בבא מציעא סו:

אִיבָּעֵית אֵימָא דַּאֲמַר לֵיהּ קְנִי מֵעַכְשָׁיו

אֲמַרוּ לֵיהּ מָר יָנוֹקָא וּמָר קַשִּׁישָׁא בְּנֵי דְּרַב חִסְדָּא לְרַב אָשֵׁי הָכִי אָמְרִי נְהַרְדְּעָאֵי מִשְּׁמֵיהּ דְּרַב נַחְמָן הַאי אַסְמַכְתָּא בְּזִמְנֵיהּ קָנְיָא בְּלָא זִמְנֵיהּ לָא קָנְיָא

אֲמַר לְהוּ כֹּל מִידֵּי בְּזִמְנֵיהּ קָנֵי בְּלָא זִמְנֵיהּ לָא קָנֵי

דִּלְמָא הָכִי קָאָמְרִיתוּ אַשְׁכְּחֵיהּ בְּגוֹ זִמְנֵיהּ וַאֲמַר לֵיהּ קְנִי קָנֵי בָּתַר זִמְנֵיהּ וַאֲמַר לֵיהּ קְנִי לָא קָנֵי מַאי טַעְמָא מֵחֲמַת כִּיסּוּפָא הוּא דְּקָאָמַר לֵיהּ

וְלָא הִיא דַּאֲפִילּוּ בְּגוֹ זִמְנֵיהּ נָמֵי לָא קָנֵי וְהַאי דְּקָאָמַר לֵיהּ קְנִי קָא סָבַר כִּי מָטֵי זִמְנֵיהּ לָא לַיְתֵי לִיטְרְדַן

אָמַר רַב פָּפָּא הַאי אַסְמַכְתָּא זִימְנִין קָנְיָא וְזִימְנִין לָא קָנְיָא אַשְׁכְּחֵיהּ דְּקָא שָׁתֵי שִׁכְרָא קָנֵי דְּקָא מְהַפֵּךְ אַזּוּזֵי לָא קָנֵי

אֲמַר לֵיהּ רַב אַחָא מִדִּפְתִּי לְרָבִינָא דִּלְמָא לְפַכּוֹחֵי פַּחְדֵּיהּ קָא שָׁתֵי אִי נָמֵי אִינִישׁ אַחֲרִינָא אַסְמְכֵיהּ אַזּוּזֵי אֶלָּא אָמַר רָבִינָא אִי קָפֵיד בִּדְמֵי וַדַּאי קָנֵי

אֲמַר לֵיהּ רַב אַחָא מִדִּפְתִּי לְרָבִינָא דִּלְמָא סָבַר כִּי הֵיכִי דְּלָא תִּיתְּזִיל אַרְעֵיהּ אֶלָּא אָמַר רַב פָּפָּא אִי קָפֵיד בְּאַרְעָא וַדַּאי קָנֵי

וְאָמַר רַב פָּפָּא אַף עַל גַּב דַּאֲמוּר רַבָּנַן אַסְמַכְתָּא לָא קָנְיָא אַפּוֹתֵיקֵי הָוְיָא לְמִיגְבֵּא מִינַּהּ

אֲמַר לֵיהּ רַב הוּנָא בְּרֵיהּ דְּרַב נָתָן לְרַב פָּפָּא מִי קָאָמַר לֵיהּ קְנִי לְגוּבְיָינָא אֲמַר לֵיהּ מָר זוּטְרָא בְּרֵיהּ דְּרַב מָרִי לְרָבִינָא וְאִי אָמַר קְנִי לְמִיגְבֵּא מִינֵּיהּ קָנֵי סוֹף סוֹף אַסְמַכְתָּא הִיא וְאַסְמַכְתָּא לָא קָנְיָא

אֶלָּא אַפּוֹתֵיקֵי דְּאָמַר רַב פָּפָּא מַאי הִיא דַּאֲמַר לֵיהּ לֹא יְהֵא לְךָ פֵּרָעוֹן אֶלָּא מִזּוֹ

הָהוּא גַּבְרָא דְּזַבֵּין לֵיהּ אַרְעָא לְחַבְרֵיהּ בְּאַחְרָיוּת אֲמַר לֵיהּ אִי טָרְפוּ לַיהּ מִנַּאי מַגְבֵּית לִי מֵעִידֵּי עִידִּית דְּאִית לָךְ אֲמַר לֵיהּ מֵעִידֵּי עִידִּית לָא מַגְבֵּינָא לָךְ דְּבָעֵינָא לְמֵיקַם קַמַּאי אֶלָּא מַגְבֵּינָא לָךְ מֵעִידִּית אַחֲרִיתִ[י] דְּאִית לִי לְסוֹף טַרְפוּהָ מִינֵּיהּ אֲתָא בִּדְקָא שְׁקֵיל לְעִידֵּי עִידִּית

סְבַר רַב פָּפָּא לְמֵימַר מֵעִידִּית אֲמַר לֵיהּ וְהָא קָיְימָא

אֲמַר לֵיהּ רַב אַחָא מִדִּפְתִּי לְרָבִינָא וְלֵימָא לֵיהּ כִּי אֲמַרִי לָךְ אֲנָא מַגְבֵּינָא לָךְ דַּהֲוָה עִידֵּי עִידִּית קָיְימָא הַשְׁתָּא קָיְימָא לֵיהּ עִידִּית בִּמְקוֹם עִידֵּי עִידִּית

רַב בַּר שְׁבָא הֲוָה מַסֵּיק בֵּיהּ רַב כָּהֲנָא זוּזֵי אֲמַר לֵיהּ אִי לָא פָּרַעְנָא לָךְ לְיוֹם פְּלוֹנִי גְּבִי מֵהַאי חַמְרָא סְבַר רַב פָּפָּא לְמֵימַר כִּי אָמְרִינַן אַסְמַכְתָּא לָא קָנְיָא הָנֵי מִילֵּי בְּאַרְעָא דְּלָאו לְזַבּוֹנֵי קָיְימָא אֲבָל חַמְרָא כֵּיוָן דִּלְזַבּוֹנֵי קָאֵי כְּזוּזֵי דָּמֵי

אֲמַר לֵיהּ רַב הוּנָא בְּרֵיהּ דְּרַב יְהוֹשֻׁעַ לְרַב פָּפָּא הָכִי אָמְרִינַן מִשְּׁמֵיהּ דְּרַבָּה כֹּל דְּאִי לָא קָנֵי

אָמַר רַב נַחְמָן הַשְׁתָּא דַּאֲמוּר רַבָּנַן אַסְמַכְתָּא לָא קָנְיָא הָדְרָא אַרְעָא וְהָדְרִי פֵּירֵי לְמֵימְרָא דְּסָבַר רַב נַחְמָן מְחִילָה בְּטָעוּת לָא הָוְיָא מְחִילָה

וְהָאִיתְּמַר הַמּוֹכֵר פֵּירוֹת דֶּקֶל לַחֲבֵירוֹ אָמַר רַב הוּנָא עַד שֶׁלֹּא בָּאוּ לָעוֹלָם יָכוֹל לַחְזוֹר בּוֹ מִשֶּׁבָּאוּ לָעוֹלָם אֵין יָכוֹל לַחְזוֹר בּוֹ וְרַב נַחְמָן אָמַר אַף מִשֶּׁבָּאוּ לָעוֹלָם יָכוֹל לַחְזוֹר בּוֹ

וְאָמַר רַב נַחְמָן מוֹדֵינָא דְּאִי שָׁמֵיט וְאָכֵיל לָא מַפְּקִינַן מִינֵּיהּ הָתָם זְבִינֵי הָכָא הַלְוָאָה

אָמַר רָבָא