לאבאיך

אד̇ תקבל אמר אללה רבך ותחפט̇ ותעמל בג̇מיע וצאיאה ורסומה אלתי אמרך בהא אליום באן תצנע אלמסתקים ענדה