תפסיר רס"ג, במדבר לג
Tafsir Rasag, Numbers 33 · תפסיר רס"ג · free full Hebrew text
Open in the reader →והד̇ה מראחל בני אסראיל אד̇ כ̇רג̇ו מן בלד מצר עלי ג̇יושהם ביד מוסי והרון
פכתב מוסי כרוג̇הם אלי מראחלהם עלי קול אללה והד̇ה מראחלהם לכ̇רוג̇הם
אד̇ רחלו מן עין שמס פי אלשהר אלאול פי אליום אלכ̇אמס עשר מנה וד̇לך מן גד אלפסח פכ̇רג̇ בנו אסראיל ביד רפיעה בחצ̇רה ג̇מיע אלמצריין
והם ידפנון אלד̇ין קתלהם אללה פיהם מן כל בכר וצנע אחכאמא במעבודאתהם
ורחלו מן ת̇ם ונזלו פי איתם פי טרף אלבריה
ורחלו מן ת̇ם ונזלו פי פוהה חירות אלתי פי חצ̇רה בעל צפון ונזלו בין ידי מגדל
ורחלו מן ת̇ם ועברו פי וסט אלבחר אלי אלבריה ת̇ם סארו מסאפה ת̇לאת̇ה איאם פי בריה איתם ונזלו פי מרה
ורחלו מנהא וג̇או אלי אילם וכאן פיהא את̇נתא עשרה עין מא וסבעון נכ̇לה פנזלו הנאך
ורחלו מן ת̇ם ונזלו פי בריה סין
ורחלו מנהא ונזלו פי רפידים ולם יכן ת̇ם מא ללקום ישרבונה
ורחלו מנהא ונזלו פי מקאבר אלמשתהיין
ורחלו מנהא ונזלו פי בריה צן הי רקים
ורחלו מנהא ונזלו פי ג̇בל הור פי טרף בלד אדום
פצעד הרון אלאמאם אלי ג̇בל הור פמאת ת̇ם באמר אללה פי סנה ארבעין לכ̇רוג̇ בני אסראיל מן בלד מצר פי אליום אלאול מן אלשהר אלכ̇אמס
וכאן לה מאיה ות̇לאת̇ ועשרון סנה למא מאת הנאך
ת̇ם כאן כ̇בר מא סמע אלכנעאני מלך ערד והוא סאכן אלדארום פי בלד כנעאן במג̇י בני אסראיל
ורחלו מנהא ונזלו פי עיי אלמג̇אז פי בלד מואב
ורחלו מנהא ונזלו פי עלמן דבלתימה
ורחלו מנהא ונזלו פי ג̇באל אלעברים בין ידי נבו
ורחלו מנהא ונזלו פי בידאת מואב עלי ארדן ירחו
פנזלו עלי אלארדן מן בית ישמת אלי מרג̇ שטים וד̇לך בידאת מואב
פכלם אללה מוסי פי בידאת מואב עלי ארדן ירחו תכלימא
מר בני אסראיל וקל להם אנתם ג̇איזון אלארדן אלי בלד כנעאן
פאקרצ̇ו ג̇מיע אהל אלבלד מן בין ידיכם ואבידו ג̇מיע מזכ̇רפאתהם ואצנאם מסבוכאתהם וביעהם תנפד̇והא
ואד̇א קרצ̇תמוהם פאסכנו אלבלד פאני קד אעטיתכם איאה
ותוזעוה באסהם לעשאירכם ללכת̇יר כת̇רו נחלתה וללקליל קללוהא ומן כ̇רג̇ לה אלסהם פי אי מוצ̇ע פליכן לה ועלי אסבאט אבאיכם תוזעוה
ואן לם תקרצ̇ו אהל אלבלד מן בין ידיכם פיציר מא תבקונה מנהם כאבר פי עיונכם וכמסאל פי ג̇נובכם ויצ̇איקוכם פי אלבלד אלד̇י אנתם מקימון פיה